Cov Ixayees Rov Tau Nyob Hauv Yeluxalees Zoo Siab Kawg

1 Tebchaws moj sab qhua thiab qhov chaw uas qhuav nkig nkuav yuav zoo siab, tej ntuj nrag teb do yuav xyiv fab thiab tawg paj. Yam nkaus li tsob qoov tawg paj.

2 Mas ntuj teb do yuav tawg paj puv nkaus li ntawd thiab yuav xyiv fab zoo siab hu nkauj. Yuav muab Lenpanoos lub koob meej, thiab yuav muab Khamees thiab Saloos tej kev zoo nkauj rau lub tebchaws ntawd. Lawv yuav pom (יחוח)Yahweh lub hwjchim ci ntsa iab, uas yog peb Tus Tswv li hwjchim meej mom.

3 Cia li txhawb txhais tes uas tsaug lub zog thiab ua rau lub hauv caug uas tsaug leeg muaj zog tuaj.

4 Cia li hais rau tus uas siab yau tias, Cia li ua siab tuab tsis txhob ntshai. Saib maj, nej Tus Tswv yuav los ua pauj, nws yuav los ua pauj rau lawv, nws yuav los cawm nej dim.

5 Mas tus tibneeg dig muag yuav pom kev, tus tibneeg lag ntseg yuav hnov lus.

6 Tus tibneeg ceg tawv yuav dhia caws qia yam li muas lwj, tus tibneeg uas hais tsis tau lus tus nplaig yuav hu nkauj xyiv fab hlo. Dej yuav txhawv hauv tebchaws moj sab qhua thiab yuav txhawv dej ntws hauv ntuj nrag teb do,

7 tej nras xuab zeb uas kub kub yuav ntxeev ua pas dej, thiab tej av qhuav nkig nkuav yuav ntxeev ua qhov dej txhawv. Hauv tej chaw uas hma nkaum pwnyom thiab pias iav thiab tauj deg yuav tuaj.

8 Yuav muaj ib txoj niag kev hla tebchaws ntawd, yuav hu txojkev ntawd tias, Txojkev Dawbhuv, rau (יחוח)Yahweh cov tibneeg. Cov tibneeg qias tsis huv yuav tsis taug txojkev ntawd, thiab cov tibneeg ruam uas taug txojkev ntawd los yuav tsis yuam kev.

9 Tsis muaj ib tug tsov ntxhuav nyob hauv txojkev ntawd thiab tsis muaj ib tug tsiaj nyaum taug txojkev ntawd, yuav tsis pom muaj kiag li, tiamsis cov uas twb txhiv dim lawm yuav taug txojkev ntawd.

10 (יחוח)Yahweh cov tibneeg uas twb txhiv dim lawm yuav rov qab los, thiab yuav hu nkauj laws losrau hauv Xi‑oo. Txojkev xyiv fab yuav nyob rau saum lawv lub taub hau mus ib txhis tsis kawg. Lawv yuav tau txojkev xyiv fab thiab txojkev zoo siab, mas txojkev xyu thiab kev lwj siab yuav ploj ntais mus.