Ntuas Efa‑is

1 Lub mom kub uas Efa‑is cov tibneeg uas qaug cawv khav ntxhias yuav raug txom nyem lauj! Lawv tej paj ntoo zoo zoo nkauj uas tabtom zeeg uas nyob saum lub roob uas yog lub hauv hav uas av zoo heev, yog cov uas cawv txiv hmab kov yeej lawm lub nroog, yuav raug txom nyem lauj! 2 Saib maj, (יחוח)Yahweh muaj ib tug uas muaj hwjchim thiab muaj zog. Ib yam nkaus li cua daj cua dub nrog lawg, yog cua daj cua dub uas ua kom puam tsuaj, thiab yam li tej nag xob nag cua uas ntws nyab kiag, mas tus ntawd yuav ua nruj ua tsiv muab laim pes ntiag rau hauv pem teb ib yam li ntawd. 3 Lub mom kub uas Efa‑is cov tibneeg uas qaug cawv khav ntxhias yuav raug muab tsuj rau hauv xib taws. 4 Lub paj ntoo zoo zoo nkauj uas tabtom zeeg uas nyob saum lub roob uas yog lub hauv hav uas av zoo heev yuav zoo yam li thawj phaum txiv cev uas siav ua ntej lub caij ntuj kub, thaum leejtwg pom kuj noj kiag tsuav yog txog nws txhais tes. 5 Hnub ntawd (יחוח)Yahweh uas muaj hwjchim loj kawg nkaus yuav ua lub mom kub uas muaj meej kawg thiab ua lub mom paj ntoo zoo nkauj kawg rau nws haiv neeg uas tseem tshuav nyob. 6 Nws yuav ua txojkev ncaj ncees rau tus uas nyob saum lub rooj txiav txim, thiab nws yuav ua lub zog rau cov uas ua rau yeeb ncuab tig kiag ntawm rooj loog mus.

​

Ntuas Thiab Cog Lus Rau Yeluxalees

7 Cov no los kuj qaug cawv txiv hmab ua yoj yuj yees, thiab qaug cawv ntxwg ua pig ua poog. Txawm yog cov pov thawj thiab cov xibhwb cev (יחוח)Yahweh lus los kuj qaug cawv ntxwg ua yoj yuj yees, lawv qaug cawv txiv hmab tsis meej pem tag, kuj qaug cawv ntxwg ua pig ua poog. Lawv thiaj ua yog toog pom yuam kev thiab tsis txawj tu plaub, 8 rau qhov txhua lub rooj noj tsuas puv nkaus ntuav, tsis muaj ib qho uas yuav tsis qias li.

9 Tus ntawd yuav qhia kev txawj ntse rau leejtwg? Nws yuav qhia (יחוח)Yahweh tej xov rau leejtwg? Yuav qhia rau cov menyuam uas nyuam qhuav tseg mis lov? Lossis qhia rau cov uas nyuam qhuav ncaim hauv xubntiag lov? 10 Rau qhov nws qhia zuj zus ib txoj ib txoj kevcai, nws qhia zuj zus ib kab ib kab, ib qho me me ib qho mentsis. 11 Tsis yog li ntawd, (יחוח)Yahweh yuav siv lwm yam lus hais rau cov tibneeg no thiab siv lwm haiv neeg lub qhov ncauj hais. 12 Nws twb hais rau lawv cov tias, no yog qhov chaw tau so, yog lub chaw uas cov tibneeg txog siav tau so, thiab yog lub chaw uas so los siav. Los lawv tsis yeem mloog. 13 Vim li ntawd (יחוח)Yahweh tej lus thiaj zoo li no rau lawv, nws qhia zuj zus ib txoj ib txoj kevcai, nws qhia zuj zus ib kab ib kab, ib qho me me ib qho mentsis, xwv lawv thiaj li mus thiab thim rov qab thiab tawg tag, thiab mag hlua thiab raug ntes. 14 Vim li no nej cov uas pheej nyiam thuam luag, uas yog cov thawj uas kav cov tibneeg no hauv Yeluxa-lees, cia li mloog (יחוח)Yahweh tej lus.

