(יחוח)Yahweh Yog Tus Uas Txhiv

1 Yakhauj es, nimno (יחוח)Yahweh uas tsim koj, Ixayees es, tus uas puab koj, hais li no tias, tsis txhob ntshai, rau qhov kuv twb txhiv koj lawm. Kuv hu koj raws li koj lub npe. Koj yog kuv tug. 2 Thaum koj hla dej, kuv yuav nrog nraim koj, thaum koj hla tus niag dej, dej yuav tsis nyab koj, thaum koj hla hluavtaws, koj yuav tsis kub hnyiab, thiab nplaim taws yuav tsis kub koj. 3 Vim kuv yog  (יחוח)Yahweh, yog koj Tus Tswv, kuv yog tus Dawbhuv hauv cov Ixayees thiab yog koj tus cawmseej. Kuv muab Iziv ua cov nqe txhiv koj thiab muab Khuj thiab Xenpas pauv koj. 4 Vim kuv qhov muag saib koj tsim txiaj thiab vim koj muaj koob meej thiab kuv hlub koj, kuv thiaj muab tibneeg pauv koj, thiab muab tej haiv neeg pauv koj txojsia. 5 Tsis txhob ntshai, vim kuv nrog nraim koj, kuv yuav coj koj tej tub ki tawm sab hnub tuaj los thiab yuav qaws koj tawm sab hnub poob los. 6 Kuv yuav hais rau sab ped tias, cia li tso lawv, thiab hais rau sab nrad tias, tsis txhob tav lawv. Cia li coj kuv cov tub tawm deb deb li los, thiab coj kuv cov ntxhais tawm qab ntuj kawg los, 7 yog txhua tus uas raug hu raws li kuv lub npe, yog cov uas kuv tsim rau kuv tau koob meej, yog cov uas kuv tau puab thiab tsim cia. 8 Cia li coj cov uas muaj qhov muag los tsis pom kev, cov uas muaj qhov ntsejl os tsis hnov lus tawm los. 9 Cia ib tsoom tebchaws sawvdaws sau zog tuaj ua ke, thiab cia ib tsoom tibneeg tuaj txoos ua ke. Hauv nruab nrab lawv muaj leejtwg tau qhia tej no thiab piav tej uas dhau los lawd rau peb mloog? Cia lawv coj lawv tej timkhawv tuaj nres lawv, thiab cia luag tau hnov thiab hais tias, muaj tseeb tiag. 10 (יחוח)Yahweh hais tias, nej ua kuv cov timkhawv, thiab ua kuv tus tub qhe uas kuv xaiv cia lawd, kom nej thiaj li paub thiab ntseeg kuv, thiab nkag siab tias, kuv yog tus ntawd ntag. Ua kuv ntej tsis muaj ib tug timtswv twg uas yog muab txua tshwm los, thiab ua kuv qab kuj yuav tsis muaj li. 11 Kuv mas kuv thiaj yog (יחוח)Yahweh, dhau kuv lawm tsis muaj dua ib tug cawmseej. 12 Kuv yog tus qhia nej paub, cawm nej dim, piav nej mloog, tsis muaj dua ib tug (יחוח)Yahweh twg nyob hauv nej. Thiab nej yog kuv cov tim-khawv. (יחוח)Yahweh hais li no ntag. 13 Kuv yog (יחוח)Yahweh, thiab txij no mus kuv yeej yog Tus Tswv ntawd, tsis muaj ib tug twg tso dim tau hauv kuv txhais tes. Kuv ua yam haujlwm twg, leejtwg yuav tav tau?

14 (יחוח)Yahweh, yog tus uas txhiv nej, yog tus Dawbhuv hauv cov Ixayees hais li no tias, vim yog saib rau nej kuv yuav xa tub rog mus rau Npanpiloos, thiab coj cov Kheedias ntawd caij lub nkoj uas lawv khav ntxhias khiav tawm hauv lawv lub tebchaws.

15 Kuv yog (יחוח)Yahweh, yog nej Tus Tswv uas Dawbhuv, yog tus uas tsim Ixayees, thiab yog nej tus vajntxwv.

16 (יחוח)Yahweh uas tsim txojkev rau hauv hiavtxwv, thiab rhawv kev rau hauv dej hiavtxwv uas tob kawg.

17 Yog tus uas coj cov tsheb ua rog thiab tej nees, thiab pab tub rog thiab cov tub rog siab loj siab tuab tawm los, es lawv txawm pw tag sawv tsis taus los, lawv ploj tag yam li tus teeb xeeb uas muab tua kiag. Nws hais li no tias, 18 Tsis txhob nco txog tej uas dhau tag los lawd, tsis txhob tshuaj saib tej qub thaum ub.

19 Saib maj, kuv tabtom ua ib yam tshiab, twb tshwm los lawm, nej tsis pom lov? Kuv yuav rhawv ib txojkev rau hauv tebchaws moj sab qhua, thiab ua kom muaj tej hav dej rau hauv ntuj nrag teb do. 20 Tej tsiaj qus yuav hwm kuv, tsis hais hma thiab noog ntxhuav, vim kuv pub dej rau hauv tebchaws moj sab qhua, ua hav dej rau hauv ntuj nrag teb do, yog pub dej rau haiv neeg uas kuv xaiv cia lawm haus, 21 yog haiv neeg uas kuv tsim los rau kuv, xwv thiaj li qhia tej uas tsim nyog qhuas kuv. 22 Au Yakhauj es, txawm li ntawdl os koj tsis tau hu thov kuv, Au Ixayees es, koj tsis tau txog siav rau kuv kiag li. 23 Koj tsis tau coj koj tej yaj tuaj hlawv xyeem rau kuv, koj tsis tau tua tsiaj xyeem hwm kuv. Kuv tsis tau cia koj ris lub nra hnyav uas xyeem qhov txhia chaw rau kuv, thiab tsis tau cia koj khwv txog qhov uas hlawv roj ntoos tsw qab. 24 Koj tsis tau rho nyiaj yuav tauj qaib qab zib rau kuv, lossis muab tej roj hlawv xyeem ua rau kuv txaus siab. Tiamsis koj muab koj lub txim ua lub nra hnyav rau kuv ris, thiab koj ua rau kuv txog siav txog koj tej kev txhaum.

25 Kuv mas kuv yog tus uas rhuav koj tej kev fav xeeb, vim yog saib rau kuv, thiab kuv yuav tsis cim ntsoov koj lub txim cia.

26 Cia li hais koj tej keeb puam rau kuv mloog, wb cia li sib cam. Koj cia li hais tuaj xwv thiaj tshuaj tau tias koj ua raug cai. 27 Koj thawj leej txiv thaum ub yeej los ua txhaum muaj txim, thiab cov uas pab koj hais plaub kuj fav xeeb rau kuv. 28 Yog li no kuv thiaj muab cov thawj hauv lub chaw pe kuv rhuav ntsej muag, kuv muab Yakhauj cais kom raug kev puam tsuaj tag, thiab muab Ixayees cob rau luag thuam.