Tsis Ttxhob Ttso Siab Rau Iziv

1 Cov uas mus thov kev pab rau nram Iziv tebchaws yuav raug txom nyem lauj! Lawv vam khom tej nees thiab tso siab rau tej tsheb ua rog uas muaj ntau, thiab tso siab rau tej tub rog caij nees uas muaj zog heev. Lawv tsis vam khom tus Dawbhuv hauv cov Ixayees lossis ua nug rau (יחוח)Yahweh.

2 Txawm yog li ntawd los nws tseem muaj tswvyim thiab nws tso tau kev puam tsuaj los. Nws tsis thim nws tej lus. Nws yuav sawv tsees tawm tsam cov tibneeg ua phem thiab tawm tsam cov uas pab cov tibneeg ua txhaum. 3 Cov Iziv yog tibneeg xwb tsis yog (יחוח)Yahweh, lawv tej nees yog nqaij tawv xwb tsis yog ntsuj plig.

Thaum uas (יחוח)Yahweh tsa hlo nws txhais tes, tus uas pab yuav dawm, tus uas tau kev pab yuav ntog, mas ob tog yuav puam tsuaj tag ua ke. 4 (יחוח)Yahweh hais li no rau kuv hais tias, Zoo li tus tsov ntxhuav l ossis thav tsov ntxhuav uas nyooj laws saum tus tsiaj uas nws tom tau. mas thaum luag hu ib pab tibneeg yug yaj tuaj tiv nws mas nws tsis ntshai lawv tej suab qw thiab tsis ntshai lawv tej suab uas nrov ntsoog qees, ib yam li ntawd (יחוח)Yahweh uas muaj hwjchim loj kawg nkaus yuav nqes los ua rog rau saum lub roob Xi‑oo thiab saum tej pov roob. 5 Tej noog yuj tsom kwm menyuam li cas, (יחוח)Yahweh uas muaj hwjchim loj kawg nkaus yuav tsom kwm Yeluxalees ib yam li ntawd. Nws yuav tsom kwm thiab pab kom dim, nws yuav hla kom dhau thiab cawm kom dim.

6 Cov Ixayees es, cia li tig rov qab los cuag tus uas nej tau fav xeeb lawm. 7 Vim hnub ntawd txhua tus yuav muab nws tej dab mlom nyiaj dab mlom kub uas nej txhais tes ua txhaum ua los rau nej, tso pov tseg. 8 Thiab cov Axilias yuav tuag rau hniav ntaj tiamsis tsis yog tibneeg li hniav ntaj, thiab rab ntaj uas tsis yog tibneeg li ntaj yuav ua kom lawv puam tsuaj. Lawv yuav khiav hniav ntaj thiab lawv tej tub hluas yuav raug quab yuam ua haujlwm. 9 Lawv lub chaw ruaj khov yuav muaj kev ntshai heev thiab ploj tag, thiab cov thawj tub rog yuav tso tus chij tseg khiav ras zom zaws. (יחוח)Yahweh uas muaj hluavtaws nyob hauv Xi‑oo thiab cub hluavtaws nyob hauv Yeluxalees hais li no ntag.