15 Nej tau hais tias, peb twb nrog kev ploj kev tuag cog lus cia lawm thiab nrog tub tuag teb hais haum‎. Thaum tej vij sub vij sw uas loj kawg hla los mus yuav tsis raug peb, rau qhov peb ua tej lus dag ntxias los tsom kwm peb thiab peb tau chaw nraim rau hauv txojkev dag. 16 Vim li no (יחוח)Yahweh thiaj li hais tias, saib maj, kuv teeb ib lub pob zeb rau hauv Xi‑oo ua lub chaw tiag taw, yog ib lub pob zeb uas muab sim lawm zoo heev yog ua lub thawj pob zeb ntawm kaum tsev ua lub chaw tiag taw uas ruaj khov. Tus uas tso siab rau yuav tsis raug kev ntxhov siab. 17 Kuv yuav muab txojkev ua ncaj ua hlua ntsuas thiab muab txojkev ncaj ncees ua lub qe hlau uas ntsuas qhov ntseg. Thiab lawg yuav kuav kiag txojkev dag ntxias uas tsom kwm lawv mus, thiab dej yuav nyab kiag lub chaw uas lawv nraim cev. 18 Mas tej lus uas nej nrog kev ploj kev tuag cog tseg yuav raug muab rhuav tag, thiab tej uas nej nrog tub tuag teb hais haum‎ yuav tsis muaj lawm. Thaum tej vij sub vij sw uas loj kawg hla los mus, nej yuav raug muab tsuj pes ntiag. 19 Vij sub vij sw hla los pes tsawg zaus yuav los sau nej mus, nws yuav niaj tagkis hla los thiab niaj hnub niaj hmo los. Thaum nkag siab tej xov no yuav muaj kev txhawj kev ntshai heev kawg li.

20 Rau qhov lub txaj pw lov tsis txaus xyab cev rau saud daim pam kuj nqaim tsis txaus vov. 21 (יחוח)Yahweh yuav sawv tsees yam li thaum uas nws sawv saum lub roob Pelaxis, thiab nws yuav npau taws ib yam li thaum npau hauv lub hav Kinpe‑oos, xwv nws thiaj ua tau nws tej haujlwm uas phimhwj kawg, thiab ua nws tej haujlwm uas txawv txawv.

22 Vim li no tsis txhob thuam luag, tsam txoj saw hlau yimhuab khi nej ruaj, rau qhov kuv tau hnov (יחוח)Yahweh uas muaj hwjchim loj kawg nkaus tej lus txiav txim uas yuav ua kom lub tebchaws puam tsuaj huvsi. 23 Cia li tig pob ntseg mloog kuv lub suab, cia li ua tib zoo mloog tej lus uas kuv hais. 24 Tus uas laij teb cog qoob nws pheej laij mus li xwb lov? Nws pheej tsoo tej pob av thiab muab sua ib txhis li xwb lov? 25 Thaum nws muab cov av pheej tiaj lawm nws tseb zaub txhwb qaib zaub txhwb nyug, thiab cog mog ua tej kwb kab thiab cog qeb rau tej thaj uas ntxim thiab tseb txhuv daj raws tej ntug teb.

26 (יחוח)Yahweh twb qhia nws paub raug kev raug cai lawm, yog nws Tus Tswv qhia rau nws. 27 Nws tsis siv thob faus ntaus zaub txhwb qaib, thiab tsis muab faus tsheb dov luam noob zaub txhwb nyug. Tiamsis nws muab rab pas me me nplawm noob zaub txhwb qaib, thiab muab pas nplawm noob zaub txhwb nyug. 28 Leejtwg yuav muab tej mog ua ncuav ntaus ua txhuv tawg tag? Yeej tsis muaj li, nws yuav tsis muab ntaus tsis tseg mus li. Thaum nws muab faus tsheb nees luam qoob nws tsis muab luam kom ntsoog. 29 Tej no yog los ntawm (יחוח)Yahweh uas muaj hwjchim loj kawg nkaus. Tej uas nws taw qhia tseem ceeb kawg thiab nws muaj tswvyim zoo kawg nkaus.