(יחוח)Yahweh Hais Rau Xailab

1 (יחוח)Yahweh hais li no rau tus uas nws hliv roj tsa lawd, yog Xailab, yog tus uas kuv tuav nws sab tes xis kom kuv thiaj ntaus yeej tej tebchaws ntawm nws xubntiag, thiab hle tej vajntxwv txoj siv ntawm duav, thiab qheb tej qhov rooj rau ntawm nws hauv ntej tsis muaj ib lub rooj loog yuav muab kaw li. 2 Kuv yuav mus ua koj ntej thiab muab tej roob pheej kom tiaj, kuv yuav tsoo tej rooj loog tooj liab pob tag ua tej dwb daim, thiab txiav tej las hlau kom tu.

3 Kuv yuav pub tej nyiaj txiag uas khaws cia hauv qhov tsaus ntuj thiab tej qhov nyiaj uas muab zais lawm rau koj,xwv koj thiaj paub tias kuv uas yog (יחוח)Yahweh uas yog cov xayees Tus Tswv hu koj raws li koj lub npe.

4 Vim yog saib rau kuv tus tub qhe Yakhauj thiab saib rau Ixayees uas kuv twb xaiv cia lawd, kuv thiaj li hu koj raws li koj lub npe, txawm yog koj tsis paub kuv los kuv tis npe rau koj. 5 Kuv yog (יחוח)Yahweh, tsis muaj dua ib tug twg li, dhau kuv lawm tsis muaj dua ib tug Tswv. Txawm yog koj tsis paub kuv los kuv pub zog rau koj, 6 xwv tej tibneeg txij ntua sab hnub tuaj mus txog ntua sab hnub poob thiaj li pau btias dhau kuv lawm tsis muaj dua ib tug li. Kuv yog (יחוח)Yahweh, tsis muaj dua lwm tus li lawm. 7 Kuv tsim qhov kaj thiab tsim qhov tsaus ntuj, kuv ua kom noj qab nyob zoo thiab ua kom muaj kev puam tsuaj, kuv yog (יחוח)Yahweh, yog tus uas ua txhua yam no huvsi. 8 Lub ntuj es, cia li tso txojkev ncaj ncees saum ntuj los, cia lub ntuj hliv los. Cia lub ntiajteb qheb kiag kom txojkev cawm dim thiaj li hlob tuaj, thiab cia lub ntiajteb ua txojkev ncaj ncees tshwm tuaj. Kuv yog (יחוח)Yahweh uas tsim tej no. 9 Tus tawm tsam tus uas tsim, nws yuav raug txom nyem lauj, yog lub laujkaub av tawm tsam tus Kws puab. Cov av nplaum puas hais rau tus Kws puab tias, koj tabtom ua abtsi? lossis Koj tsis ua tus tes nqa lov? 10 Tus uas hais rau leej txiv tias, koj yug tau abtsi? lossis hais rau leej niam tias, koj yug tau abtsi? Yuav raug txom nyem lauj!

 11 (יחוח)Yahweh, yog tus Dawbhuv hauv cov Ixayees, yog tus uas tsim lawv, hais li no tias, hais txog tej uas yuav muaj rau tom hauv ntej, mas nej yuav nug txog kuv tej tub ki, lossis qhia rau kuv txog tej uas kuv txhais tes yuav tsum ua lov? 12 Kuv tsim lub ntiajteb thiab tsim tibneeg nyob rau hauv, kuv txhais tes ntag nthuav lub ntuj thiab kuv kav txhua yam uas nyob saum nruab ntug. 13 Kuv ua ncaj ncees kuv thiaj li tsa Xailab sawv, kuv yuav ua rau nws tej kev huvsi ncaj. Nws yuav tsim kuv lub nroog dua tshiab thiab tso kuv cov tibneeg uas poob tebchaws dim tsis yuav nqe tsis yuav tshav ntuj. (יחוח)Yahweh uas muaj hwjchim loj kawg nkaus hais li no ntag.

14 (יחוח)Yahweh hais li no tias, tej nyiaj txiag hauv Iziv thiab cov tibneeg Khuj tej kev lag luam, thiab cov tibneeg Xenpas uas siab siab yuav tuaj cuag nej thiab ua nej tug. Lawv yuav raws nej qab. Lawv yuav raug saw hlau khi tuaj thiab yuav khoov ntshis pe nej. Lawv yuav taij thov nej hais tias, (יחוח)Yahweh nrog nraim nej, thiab tsis muaj dua ib tug twg li, dhau nws lawm tsis muaj dua lwm Tus Tswv li. 15 Au Ixayees Tus Tswv, yog tus cawmseej, qhov tseeb koj yog Tus Tswv uas tsis pub leejtwg pom. 16 Lawv txhua tus yuav raug txaj muag thiab poob ntsej muag, cov uas ua dab mlom sawvdaws yuav raug rhuav ntsej muag. 17 Cov Ixayees yuav raug (יחוח)Yahweh cawm dim mus ib txhis tsis kawg nej yuav tsis txaj muag thiab tsis poob ntsej muag mus ib txhis. 18 (יחוח)Yahweh uas tsim lub ntuj, nws yog Tus Tswv, nws yog tus uas puab lub ntiajteb thiab muab tsim cia, nws muab lub ntiajteb tsim ruaj khov, nws tsis tsim nyob do cuas, nws tsim kom muaj tibneeg nyob. Nws hais tias, kuv yog (יחוח)Yahweh, tsis muaj dua lwm tus li lawm. 19 Kuv tsis tau hais zais ntshis, tsis tau hais rau hauv lub tebchaws uas tsaus ntuj nti. Kuv tsis tau hais rau Yakhauj‎ caj ces tias, cia li nrhiav kuv hauv lub chaw uas do cuas. Kuv uas yog (יחוח)Yahweh hais qhov tseeb, kuv qhia tej uas raug cai xwb. 20 Nej cov uas tseem tshuav nyob hauv ib tsoom tebchaws, cia li tuaj txoos ua ke thiab txav los ze ze. Cov uas nqa lawv tej dab mlom ntoo mus mus los los, thiab pheej thov tej dab uas cawm tsis tau dim, lawv tsis paub abtsi li. 21 Cia li piav thiab teev nej tshaj plaub, cia lawv sablaj ua ke. Leejtwg piav tej no mloog ntev los lawm? Leejtwg qhia tej no txij thaum ub los? Tsis yog kuv, uas yog (יחוח)Yahweh lov? Dhau kuv lawm tsis muaj dua ib tug Tswv li. kuv yog Tus Tswv ncaj ncees thiab yog tus cawmseej. Dhau kuv lawm tsis muaj dua lwm tus li. 22 Thoob qab ntuj kawg, cia li tig los rau kuv thiab txais txojkev cawm dim, rau qhov kuv yog (יחוח)Yahweh, tsis muaj dua lwm tus lawm.

23 Kuv tuav kuv tus kheej twv thiab cog lus ncaj ncees tawm hauv kuv lub qhov ncauj mus, yuav tsis thim tej lus ntawd kiag li, hais tias, txhua lub hauv caug yuav pe kuv, txhua tus nplaig yuav cog lus rau kuv. 24 Luag yuav hais txog kuv tias, txojkev ncaj ncees thiab lub zog tsuas yog nyob hauv (יחוח)Yahweh tib leeg xwb. Txhua tus uas npau taws rau nws yuav los cuag nws thiab yuav txaj muag kawg. 25 Nyob hauv (יחוח)Yahweh, Ixayees caj ces sawvdaws yuav kov yeej, thiab qhuas ntxhias nws.