Cov Ixayees Yuav Thuam Luag Npanpiloos

1 (יחוח)Yahweh yuav khuvleej Yakhauj thiab yuav rov xaiv Ixayees dua, thiab yuav tsa lawv nyob hauv lawv lub tebchaws, thiab lwm haiv neeg kuj yuav nrog lawv nyob thiab yuav koom nrog Yakhauj‎ caj ces nyob ua ke. 2 Thiab ib tsoom tebchaws yuav coj lawv los nyob hauv lawv tej qub teb qub chaw mas Ixayees caj ces yuav tau cov tibneeg ntawd ua cov Ixayees tug thiab ua tub qhe nkauj qhe rau hauv (יחוח)Yahweh lub tebchaws. Cov Ixayees yuav ntes cov uas txeev ntes lawv, thiab yuav kav cov uas txeev quab yuam lawv. 3 Thaum (יחוח)Yahweh pub nej tau so tsis raug kev mob nkeeg thiab kev ntxhov siab thiab dim ntawm tej haujlwm hnyav uas nej raug lawv quab yuam ua, 4 mas nej yuav tsa suab thuam luag Npanpiloos tus vajntxwv li no tias, tus uas quab yuam peb kuj ntsiag to lawm, thiab nws txojkev npau taws ua nruj ua tsiv kuj ntsiag to lawm lauj!

5 (יחוח)Yahweh twb muab cov tibneeg lim hiam tus qws lov lawm, yog lov cov thawj kav tus cwj 6 uas ntaus tej haiv neeg ua npau taws vog tsis tseg tsis tu li, thiab kav rawv tej tebchaws ua chim tsawv thiab tsim txom tsis tseg tsis tu li.

7 Thoob ntiajteb tau so siab tus yees, lawv tsa suab hu nkauj zoo siab. 8 Tej ntoo ciab nplooj suab thiab tej ntoo ciab hauv Lenpanoos zoo siab xyiv fab vim koj ntog lawm thiab hais tias, txij thaum koj poob qes lawm tsis muaj leejtwg tuaj ntov peb lawm.

9 Tub tuag teb tabtom npaj nroos tos txais koj mus, nws txhib cov uas twb tuag lawm sawv tos txais koj, uas yog txhua tus thawj kav ntiajteb thiab txhib txhua tus vajntxwv uas kav tej tebchaws kom sawv ntawm lawv lub zwm txwv tos txais koj. 10 Lawv txhua tus yuav hais rau koj tias, koj kuj tsaug leeg ib yam li peb lawm. Koj yeej zoo li peb lawm. 11 Koj lub hwjchim thiab meej mom, thiab tej suab nkauj nog ncas poob los rau hauv tub tuag teb lawm, mas kas pua koj lub chaw pw thiab cab ua daim pam rau koj vov. 12 Lub hnub qub toog uas ci nruab hnub uas tshwm thaum kaj ntug es, koj poob saum ntuj los lawm lauj! Koj uas ua rau tej tebchaws poob qes kawg, koj raug muab txiav poob rau hauv pem teb lawm lauj!

13 Koj xav hauv koj lub siab tias, kuv yuav nce mus rau saum ntuj, kuv yuav tsa kuv lub zwm txwv siab dua (יחוח)Yahweh tej hnub qub huvsi, kuv yuav nyob saum lub roob siab pem hauv ntuj uas tej timtswv tuaj txoos ua ke.

14 Kuv yuav nce mus dhau saum cov huab. Kuv yuav ua kom kuv zoo ib yam nkaus li tus uas Loj Dua Ntais. 15 Koj raug muab pov rau hauv tub tuag teb, poob rau hauv lub qhov uas tob tshaj plaws. 16 Cov uas pom koj yuav saib ntsia ntsoov koj thiab yuav xav hais tias, tus yawg no puas yog tus uas ua rau lub ntiajteb ntseeg nkaws, thiab yog tus uas co tej tebchaws, 17 thiab ua rau lub ntiajteb nyob do cuas cia thiab rhuav tej nroog puam tsuaj tag, thiab tsis tso tej tibneeg uas nws ntes tau rov mus tsev? 18 Tej tebchaws txhua tus vajntxwv kuj nyias pw hauv nyias lub qhov ntxa uas muaj meej mom. 19 Tiamsis koj raug muab laim pov tseg deb ntawm koj lub qhov ntxa, yog lub cev tuag uas ntxub kawg li, cov tibneeg raug tua sib tsub sib nias npog koj, yog cov uas raug ntaj nkaug thiab nqes mus rau lub qhov zeb uas yog qhov tuag, ib yam li lub cev tuag uas raug muab tsuj pes ntiag.

