(יחוח)Yahweh Pab Ixayees Dim

1 Hnub ntawd (יחוח)Yahweh yuav xuas nws rab ntaj uas yog hlau tawv thiab loj thiab muaj hwjchim rau txim rau Leviathas uas yog tus zaj uas txawj txawj khiav, yog Leviathas tus zaj uas nkhaus caj nkhaus cees. (יחוח)Yahweh yuav tua tus zaj uas nyob hauv hiavtxwv.

2 Hnub ntawd (יחוח)Yahweh hais tias, muaj ib lub vaj txiv hmab uas ntxim siab, cia li hu nkauj txog lub vaj ntawd.

3 Kuv uas yog (יחוח)Yahweh tsom kwm lub vaj ntawd, kuv ywg dej txhua lub sijhawm. Ntshai tsam muaj lwm tus ua phem rau lub vaj kuv thiaj zov tag hnub tag hmo.

4 Kuv tsis npau taws rau lub vaj. Kuv xav kom muaj pos kaus ntsaj pos kaus ntsim tuaj tawm tsam kuv, kuv thiaj tau ua rog rau lawv thiab muab lawv hlawv pov tseg huvsi.

5 Lossis cia lawv nyob hauv kuv qab kev tsom kwm, cia lawv cog lus nrog kuv sib raug zoo, cia lawv cog lus nrog kuv sib raug zoo los maj.

6 Lwm hnub tom hauv ntej Yakhauj yuav ntsia cag tob, Ixayees yuav tawg paj hlav ntsuag thiab txi txiv puv nkaus lub ntiajteb.

7 (יחוח)Yahweh tau nplawm lawv yam nkaus li uas nws nplawm cov uas tau nplawm lawv lawm lov? Lossis lawv raug muab tua yam nkaus li cov uas tua lawv raug muab tua lawm lov?

8 Qhov uas muab ntiab khiav mus thiab qhov uas muab kuav kiag mus poob tebchaws twb yog (יחוח)Yahweh tawm tsam lawv. (יחוח)Yahweh tej cua uas hlob heev ntsawj lawv mus zoo yam li hnub uas cua ntsawj sab hnub tuaj tuaj.

9 Ua li no thiaj ntxuav tau Yakhauj ‎tej kev txhaum txim, thiab zam kiag tau nws lub txim huvsi, yog thaum nws ua rau tej pob zeb uas ua lub thaj xyeem dab zoo yam nkaus li tej pob zeb phom phom uas muab tsoo mos nyoos tag, yuav tsis tshuav tej ncej dab Aselas lossis tej thaj hlawv hmoov xyab nyob kiag li.

10 Rau qhov lub nroog uas muaj ntsa loog ruaj khov kuj tsis muaj tibneeg nyob lawm, tej chaw nyob kuj muab tso tseg nyob do cuas ib yam nkaus li tebchaws moj sab qhua. Menyuam nyuj kuj noj zaub qhov ntawd, thiab pw qhov ntawd thiab noj tej nplooj ntawm tej ceg ntoo du lug.

11 Thaum tej ceg ntoo qhuav lawm, kuj lov mas cov pojniam tuaj khaws coj mus rauv. Cov no yog ib co tibneeg uas tsis thoob tsib. Yog li ntawd tus uas tsim lawv yuav tsis khuvleej lawv, tus uas muab lawv puab yuav tsis hlub lawv lawm.

12 Hnub ntawd (יחוח)Yahweh yuav ntaus txij ntua tus dej Yufetis mus txog ntawm tus dej Iziv ib yam li ntaus qoob. Cov Ixayees es, nej yuav raug muab sau zog ib tug zuj zus los.

13 Thiab hnub ntawd luag yuav tshuab lub raj xyu loj hu, mas cov tibneeg uas tabtom yuav puam tsuaj hauv Axilias tebchaws thiab cov uas raug muab ntiab khiav mus rau Iziv tebchaws, yuav rov los pe hawm (יחוח)Yahweh saum lub roob Dawbhuv ntawm Yeluxalees.