(יחוח)Yahweh Yuav Cawm Dim

1 Koj uas ua kom puam tsuaj es, koj tsis tau raug kev puam tsuaj los koj yuav raug txom nyem lauj! Koj yog tus uas fav xeeb, tiamsis tsis tau muaj leejtwg fav xeeb rau koj. Thaum koj tseg tsis ua kom puam tsuaj, koj yuav raug puam tsuaj, thaum koj tseg tsis fav xeeb lawd, luag yuav fav xeeb rau koj. 2 Au (יחוח)Yahweh, thov koj hlub peb, peb tos rawv koj. Thov koj ua peb txhais npab rau txhua tagkis, thiab cawm peb dim rau lub sijhawm uas raug ceeblaj. 3 Thaum hnov koj lub suab nroo ntws ib tsoom tibneeg cia li khiav, thaum koj sawv tsees, ib tsoom tebchaws khiav ri sua. 4 Tej uas txeeb tau los raug muab sau zog ua ke ib yam li kab muab sau zog ua ke. Tej tibneeg kuj dhia caws qia mus huas ib yam li kooj txig dhia caws qia.

5 (יחוח)Yahweh raug qhuas ntxhias vim nws nyob lub chaw siab, nws pub txojkev ua ncaj thiab txojkev ncaj ncees puv nkaus Xi‑oo.

6 Nws yuav ua nej lub chaw ruaj khov rau nej lub caij nyoog, thiab yuav ua txojkev dim thiab tswvyim thiab kev txawj ntse nplua mias rau nej. Qhov uas hwm thiab paub ntshai (יחוח)Yahweh yog yam uas tsim txiaj kawg. 7 Saib nawj, cov uas siab loj siab tuab nyob sab nraud taij hu, cov uas cheem kom sib haum‎ xeeb kuj quaj lwj siab ntsuav. 8 Tej niag kev kuj nyob ntsiag to, tsis muaj tibneeg mus mus los los lawm. Tej lus cog tseg raug muab rhuav pov tseg, cov uas ua timkhawv raug saib tsis taus, tej tibneeg tsis muaj leejtwg hwm. 9 Lub tebchaws quaj ntsuag thiab ntaug zog zuj zus, Lenpanoos poob ntsej muag thiab qhuav zuj zus mus. Lub vos hav Saloos zoo yam nkaus ntuj nrag teb do, Npasas thiab lub roob Khamees zeeg nplooj tag.

10 (יחוח)Yahweh hais tias, nimno kuv yuav sawv tsees, nimno kuv yuav raug qhuas ntxhi-as, nimno kuv yuav raug luag thiaj. 11 Nej xeeb npluag qoob rau hauv plab, thiab nej yug tau quav nyab xwb. Nej tej pa zoo li tej nplaim taws uas yuav hlawv nej kub hnyiab tag huvsi.

12 Ib tsoom tibneeg yuav zoo li raug muab hlawv ua hmoov zeb sib, thiab zoo li tej hav pos uas raug muab txiav hlawv pov tseg. 13 Nej cov uas nyob deb, cia li mloog saib kuv tau ua li cas, nej cov uas nyob ze, cia li lees paub kuv lub hwjchim.  14 Cov tibneeg muaj txim hauv Xi‑oo kuj ntshai, cov uas tsis hwm (יחוח)Yahweh kuj ceeb tshee hnyo. Peb cov leejtwg yuav nrog nplaim taws kub ceev nyob tau ua ke? Peb cov leejtwg yuav nrog tej hluavtaws uas kub mus ib txhis nyob tau ua ke? 15 Tus uas ua lub neej ncaj ncees thiab hais lus raug cai, thiab tsis nyiam tej uas quab yuam luag li lus, thiab nkaum tes tsis txais tej nyiaj xiab, thiab ntsaws qhov ntsej tsis mloog tej lus uas ntaus tswvyim ua kom los ntshav, thiab qe muag tsis saib tej kev phem, 16 mas tus ntawd yuav tau nyob saum lub chaw siab, nws lub chaw nraim cev yog lub chaw ruaj khov uas xuas pob zeb ua, nws yuav tau mov noj thiab yuav tsis txhawj dej haus. 17 Koj lub qhov muag yuav pom tus vajntxwv muaj meej mom, thiab pom lub tebchaws uas nthuav dav. 18 Koj lub siab yuav xav txog txojkev ntshai thaum ub, hais tias, tus uas txheeb npe dua twg lawm? Tus uas luj tej se nyob qhovtwg? Tus uas tshuaj saib tej chaw tsom faj nyob qhovtwg lawm? 19 Koj yuav tsis pom haiv neeg uas khav theeb dua li lawm, yog haiv neeg uas hais lus tsis meej uas koj mloog tsis tau, thiab hais lwm yam lus uas koj tsis nkag siab. 20 Cia li tsa muag ntsia Xi‑oo, yog lub nroog uas peb coj tej kevcai raws li teem cia. Koj lub qhov muag yuav pom Yeluxalees, yog lub chaw nyob tus yees, yog lub tsev ntaub uas yuav tsis muab tshais chaw, tej tswg uas rub lub tsev ntaub yuav tsis muab rho li, thiab tej hlua tsa tsev yuav tsis tu ib txoj li.

 21 (יחוח)Yahweh yuav muaj hwjchim meej mom nrog peb nyob qhov ntawd, qhov ntawd muaj tej dej cag thiab tej niag dej dav, tsis muaj tej nkoj loj uas nquam duav phuaj mus, tsis muaj nkoj txwg zoo nkauj hla mus.

22 Rau qhov (יחוח)Yahweh yog tus uas tu plaub rau peb, (יחוח)Yahweh yog tus uas kav peb, (יחוח)Yahweh yog peb tus Vajntxwv, nws yuav cawm peb dim. 23 Koj tej hlua rub daim ntaub hauv nkoj taug, mas rub tsis tau tus ncej nyob ruaj thiab rub tsis tau daim ntaub dav. Thaum ntawd tej uas lws thiab txeeb tau los ntau ntau yuav raug muab faib, txawm yog tej tibneeg ceg tawv kuj yuav muab tau los. 24 Tsis muaj ib tug uas nyob hauv lub tebchaws yuav hais tias, kuv mob lawm. Cov tibneeg uas nyob qhov ntawd yuav tau txais kev zam txim.