(יחוח)Yahweh Tib Leeg Yog Tus Tswv

1 Yakhauj uas yog kuv tus tub qhe es, Ixayees uas kuv xaiv lawd, cia li tig ntsej mloog. 2 (יחוח)Yahweh uas tsim koj, thiab puab koj rau hauv plab thiab yog tus uas yuav pab koj hais li no tias, Kuv tus tub qhe Yakhauj es, Yesulus uas kuv xaiv lawd, tsis txhob ntshai, 3 rau qhov uas yuav ywg dej rau saum lub tebchaws uas nqhis, thiab ua dej ntws saum tej av qhuav. Kuv yuav hliv kuv Tus Ntsuj Plig Dawbhuv rau saum koj caj ces, thiab hliv kuv tej koob hmoov rau saum koj tej tub ki. 4 Lawv yuav tuaj hlob mos nyoos yam li tej nyom hauv av noo, thiab yam li tej ntoo lwg zaj ntawm ntug dej cag. 5 Ib tug yuav hais tias, Kuv yog (יחוח)Yahweh tug. Muaj dua ib tug yuav raug hu raws li Yakhauj lub npe, thiab muaj dua ib tug yuav sau rau ntawm nws txhais tes tias, (יחוח)Yahweh tug, thiab kiav xeem ua Ixayees. 6 (יחוח)Yahweh uas yog Ixayees tus vajntxwv thiab tus uas txhiv nws, yog (יחוח)Yahweh uas muaj hwjchim loj kawg nkaus hais li no tias, Kuv yog lub hauv paus thiab yog lub ntsis, dhau kuv lawm tsis muaj ib tug Tswv twg li. 7 Leejtwg zoo cuag li kuv? Cia nws piav los maj. Cia nws qhia thiab cia nws hais ib zaj zuj zus rau ntawm kuv xubntiag tias txij thaum kuv tsim kuv haiv neeg thaum ub los muaj abtsi tshwm los, thiab hais txog tej uas tseem yuav tshwm los. Cia nws hais ua ntej tias abtsi yuav tshwm los los maj. 8 Nej tsis txhob ntshai, tsis txhob tshee. Txij thaum ub los kuv tsis tau piav rau nej mloog thiab tsis tau qhia rau nej paub lov? Nej ua kuv cov timkhawv. Dhau kuv lawm tseem muaj dua ib tug Tswv thiab lov? Qhov tseeb tiag, yeej tsis muaj dua ib txhib zeb lawm, kuv paub zoo tias tsis muaj kiag li.

​

Pe Dab Mlom Tsis Muaj Qabhau

9 Txhua tus uas ua dab mlom tsis muaj qabhau abtsi li, thiab tej uas lawv zoo siab ntawd kuj tsis muaj nqes kiag li. Tej uas ua timkhawv rau tej dab mlom ntawd, tsis pom kev thiab tsis paub abtsi li, mas lawv yuav raug txaj muag.

10 Leejtwg txaug tej dab mlom lossis nchuav dab mlom uas tsis muaj qabhau abtsi rau nws? 11 Saib maj, nws cov phoojywg sawvdaws yuav raug txaj muag, cov Kws txawj ua ntawd tsuas yog tibneeg xwb. Cia lawv txhua tus tuaj txoos ua ke, cia lawv sawv ntsug. Lawv yuav ntshai kawg, thiab lawv yuav raug txaj muag. 12 Tus Kws hlau nchuav thiab hlawv hauv cub thee, nws txhais npab uas muaj zog xuas rauj ntaus. Nws tshaib plab thiab qaug zog. Nws tsis haus dej thiab tsaug leeg. 13 Tus Kws ntoo muab hlua ntsuas, nws muab cwjmem sau yam ntxwv, nws muab rab txaug los txaug thiab muab sais ua kauj, nws ua moj zeej tibneeg zoo nkauj li tibneeg txawb rau hauv tsev. 14 Nws ntov ntoo ciab lossis xaiv ib tug ntoo ciab nplooj suab lossis ntoo qheb. Nws cia tus ntoo ntawd hlob zoo rau hauv hav zoov. Lossis nws cog ib tug ntoo thuv thiab dej nag yug hlob. 15 Tus ntoo ntawd txawm ua tawsrau tibneeg rauv. Nws muab ib txhia los rauv nte sov thiab muab rauv ci ncuav. Nws kuj muab ib tog los ua dab mlom thiab pe hawm, nws muab txaug ua dab mlom thiab pe ntawm tus dab mlom ntawd xubntiag.

