Tsis Txhob Tso Siab Rau Iziv

1 (יחוח)Yahweh hais tias, tej tub ki uas pheej fav xeeb yuav raug txom nyem lauj! Lawv ua raws li tej hom phiaj uas lawv npaj tseg tiamsis tsis yog tej uas kuv npaj rau lawv. Lawv nrog luag sib cog lus tiamsis tsis yog raws li kuv lub siab. Lawv thiaj ua kev txhaum tsub kev txhaum ntxiv ntau zuj zus.

2 Lawv tawm mus rau Iziv tiamsis tsis tau thov kev sablaj ntawm kuv, lawv thiaj mus nraim cev rau hauv Falaus kom tsom kwm lawv thiab nrhiav chaw nraim cev rau hauv Iziv tus duab ntxoov ntxoo. 3 Vim li no qhov uas Falau stsom kwm nej yuav ntxeev rov ua rau nej txaj muag, thiab qhov uas nej nraim rau hauv Iziv tus duab ntxoov ntxoo yuav ntxeev ua rau nej poob ntsej muag. 4 Txawm yog lawv cov nom tswv mus txog lub moos Xau‑as thiab lawv cov tubtxib mus txog Hane lawm, 5 los lawv txhua tus puavleej raug txaj muag, vim cov tibneeg uas tsis muaj qabhau rau lawv, yog cov uas pab tsis tau lawv thiab tsis muaj qabhau rau lawv, tsuas yog coj mus raug txaj muag thiab poob ntsej muag xwb. 6 Tej lus uas hais txog tsiaj qus hauv Nekes. Cov Yahdah tej nom tswv xuas nees luav thauj lawv tej nyiaj txiag thiab lawv thauj lawv tej cuab txhiaj cuab tam saum ntxhuav lub ntsov taug kev hla lub tebchaws uas ceeblaj kawg thiab nyuaj kawg nkaus, uas muaj maum tsov ntxhuav txiv tsov ntxhuav, muaj tej nab muaj taug thiab muaj zaj txawj ya nyob, mus txog ib haiv neeg uas tsis muaj qabhau rau lawv, 7 rau qhov Iziv txojkev pab, pab tsis tau thiab tsis muaj qabhau kiag li. Kuv thiaj hu nws hais tias, lahaj tus uas nyob dawb. 8 Nimno koj cia li mus muab sau rau hauv daim txiag tab meeg lawv thiab sau rau hauv ntawv, npaj rau tom hauv ntej ua timkhawv mus ib txhis. 9 Vim lawv yog ib haiv neeg uas pheej fav xeeb, yog menyuam txawj dag, thiab yog menyuam tsis kam mloog (יחוח)Yahweh tej lus qhia. 10 Lawv hais rau cov xibhwb uas hais pom tom hauv ntej tias, tsis txhob pom lawm, thiab hais rau cov xibhwb cev (יחוח)Yahweh lus tias, tsis txhob cev qhia tej lus uas raug cai rau peb li lawm. Cia li hais tej uas ntxim peb siab thiab cia li cev tej lus cuav rau peb xwb. 11 Cia li txav kev thiab khiav ntawm txojkev no mus, nej tsis txhob hais txog Ixayees Tus Tswv uas Dawb huv rau peb hnov dua li lawm. 12 Vim li no Ixayees Tus Tswv uas Dawbhuv hais li no tias, vim nej saib tsis taus tej lus no thiab tso siab rau txojkev quab yuam thiab txojkev dag ntxias, thiab vam khom tej ntawd, 13 vim li no txojkev txhaum txim no yuav raug nej yam nkaus li lub ntsa loog siab uas tawg pleb thiab qaij tag twb yuav pob mas tib ntsais muag xwb yuav pob tag, 14 yuav tawg yam nkaus li lub laujkaub av uas luag muab tsoo tawg rhe tsis khuvleej li. Tej dwb daim uas tawg ntawd nrhiav tsis tau ib daim uas zoo yawm ncaig taws hauv qhov cub thiab ntaus dej hauv qhov li. 15 (יחוח)Yahweh uas yog tus Dawbhuv hauv cov Ixayees hais li no tias, yog nej tig rov qab thiab so, nej yuav dim, qhov uas nej nyob twjywm thiab kev tso siab yuav ua rau nej muaj zog. Tiamsis nej tsis kam ua li ntawd.

16 Nej hais tias, peb tsis ua li ntawd, peb yuav caij nees khiav mus. Vim li ntawd nej kuj yuav khiav mus. Nej hais tias, peb yuav caij nees sai kawg li, vim li ntawd cov uas caum nej yuav caum sai kawg thiab. 17 Ib leeg hem xwb, yuav khiav tag ib txhiab leej, tsib leeg hem xwb, nej yuav khiav tag, tsuas yog tshuav nej nyob zoo li tus ncej chij saum lub ncov roob thiab zoo li lub chaw ntaus cim rau saum pov roob.