20 Yuav tsis muab koj faus nrog lwm tus vajntxwv ua ke vim koj twb ua rau koj lub tebchaws puam tsuaj thiab koj tua koj cov pejxeem pov tseg. Thov kom tsis txhob muaj leejtwg hais txog tus tibneeg phem caj ces dua li lawm. 21 Cia li npaj tua nws tej menyuam pov tseg vim yog leej txiv tej kev txhaum muaj txim. Tsis txhob cia lawv sawv los kav lub qab ntuj thiab rhawv tej moos puv nkaus lub ntiajteb. 22 (יחוח)Yahweh uas muaj hwj chim loj kawg nkaus hais tias, kuv yuav sawv tawm tsam lawv thiab yuav txiav Npanpiloos lub npe mus thiab tsis pub ib tug tibneeg nyob hauv kiag li thiab txiav lawv tej tub ki thiab lawv tej caj ces pov tseg. (יחוח)Yahweh hais li no ntag. 23 Kuv yuav muab Npanpiloos ua plas chaw nyob thiab cia ua tej pas iav. Kuv yuav xuas rab khaub rhuab uas yog kev puam tsuaj cheb kom du lug. (יחוח)Yahweh uas muaj hwjchim loj kawg nkaus hais li no ntag.

​

Axilias Yuav Raug Puam Tsuaj

24 (יחוח)Yahweh uas muaj hwjchim loj kawg nkaus cog lus khov kho hais tias, kuv tau kom haujlwm cia li cas lawm yeej yuav muaj raws li ntawd, thiab kuv tau xav tseg li cas yeej yuav muaj tshwm raws li ntawd. 25 Kuv yuav ntaus cov Axilias hauv kuv lub tebchaws kom puam tsuaj tag huvsi, thiab muab lawv tsuj pes ntiag saum kuv tej roob. Mas lawv tus quab yuav plam ntawm kuv cov tibneeg mus thiab lawv lub nra yuav plam ntawm kuv cov tibneeg lub xub pwg.

26 Tej no yog tej uas kom tseg rau lub ntiajteb huvsi thiab no yog (יחוח)Yahweh txhais tes uas tsa rau saum ib tsoom tebchaws huvsi.

27 Vim (יחוח)Yahweh uas muaj hwjchim loj kawg nkaus twb kom tseg cia lawm, leejtwg yuav muab rhuav tau pov tseg? Nws twb tsa hlo nws txhais tes lawm, leejtwg yuav ua tau kom rov qab nkaum tes?

​

Tej Lus Uas Hais Txog Filixatee‎s

28 Xyoo uas vajntxwv Ahas tuag lawm, (יחוח)Yahweh hais tej lus no tuaj hais tias, 29 Cov Filixatee‎s sawvdaws es, nej tsis txhob zoo siab xyiv fab hais tias rab qws uas ntaus nej lov lawm, rau qhov tus nab muaj taug tseem yuav tshwm ib tug nab raj kub sai, thiab yuav tshwm ib tug zaj uas txawj ya. 30 Thiab tej tibneeg pluag tej tub hlob yuav muaj noj muaj haus, thiab cov tibneeg txom nyem yuav pw tso siab lug. Tiamsis kuv yuav muab kev tshaib nqhis tua nej caj ces thiab cov uas tshuav nyob los kuv yuav muab tua pov tseg huvsi. 31 Tej rooj loog es, cia li quaj nyiav, lub nroog es, cia li quaj, txhua tus hauv Filixatee‎s tebchaws es, nej cia li ntshai ua siab ntsws yaj tag vim yog tej pa taws tawm sab ped tuaj, thiab tsis muaj ib tug tub rog yuav poob qab li. 32 Yuav teb li cas rau Filixatee‎s cov tub tshaj xo? Kuj teb tau tias, (יחוח)Yahweh twb rhawv lub moos Xi‑oo mas nws cov tibneeg uas raug kev txom nyem thiaj tau chaw cawm siav rau hauv.