(יחוח)Yahweh Tus Tub Qhe

1 Saib maj, kuv tus tub qhe uas kuv txhawb nqa, tus uas kuv xaiv cia, yog tus uas kuv txaus siab rau. Kuv muab kuv Tus Ntsuj Plig Dawbhuv rau hauv nws, nws yuav coj txojkev ua ncaj ua ncees tshwm los rau ib tsoom tebchaws. 2 Nws yuav tsis qw tsis tsa lub suab nrov, thiab tsis ua rau luag hnov tom tej kev. 3 Tus tauj deg uas lov lawm nws yuav tsis muab tu, tus teeb xeeb uas cig pluj pliv nws yuav tsis muab tua. Nws yuav coj txojkev ua ncaj ua ncees tshwm los tiag tiag li.

4 Nws yuav tsis qaug zog lossis ua siab yau mus txog thaum nws tsa txojkev ua ncaj ua ncees nyob ruaj khov thoob plaws ntiajteb. Tej tebchaws ntawm ntug hiavtxwv tos rawv nws tej lus qhia. 5 (יחוח)Yahweh yog Tus Tswv, yog tus uas tsim lub ntuj thiab muab lub ntuj nthuav, thiab nthuav lub ntiajteb thiab txhua yam uas tawm hauv ntiajteb los, thiab pub cua rau tibneeg ua pa, thiab pub ntsuj plig rau cov uas mus mus los los hauv ntiajteb, nws hais li no tias, 6 Kuv yog (יחוח)Yahweh, kuv ua ncaj ncees, kuv thiaj hu koj, kuv tuav koj tes tsom kwm koj cia, kuv pub koj ua lo lus cog tseg rau ib tsoom tibneeg, ua qhov kaj ci rau ib tsoom tebchaws, 7 kom thiaj qheb tau tus uas dig muag lub qhov muag, thiab coj cov uas raug kaw dim hauv nkuaj los, thiab coj cov uas nyob qhov tsaus ntuj tawm hauv tsev lojfaj los. 8 Kuv yog (יחוח)Yahweh, no yog kuv lub npe, kuv lub hwjchim ci ntsa iab kuv tsis pub rau lwm tus, thiab tej lus uas qhuas kuv tsis pub rau tej dab mlom. 9 Saib maj, tej uas dhau los kuj tiav tag lawm, nimno kuv tshaj tawm tej yam tshiab, ua ntej uas tej ntawd tsis tau tshwm los kuv kuj piav rau nej mloog lawm.

Zaj Nkauj Qhuas (יחוח)Yahweh

10 Cia li hu zaj nkauj tshiab rau (יחוח)Yahweh, cia li hu tej nkauj qhuas nws tawm thoob qab ntuj kawg tuaj. Cov uas mus rau hauv hiavtxwv thiab txhua yam uas nyob hauv, tej tebchaws ntawm ntug hiavtxwv thiab tej tibneeg uas nyob ntawd es, cia li qhuas nws.

11 Cia tej ntuj nrag teb do thiab tej moos uas nyob hauv, thiab tej zej zog uas cov tibneeg Khedas nyob hauv, tsa lub suab. Cia cov tibneeg uas nyob hauv lub moos Xelas hu nkauj xyiv fab, cia lawv qw saum tej ncov roob tuaj. 12 Cia lawv ua rau (יחוח)Yahweh tau koob meej, cia lawv hu tej zaj nkauj qhuas nws hauv tej tebchaws ntawm ntug hiavtxwv.

13 (יחוח)Yahweh tawm mus yam nkaus li tus uas siab loj siab tuab, nws txhob nws lub zog kom kub siab lug yam li tus tub rog. Nws tsa suab qw, nws qw nrov, nws ua nws lub hwjchim tshwm lost awm tsam nws cov tshawj chim. 14 Kuv twb nyob twjywm ntev los lawm, kuv nyob ntsiag to thiab tswj kuv tus kheej cia. Nimno kuv yuav qw yam nkaus li tus pojniam uas mob plab yug menyuam, kuv yuav ceeb nkaus thiab txog siav qhe. 15 Kuv yuav muab tej roob thiab tej pov roob tso tseg nyob do cuas, thiab ua rau tej nroj tsuag saud qhuav tag. Kuv yuav ua rau tej niag dej qhuav qhawv tshwm tej thaj av hauv nruab nrab dej, thiab ua rau tej pas dej qhuav. 16 Kuv yuav cab cov dig muag taug txojkev uas lawv tsis tau paub dua, kuv yuav coj lawv taug tej kev uas lawv tsis tau txeev taug. Kuv yuav ua rau lawv lub hauv ntej uas tsaus ntuj nti pom kev kaj lug, thiab ua rau tej qhov zawj sib txig zos. Tej no yog tej uas kuv yuav ua, thiab kuv yuav tsis muab tso tseg. 17 Lawv yuav raug muab tig rov qab thiab yuav raug txaj muag kawg, yog cov uas tso siab rau tej dab mlom uas txaug, yog cov uas hais rau tej dab mlom uas nchuav tias, nej yog peb cov timtswv.

​

Ixayees Tsis Mloog Lus

18 Nej cov uas lag ntseg es, cia li mloog maj. Nej cov uas dig muag es, cia li tsa muag saib xwv nej thiaj li pom.

19 Leejtwg dig muag yam li kuv tus tub qhe lossis leejtwg lag ntseg yam li kuv tus tub xa xov uas kuv txib mus?

Leej twg dig muag yam li tus uas muab cais rau kuv lawd, lossis leejtwg dig muag yam li (יחוח)Yahweh tus tub qhe?

20 Koj pom ntau yam tiamsis koj tsis ua tib zoo saib, koj qhov ntsej tsis lag los koj tsis hnov.

21 Vim yog saib rau (יחוח)Yahweh txojkev ncaj ncees (יחוח)Yahweh thiaj txaus siab tsa nws txoj kevcai ua loj thiab muaj koob meej.

22 Tiamsis cov tibneeg no raug tub sab nyiag thiab raug lws, lawv txhua tus mag qhov taub thiab raug muab zais rau hauv nkuaj. Lawv raug luag lws tsis muaj leejtwg tuaj cawm, lawv raug luag txeeb mus tsis muaj leejtwg hais tias, Muab thim rov qab. 23 Nej cov leejtwg yuav tig ntsej mloog zaj no, thiab yuav ua tib zoo mloog rau yav tom hauv ntej?

24 Leejtwg muab Yakhauj cob rau tus uas txeeb, thiab muab Ixayees cob rau cov uas lws? Tsis yog (יחוח)Yahweh uas peb ua txhaum rau lov? Lawv tsis kam taug nws txojkev thiab tsis kam mloog nws txoj kevcai.

25 Yog li no nws thiaj nchuav nws txojkev npau taws heevt hiab txojkev ua rog loj rau saum lawv. Tej no ua rau lawv raug nplaim taws vij los lawv tsis nkag siab, tej no hlawv lawv los lawv tsis muab siab rau.