Tej Lus Uas Hais Txog Npanpiloos

1 Tej lus uas (יחוח)Yahweh qhia rau Isayah uas yog Amoj tus tub pom txog Npanpiloos. 2 Cia li tsa tus chij ntaus rog rau saum lub roob do hau, cia li hu lawv, cia li co tes kom lawv nkag cov thawj lub rooj loog mus rau hauv. 3 Kuv twb hais rau cov uas kuv xaiv cia lawm thiab twb hu kuv cov tub rog uas siab loj siab tuab yog kuv cov uas khav theeb thiab khav ntxhias, kom lawv mus ua raws li kuv chim. 4 Mloog saib, lub suab nrov ntshu nrooj saum tej roob yam li ib pab tibneeg coob coob. Mloog saib, lub suab ntawd yog tej tebchaws thiab tej haiv neeg tuaj txoos ua ke. (יחוח)Yahweh uas muaj hwjchim loj kawg nkaus tabtom txhij tub rog coob coob mus ntaus rog.

5 Lawv tuaj tej tebchaws uas deb tuaj thiab tuaj qab ntuj kawg tuaj, twb yog (יחוח)Yahweh thiab nws kev chim tej cuab yeej, thiaj ua rau lub ntiajteb puam tsuaj huvsi. 6 Cia li quaj nyiav rau qhov hnub uas (יחוח)Yahweh teem cia los ze lawm, hnub ntawd yuav los yog hnub uas (יחוח)Yahweh tus muaj hwjchim loj kawg nkaus yuav coj kev puam tsuaj los. 7 Vim li ntawd txhua txhais tes yuav tsaug leeg thiab txhua tus lub siab yuav yaj tag. 8 Lawv yuav poob siab tag, lawv yuav raug kev mob kev ntsaj. Lawv yuav nti yam nkaus li pojniam mob plab yug menyuam. Lawv ib leeg yuav saib ib leeg hle muag hlo ceeb kawg nkaus ua ntsej muag thim xem tag.

9 Saib maj, (יחוח)Yahweh hnub tabtom los, ua nyaum npau taws vog chim heev ua rau lub ntiajteb nyob do cuas cia thiab muab tej tib-neeg txhaum rhuav tshem ploj tag. 10 Tej hnub qub saum ntuj thiab tej ntsauv hnub qub yuav tsis ci lawm. Txawm yog lub hnub tawm tuaj los yuav tsaus ntuj nti thiab lub hli yuav tsis muaj duab ci lawm. 11 Kuv yuav rau txim rau lub ntiajteb vim yog tej kev phem, thiab tej tibneeg limhiam vim lawv tej kev txhaum. Kuv yuav ua rau cov tibneeg muab hlob tej kev khav theeb ploj tag thiab yuav txo cov tibneeg ua limhiam ntais ntuj uas tsab ua loj poob tag. 12 Kuv yuav ua kom ceeblaj nrhiav tau tej txivneej heev dua li nrhiav tau tej tseem kub, thiab ceeblaj nrhiav tau tibneeg heev dua li nrhiav tau tej kub ntawm Aufis. 13 Kuv yuav ua kom lub ntuj ntseeg nkaws, thiab lub ntiajteb ua zog koog txav dua ib qho, vim yog (יחוח)Yahweh uas muaj hwjchim loj kawg nkaus npau taws rau hnub uas nws chim heev.

14 Txhua tus nyias yuav tig rov mus rau nyias haiv neeg thiab txhua tus nyias yuav khiav mus rau nyias lub tebchaws, ib yam nkaus li tus kauv seb uas raug luag raws thiab yam li tej yaj uas tsis muaj tus uas sau los ua ib pab.

15 Yog luag ntsib tug twg mas tus ntawd yuav raug muab nkaug, thiab ntes tau tus twg mas yuav raug ntaj tua. 16 Lawv tej menyuam mos yuav raug muab ntsawm rau hauv av tuag tag tab meeg ntawm lawv xubntiag, lawv tej tsev yuav raug lws thiab lawv tej pojniam yuav raug yuam. 17 Kuv tabtom tshum cov Midias lub siab kom tawm tsam lawv, cov Midias yog cov uas tsis ntshaw tej nyiaj thiab tsis nyiam tej kub. 18 Lawv tej hneev yuav tua tej tub hluas tuag tag. Lawv yuav tsis khuvleej tej menyuam mos, thiab lawv lub qhov muag yuav tsis tab ncuab tej menyuam yaus. 19 Mas lub nroog Npanpiloos uas yog lub nroog ci nplas zoo dua lwm lub tebchaws, thiab yog cov Kheedias lub koob meej thiab yog lub chaw uas lawv qhuas ntxhias, mas yuav zoo ib yam li lub moos Xaudoos thiab Kaumaulas rau thaum (יחוח)Yahweh muab rhuav tshem tag. 20 Yuav tsis muaj leejtwg mus nyob hauv Npanpiloos lossis nyob txhua tiam tibneeg. Yuav tsis muaj ib tug Alam mus tsa tsev ntaub rau hauv, thiab tsis muaj ib tug yug yaj yuav coj nws pab yaj mus pw rau qhov ntawd. 21 Tej tsiaj qus yuav pw rau hauv, thiab lawv tej tsev yuav muaj lib nyug nyob puv nkaus, tej noog ntxhuav yuav nyob qhov ntawd, thiab tej dab tshis yuav seev cev yees rau hauv. 22 Tej hma liab yuav quaj nqov hauv tej chaw tsom faj, thiab tej hma ntsuab yuav quaj nqov hauv vajntxwv tej vaj tse zoo nkauj. Lub nroog ntawd li sijhawm twb los ze lawm, thiab nws tej hnub nyoog yuav rub tsis tau ntev lawm.