(יחוח)Yahweh Haiv neeg Yuav Kov Yeej

1 Hnub ntawd lawv yuav hu zaj nkauj no hauv Yahdah tebchaws. Peb muaj ib lub nroog uas ruaj khov. (יחוח)Yahweh rhawv txojkev cawm dim ua ntsa loog thiab chaw faj xwm. 2 Cia li qheb rooj loog kom lub tebchaws uas ncaj ncees thiab pheej ua raws li lawv twb cog lus tseg lawm thiaj tau nkag los. 3 Au (יחוח)Yahweh, koj yuav pub lub siab tus yees puv npo rau tus uas lub siab ruaj nreeg rau koj, vim nws tso siab rau koj. 4 Cia li tso siab rau (יחוח)Yahweh mus ib txhis rau qhov (יחוח)Yahweh yog txhib zeb uas nyob mus ib txhis tsis kawg.

5 Nws twb txo cov tibneeg uas nyob lub chaw siab, thiab muab lub moos uas siab txo nqes los. Nws muab tsoo kom pob tag rau hauv pem teb xyaw hmoov av. 6 Mas txhua txhais kotaw tsuj, yog cov tibneeg pluag li kotaw thiab cov tibneeg txom nyem li kotaw tsuj. 7 Cov tibneeg ncaj ncees txojkev tiaj tus. Au Tus Tswv uas ncaj ncees, koj ua rau cov ncaj ncees txojkev tiaj du lug. 8 Au (יחוח)Yahweh, peb ua raws li koj txoj kevcai tos rawv koj. Koj lub npe uas muaj koob meej yog qhov uas peb tus ntsuj plig ntshaw heev. 9 Hmo ntuj los kuv lub siab dai dhuam rau koj, kuv tus ntsuj plig kub lug nrhiav ntshis koj, rau qhov thaum koj txiav txim rau tibneeg ntiajteb, tej tibneeg hauv qab ntuj kuj kawm paub koj txojkev ncaj ncees.

10 Yog hlub cov tibneeg limhiam mas lawv yuav tsis kawm paub txojkev ncaj ncees. Lawv nyob hauv lub tebchaws ncaj ncees los lawv tseem ua phem thiab lawv tsis quav ntsej(יחוח)Yahweh lub hwjchim meej mom. 11 Au (יחוח)Yahweh, koj twb tsa koj txhais tes tiamsis lawv pheej tsis pom. Thov cia lawv pom qhov uas koj kub siab lug rau koj haiv neeg thiab cia lawv txaj muag. Thov cia cov hluavtaws uas koj yuav hlawv koj cov yeeb ncuab, hlawv lawv thiab. 12 Au (יחוח)Yahweh, koj pub kom peb tau txojkev thaj yeeb. Ib puas tsav yam uas peb ua tau lawm twb yog koj ua pab peb. 13 Au (יחוח)Yahweh, uas yog peb Tus Tswv, dhau ntawm koj lawm tseem muaj luag lwm tus nom tswv tau kav peb thiab, tiamsis peb tsuas lees paub koj tib leeg lub npe xwb. 14 Lawv twb tuag lawm, lawv yuav tsis muaj txojsia nyob. Lawv nyob tub tuag teb xwb, lawv yuav tsis sawv rov los. Vim yog koj tau los ua kom lawv puam tsuaj thiab tau rhuav tej chaw uas nco txog lawv huvsi. 15 Au (יחוח)Yahweh, koj tau ua rau haiv neeg no huaj vam coob, ua rau haiv neeg no huaj vam tuaj. Koj tau txais lub koob meej zoo kawg nkaus, koj tau nthuav lub tebchaws kom dav ntxiv mus. 16 Au (יחוח)Yahweh, thaum lawv raug txom nyem lwj siab lawv tau nrhiav koj, thaum lawv raug nplawm qhuab qhia, lawv tsa ncauj thov koj tsis tu li. 17 Ib yam li tus pojniam suab menyuam uas ntswj cev qw vim yog mob plab heev, yog thaum uas twb yuav txog caij yug, au (יחוח)Yahweh, peb zoo ib yam li ntawd rau ntawm koj xubntiag. 18 Peb suab menyuam, peb ntswj cev, tiamsis peb tsuas yug tau cua xwb. Peb tsis tau rhawv kev cawm dim rau hauv lub ntiajteb thiab tsis tau yug tibneeg ntiajteb.

19 Koj cov tibneeg uas tuag lawm yuav rov ciaj sia, lawv tej cev tuag yuav sawv rov los. Nej cov uas nyob hauv hmoov av es, cia li tsim dheev thiab hu nkauj vim nej zoo siab. (יחוח)Yahweh, koj cov dej lwg zoo yam nkaus li tej dej lwg thaum sawv ntxov mas lub ntiajteb yuav yug cov uas nyob hauv tub tuag teb rov los.

20 Kuv cov tibneeg, cia li los, cia li nkag rau hauv nej chav tsev thiab kaw qhov rooj rau. Nej cia li mus nraim cev ib ntus mus txog thaum (יחוח)Yahweh kev npau taws dhau lawm. 21 Vim yog (יחוח)Yahweh tabtom tawm ntawm nws lub chaw tuaj yuav rau txim rau tibneeg ntiajteb vim yog lawv tej kev txhaum txim. Mas lub ntiajteb yuav qhia tej ntshav uas los rau saum nws lawm thiab yuav tsis npog cov uas raug tua tuag ntxiv mus lawm.