​

(יחוח)Yahweh Yuav Foom Koob Hmoov Rau Nws Haiv neeg

18 (יחוח)Yahweh tos nrhw yuav hlub nej, vim li no nws sawv tsees khuvleej nej.

(יחוח)Yahweh yog Tus Tswv uas txiav txim ncaj. Txhua tus uas tos nws yuav tau koob hmoov. 19 Cov tibneeg uas nyob hauv Xi‑oo thiab nyob hauv Yeluxalees es, nej yuav tsis quaj dua li lawm. Thaum (יחוח)Yahweh hnov nej lub suab thov hu, nws yeej yuav hlub nej. Thaum nws hnov nws yuav teb nej. 20 Txawm yog (יחוח)Yahweh pub tej zaub mov uas yog txojkev txom nyem rau nej noj thiab pub dej uas yog txojkev nyuaj siab rau nej haus, los nej tus xibhwb tsis khiav nkaum lawm, nej lub qhov muag yuav pom nws. 21 Thaum nej tig rau sab xis lossis tig rau sab laug, nej lub qhov ntsej yuav hnov lus tom nej nrob qaum hais tias, no yog txojkev ntag, cia li taug txojkev no. 22 Thaum ntawd nej yuav muab tej dab mlom uas txaug thiab luam nyiaj thiab tej dab mlom uas nchuav thiab luam kub ua kom qias puas tsuas. Nej yuav muab laim pov tseg yam nkaus daim ntaub so uas qias tsis huv thiab yuav ntiab hais tias, cia li khiav kom ploj ntais mus.

23 (יחוח)Yahweh yuav pub nag los rau tej noob qoob uas nej tseb rau hauv av, thiab pub qoob loo tawm hauv av tuaj, uas yuav zoo heev thiab tau qoob ntau. Hnub ntawd nej tej nyuj yuav noj zaub hauv lub tshav uas dav heev, 24 thiab tej nyuj tej nees luav uas nej laij teb yuav tau noj tej qoob xyaw ntsev uas xuas duav phuaj duav suam tov. 25 Yuav muaj dej cag ntws nto saum txhua lub roob siab thiab saum tej pov roob siab txhua qhov rau hnub uas muaj kev sib tua heev thiab tej chaw tsom faj pob tag. 26 Heev dua li ntawd, hnub uas (יחוח)Yahweh qhwv nws haiv neeg tej qhov mob thiab kho lawv tej qhov txhab uas lawv raug (יחוח)Yahweh nplawm ntawd, mas lub hli yuav ci yam nkaus li lub hnub, thiab lub hnub yuav ci xya npaug ntxiv mas yuav ci yam nkaus li xya hnub.

​

(יחוח)Yahweh Yuav Rau Txim Rau Axilias

27 Saib maj, (יחוח)Yahweh lub npe tuaj deb deb tuaj, nws txojkev chim kub lug ua pa ncho tsaus nti nce sawv siab rau saud. Nws lub qhov ncauj npau taws puv nkaus, thiab nws tus nplaig zoo yam nkaus li nplaim taws hlawv du lug. 28 Nws tus pa zoo yam nkaus li tus dej uas nyab kiag txij nkaus caj dab. Mas yuav muab ib tsoom tebchaws tshau hauv lub vabtshaus uas yog kev puam tsuaj thiab yuav muab ib txoj xauv los sam ib tsoom tibneeg lub qhov ncauj coj lawv mus yuam kev. 29 Nej yuav muaj zaj nkauj hu zoo yam li hmo uas muaj kevcai tseem ceeb, thiab zoo siab yam nkaus li cov uas nrog lub suab raj mus rau (יחוח)Yahweh lub roob, mus kom txog tus uas yog Ixayees txhib zeb. 30 Mas (יחוח)Yahweh yuav ua kom hnov nws lub suab uas muaj hwjchim loj kawg thiab ua kom pom nws txhais tes tabtom nplawm ua npau taws heev, yuav muaj nplaim taws hlawv du lug nrog nag xob nag cua thiab cua daj cua dub thiab lawg. 31 Cov Axilias yuav ntshai (יחוח)Yahweh lub suab kawg nkaus li. Nws yuav xuas nws tus pas nrig nplawm lawv. 32 Txhua nplawm uas (יחוח)Yahweh rau txim nplawm lawv, yuav muaj suab nruas npuaj thiab suab nkauj nog ncas nrov ntsoog qees. Nws yuav tsa kiag tes ua rog ntaus lawv. 33 Twb npaj lub chaw hlawv cia ntev los lawm, yog npaj hlawv Axilias tus vajntxwv, lub chaw kuj tob thiab dav muaj hluavtaws thiab taws ntau heev. (יחוח)Yahweh tus pa zoo yam nkaus li nplaim lawj faj zes taws hlawv.