16 Nws muab ib nrab hlawv rau hauv cub hluavtaws, saum cub tawg no nws npaj nqaij noj, nws ci nqaij thiab noj tsau npo. Nws kuj nte taws thiab hais tias, Au, sov kawg li, kuv pom hluavtaws lawm. 17 Cov ntoo uas tseem tshuav ntawd nws muab ua ib tug timtswv, yog ua nws tus dab mlom. Nws khoov ntshis pe hawm thiab thov tus dab mlom ntawd hais tias, thov cawm kuv, rau qhov koj yog kuv Tus Tswv. 18 Lawv cov ntawd tsis paub, lawv tsis to taub, lawv lub qhov muag raug muab npog lawm lawv thiaj tsis pom kev li, lawv lub siab ruam puas ntsoog lawm lawv thiaj tsis nkag siab. 19 Tsis muaj leejtwg xav txog li thiab tsis muaj kev paub thiab tsis txawj xav hais tias, Kuv muab ib nrab rauv hauv qhov cub thiab kuv ci ncuav saum cov ncaig, thiab ci nqaij saud los noj. Tsim nyog kuv muab tej uas tseem tshuav ua yam uas qias vuab tsuab lov? Tsim nyog kuv khoov ntshis pe tog ntoo ntawd lov? 20 Nws noj tshauv, nws lub siab uas raug ntxias coj nws yuam kev, nws tso tsis tau nws tus kheej dim, nws hais tsis tau tias, Yam uas nyob hauv txhais tes xisyog tej uas cuav xwb los sav.

​

(יחוח)Yahweh Txhiv Cov Ixayees

21 Yakhauj thiab Ixayees es, cia li nco ntsoov tej no, vim koj yog kuv tus tub qhe. Kuv tsim koj, koj yog kuv tus tub qhe. Ixayees es, kuv pheej yuav nco ntsoov koj. 22 Kuv twb tshem koj tej kev fav xeeb ploj ntais yam li tauv huab, thiab tshem koj lub txim yam li tej huab pw hav. Cia li rov los cuag kuv, vim kuv twb txhiv koj lawm. 23 Lub ntuj es, cia li hu nkauj, vim (יחוח)Yahweh tau ua tej no lawm. Tej qhov uas tob kawg hauv lub ntiajteb es, cia li qw nrov. Tej roob es, hav zoov thiab txhua tus ntoo uas nyob hauv es, cia li tsa suab hu nkauj, rau qhov (יחוח)Yahweh txhiv Yakhauj‎ lawm, thiab ua nws hwjchim ci ntsa iab tshwm rau hauv Ixayees. 24 (יחוח)Yahweh, yog tus uas txhiv koj thiab puab koj rau hauv lub plab, hais li no tias, kuv yog (יחוח)Yahweh uas tsim txhua yam huvsi, thiab kuv tib leeg nthuav lub ntuj thiab nthuav lub ntiajteb tsis muaj leejtwg pab.

25 Kuv yog tus uas ua kom tej txujci uas hais dag tsis tiav, thiab ua rau cov uas saib yaig saib sij tej lus tsis muaj tseeb, thiab rhuav tshem cov tibneeg txawj ntse thiab ua rau lawv tej tswvyim ruam. 26 Kuv yog tus uas qhwv kuv tus tub qhe tej lus thiab ua kom kuv cov tub xa xov tej lus tiav. Kuv hais txog Yeluxalees tias, yuav muaj tibneeg los nyob rau hauv, thiab hais txog Yahdah tej moos tias, Yuav raug muab tsim dua tshiab, thiab kuv yuav muab tej uas pob tag lawd ua dua tshiab. 27 Thiab kuv hais rau nruab tiv txwv tias, Cia li qhuav, kuv yuav ua rau koj tej hav qhuav qhawv.

28 Kuv hais txog Xailab tias, nws yog kuv tus tswv yug yaj, thiab nws yuav ua txhua yam uas kuv xav tseg tiav huvsi, thiab hais txog Yeluxalees tias, yuav raug muab tsim dua tshiab, thiab hais txog lub tuam tsev tias, koj lub taw tiag yuav raug muab tiag dua.