Xenakhawlis Tuaj Ntaus Yeluxalees

1 Xyoo kaum plaub uas Hexekhiyas ua vajntxwv kav mas Axilias tus vajntxwv Xenakhawlis tuaj ntaus Yahdah txhua lub moos uas muaj ntsa loog ruaj khov mas txeeb tau huvsi. 2 Axilias tus vajntxwv txib Lasakhes coj ib pab tub rog coob tawm ntawm lub moos Lakhis mus rau ntawm vajntxwv Hexekhiyas hauv Yeluxalees Mas nws mus sawv ntawm tus ciav dej uas tso dej tawm ntawm lub pas sab ped los, yog ntawm txojkev uas mus rau daim teb Ntxhua Xov.

3 Hikhiyas tus tub Eliyakhis uas yog tus saib xyuas vajntxwv lub tsev thiab Senas uas yog tus tub sau ntawv thiab Axas tus tub Yau‑av uas yog tus uas sau ntaub ntawv keeb kwm, mas lawv tuaj cuag Lasakhes. 4 Lasakhes hais rau lawv tias, cia li hais rau Hexekhiyas tias, tus huabtais loj uas yog Axilias tus vajntxwv hais tias, koj tso siab rau abtsi li kod? 5 Koj xav tias nej tej nyuag lus sablaj xwb yog daim phiaj thiab hwjchim ua tau rog no lov? Nimno koj vam leejtwg es koj thiaj fav xeeb rau kuv?

6 Koj sim xav saib, nimno koj vam khom Iziv uas yog tus pas nrig tauj deg uas lov lawm, yog leejtwg nrig yuav chob nws txhais tes. Iziv tus vajntxwv Falaus zoo yam nkaus li ntawd rau txhua tus uas vam khom nws.

7 Tiamsis yog koj hais rau kuv tias, peb tso siab rau (יחוח)Yahweh uas yog peb Tus Tswv, mas Tus Tswv ntawd puas yog tus uas Hexekhiyas muab tej chaw siab uas pe hawm nws thiab nws tej thaj xyeem rhuav pov tseg, thiab hais rau Yahdah thiab Yeluxalees tias, nej yuav tsum pe (יחוח)Yahweh ntawm lub thaj no xwb? 8 Cia li tuaj nrog kuv Tus Tswv uas yog Axilias tus vajntxwv cog lus tseg. Kuv yuav muab ob txhiab tus nees rau koj yog tias koj nrhiav tau tibneeg caij cov nees ntawd. 9 Koj yuav ua li cas raws tau kuv Tus Tswv li ib tug thawj rog uas me dhau tej rau thaum koj tseem vam khom Iziv thiab lawv tej tsheb ua rog thiab tej tub rog caij nees?

10 Tsis yog li ntawd xwb, qhov uas kuv tuaj ntaus lub tebchaws no ua kom puam tsuaj tsis yog (יחוח)Yahweh nrog nraim lov?

(יחוח)Yahweh hais rau kuv tias, cia li mus ntaus lub tebchaws no thiab ua kom puam tsuaj. 11 Mas Eliyakhis thiab Senas thiab Yau‑av hais rau Lasakhes tias, thov koj hais ua lus Alas rau peb uas yog koj li tub qhe, peb yeej paub tej lus ntawd. Thov tsis txhob hais ua lus Yahdah rau cov tibneeg uas nyob saum tej ntsa loog tau hnov. 12 Tiamsis Lasakhes hais tias, tsis yog kuv tus vajntxwv txib kuv tuaj hais tej lus no rau nej thiab nej tus vajntxwv xwb. Yeej yog hais rau cov uas nyob saum tej ntsa loog uas lawv twb yuav noj lawv tej quav thiab haus lawv tej zis thiab ntag. 13 Mas Lasakhes sawv ntsug qw ua lus Yahdah nrov nrov hais tias, cia li mloog tus huabtais loj uas yog Axilias tus vajntxwv tej lus. 14 Vajntxwv hais li no tias, tsis txhob cia Hexekhiyas dag ntxias nej, vim nws tsis muaj peevxwm pab tau nej dim.

15 Tsis txhob cia Hexekhiyas ua rau nej vam khom (יחוח)Yahweh rau tej lus uas hais tias (יחוח)Yahweh yuav pab peb dim tiag tiag li. Lub nroog no yuav tsis poob rau hauv Axilias tus vajntxwv txhais tes. 16 Tsis txhob mloog Hexekhiyas hais. Axilias tus vajntxwv hais li no tias, cia li nrog kuv sib raug zoo thiab tawm tuaj cuag kuv, mas nej txhua tus nyias yuav tau noj nyias tej txiv hmab txiv cev thiab txhua tus nyias yuav tau haus nyias tej qhov dej, 17 mus txog thaum kuv rov tuaj coj nej mus rau lub tebchaws uas zoo ib yam li nej lub tebchaws, yog lub tebchaws uas muaj qoob loo thiab cawv txiv hmab, yog lub tebchaws uas muaj mov noj thiab muaj vaj txiv hmab. 18 Cia li ceev faj tsam ces Hexekhiyas yuav coj nej yuam kev thiab hais tias, (יחוח)Yahweh yuav cawm peb dim. Puas muaj ib tug dab twg hauv ib tsoom tebchaws uas pab tau nws lub tebchaws dim hauv Axilias tus vajntxwv txhais tes?

19 Lub moos Hamas thiab lub moos Apas tej dab dua twg tag lawm? Lub moos Xefava‑is tej dab dua twg lawm? Tej dab ntawd pab tau Xamalis dim hauv kuv txhais tes thiab lov?

20 Tej tebchaws no tej dab huvsi tsis muaj ib tug dab twg uas pab tau nws lub tebchaws dim hauv kuv txhais tes, mas (יחוח)Yahweh yuav cawm Yeluxalees dim hauv kuv txhais tes thiab lov? 21 Tiamsis lawv ntsiag twjywm tsis teb ib los li rau qhov vajntxwv Hexekhiyas twb qhia hais tias, tsis txhob teb ib los li. 22 Hikhiyas tus tub Eliyakhis uas yog tus saib xyuas vajntxwv lub tsev thiab Senas uas yog tus tub sau ntawv thiab Axas tus tub Yau‑as uas yog tus uas sau ntawv keeb kwm, lawv rov los cuag Hexekhiyas ua ris tsho ntuag tag, thiab qhia Lasakhes tej lus rau vajntxwv.