Tus Vajntxwv Ncaj Ncees

1 Saib nawj, yuav muaj ib tug vajntxwv kav ncaj ncees, thiab cov thawj yuav txiav txim ncaj. 2 Lawv txhua tus yuav zoo yam nkaus li lub chaw nraim cua, yog lub chaw uas roos cua daj cua dub, zoo yam li tus dej cag hauv teb qhua, thiab zoo yam li tus duab ntxoov ntxoo ntawm txhib zeb uas loj heev hauv tebchaws qhuav nkig nkuav.

3 Thaum ntawd cov uas lub qhov muag pom kev yuav tsis qe muag, cov uas lub qhov ntsej mloog yuav tau hnov. 4 Cov uas lub siab heev yuav txawj ntse, cov uas tus nplaig nrhiav nrhiav lus yuav hais lus meej nriav nrawm nroos. 5 Luag yuav tsis hu tus tibneeg ruam tias yog tibneeg tsim txiaj, thiab yuav tsis hu tus uas siab nkhaus tias yog tibneeg ncaj dua li lawm. 6 Tus tibneeg ruam yeej hais tej lus ruam thiab nws lub siab kuj ntaus tswvyim ua txhaum, nws ua tej kev phem thiab hais tsis tseeb txog (יחוח)Yahweh, nws ua rau cov uas tshaib tseem yoo thiab nkaum tes tsis pub rau cov uas nqhis tau haus. 7 Tus tibneeg siab nkhaus tej tswvyim phem kawg, nws xav tswv yim phem hais lus dag ua rau cov pluag puam tsuaj, txawm yog cov pluag tej lus thov raug cai kuj xij. 8 Tus tibneeg tsim txiaj xav ua yam uas zoo xwb, nws nyob ruaj vim qhov uas nws ua zoo.

Ntuas Cov Pojniam Hauv Yeluxalees

9 Nej cov pojniam uas tau zoo nyob, cia li sawv tsees, thiab mloog kuv hais. Nej cov ntxhais uas tsis txhawj abtsi li, cia li tig ntsej mloog kuv tej lus. 10 Nej cov pojniam uas tsis txhawj abtsi li, tshuav ib xyoos ntau xwb nej yuav ceeb tshee hnyo, vim tej vaj txiv hmab yuav tsis txi txiv, lub caij sau txiv yuav los tsis txog nej. 11 Nej cov pojniam uas tau zoo nyob, cia li tshee hnyo, nej cov uas tsis txhawj abtsi li, cia li ceeb tshee hnyo lauj! Cia li hle tsoos tsho nyob liab qab, thiab muab khaub seev tsaj los npua ntawm duav. 12 Cia li ntaus hauv siab txog tej teb uas zoo zoo thiab tej txiv hmab uas txi ncw, 13 thiab txog kuv haiv neeg tej av uas tuaj pos kaus ntsaj pos kaus ntsim, thiab tej vaj tse uas xyiv fab hlo hauv lub nroog uas lomzem. 14 Rau qhov vajntxwv lub tsev yuav raug muab tso tseg, lub nroog uas muaj tibneeg nyob coob yuav tsis muaj tibneeg nyob lawm, lub roob thiab tej chaw tsom faj yuav nyob do cuas mus ib txhis, yuav ua nees luav qus lub chaw hom khaj, thiab ua tshav zaub rau tej yaj tej tshis nog, 15 mus txog thaum hliv Tus Ntsuj Plig Dawbhuv saum ntuj los rau peb, thiab tebchaws moj sab qhua yuav ntxeev ua teb ntsu qoob, thiab tej teb zoo qoob yuav ntom nti li hav zoov. 16 Thaum ntawd kev ua ncaj yuav nyob hauv tebchaws moj sab qhua, thiab txojkev ncaj ncees yuav nyob hauv tej teb ntsu qoob. 17 Qhov uas ua ncaj ncees yuav ua rau muaj kev thaj yeeb, thiab txojkev ncaj ncees yuav ua kom nyob tus yees tso siab plhuav mus ib txhis. 18 Kuv haiv neeg yuav nyob kaj siab lug rau hauv lub tsev uas tso siab plhuav thiab so hauv lub chaw tus yees. 19 Yuav los lawg ua rau hav zoov piam tag, thiab lub nroog yuav raug muab tshem pob tag,

20 los nej cov uas tseb noob ntawm ntug dej, thiab tso nyuj thiab nees luav nyob kab ntsab yuav tau nyob kaj siab lug.