Zaj Nkauj Qhuas (יחוח)Yahweh

1 Au (יחוח)Yahweh, koj yog kuv Tus Tswv, kuv yuav txhawb nqa koj, kuv yuav qhuas koj lub npe, vim yog koj tau ua tej haujlwm phimhwj uas koj tau npaj tseg cia ntev los lawm, yog tej uas ncaj ncees thiab muaj tseeb.

2 Koj twb ua rau lub nroog pob tag ua tej niag pawg, thiab ua rau lub moos uas muaj ntsa loog ruaj khov pob tag. Lwm haiv neeg tus vajntxwv lub tsev tsis ua lub moos lawm, thiab yuav tsis rov ua dua tshiab.

3 Vim li no tej haiv neeg uas muaj zog yuav qhuas koj, tej tebchaws uas ua nruj ua tsiv tej moos yuav paub ntshai koj, 4 rau qhov koj yog lub chaw ruaj khov rau cov tibneeg pluag, thiab yog lub chaw ruaj khov rau cov tibneeg txom nyem thaum lawv lwj siab. Koj yog lub chaw nraim cua daj cua dub thiab roos tshav ntuj kub. Cov tibneeg ua nruj ua tsiv li pa zoo yam nkaus li cua daj cua dub ntsawj ntsa loog, 5 thiab zoo yam nkaus li tshav ntuj kub hauv lub chaw qhuav. Koj tswj lwm haiv neeg lub suab. Huab roos tshav ntuj kub li cas, cov tibneeg ua nruj ua tsiv lub suab hu nkauj yuav ntsiag zog ib yam li ntawd.

6 Saum lub roob no (יחוח)Yahweh uas muaj hwjchim loj kawg nkaus yuav npaj noj npaj haus rau ib tsoom tibneeg yog tej zoo zaub zoo mov thiab tej cawv txiv hmab zoo zoo, yog tej zoo nqaij zoo qhauv thiab tej kua txiv hmab uas lim zoo zoo lawm.

7 Saum lub roob no (יחוח)Yahweh yuav rhuav tshem daim ntaub npog uas npog ib tsoom tibneeg ntsej muag, yog daim ntaub uas thaiv saum ib tsoom tebchaws. 8 Nws yuav muab txojkev tuag nqos kiag mus ib txhis, (יחוח)Yahweh yuav so ib tsoom tibneeg tej kua muag ntawm lawv lub plhu thiab nws yuav muab qhov uas luag saib tsis taus nws haiv neeg rhuav tshem kom ploj tag hauv lub ntiajteb no mus. (יחוח)Yahweh twb hais cia li no lawm.

9 Hnub ntawd lawv yuav hais tias, saib maj, no yog peb Tus Tswv. Peb twb tos rawv nws xwv nws thiaj cawm peb dim. No yog (יחוח)Yahweh, peb twb tos rawv nws. Cia peb zoo siab xyiv fab rau qhov uas nws cawm peb dim.

10 (יחוח)Yahweh txhais tes yuav nyob saum lub roob no, thiab Mau-as yuav raug muab tsuj pes ntiag hauv nws lub chaw, yam li tsuj quav nyab hauv lub qhov quav chiv.

11 Txawm yog lawv tsa tes hauv lub qhov quav chiv ntawd yam nkaus li tsa tes ua luam dej, los (יחוח)Yahweh yuav muab lawv txojkev khav theeb thiab lawv tej taw tes uas txawj txo mus.

12 Tej lub chaw siab faj xwm ntawm ntsa loog nws yuav muab txo mus, yuav muab tsoo kom pob tag rau hauv pem teb xyaw hmoov av.