Tej Xwm Uas Yuav Muaj Yav Tom Ntej

1 Yakhauj caj ces es, cia li mloog zaj no nawj, nej yog cov uas luag hu ua Ixayees thiab yog cov uas tawm ntawm Yah-dah lub cev los, yog cov uas tuav (יחוח)Yahweh lub npe cog lus thiab pe hawm Ixayees Tus Tswv tiamsis tsis yog ua ncaj ncees thiab ua tseeb.

2 Lawv muab lawv lub npe hu raws li lub nroog uas Dawbhuv thiab vam khom Ixayees Tus Tswv, nws lub npe hu ua (יחוח)Yahweh uas muaj hwjchim loj kawg nkaus. 3 Tej uas dhau los lawd kuv twb qhia thaum ub los lawm, tej no twb tawm hauv kuv lub qhov ncauj thiab kuv twb hais rau sawvdaws paub. Mas tib ntsais muag xwb kuv ua li ntawd thiab muaj tshwm los raws li ntawd. 4 Kuv paub tias nej tawv ncauj, thiab nej tej leeg caj dab yog hlau thiab nej lub hauv pliaj yog tooj liab. 5 Kuv twb qhia tej xwm no rau nej paub ntxov thaum ub lawm, thaum tsis tau tshwm xwm los kuv twb qhia rau nej lawm xwv nej thiaj hais tsis tau tias, peb tej dab mlom ua tej xwm no, peb tej dab mlom uas txaug thiab tej uas nchuav hais kom muaj tej no tshwm los. 6 Nej twb hnov lawm, cia li saib txhua yam no, nej yuav tsis qhia kom paub li lov? Txij no mus kuv hais txog tej yam tshiab rau nej mloog, yog tej uas muab npog cia nej tsis tau paub.

7 Yog tej uas tsim nimno tsis yog ntev los lawm, ua ntej hnub no nej tsis tau hnov txog li, ntshai tsam nej yuav hais tias, peb twb paub lawm. 8 Nej yeej ib txwm tsis tau hnov, nej yeej ib txwm tsis tau paub, txij thaum ub los nej lub qhov ntsej yeej tsis tau qheb, rau qhov kuv paub tias nej xyaum ua tibneeg fav xeeb, thiab paub tias txij thaum yug los luag hu nej tias yog cov uas sawv twv. 9 Vim yog saib rau kuv lub npe, kuv thiaj tswj kuv txojkev npau taws cia, vim yog saib rau qhov uas luag qhuas, kuv thiaj tswj lub siab kom kuv thiaj tsis muab nej txiav pov tseg. 10 Saib maj, kuv twb muab nej nchuav hauv yeej vub kom tsis thooj li nyiaj, kuv twb muab nej sim rau hauv cub tawg uas yog kev txom nyem. 11 Kuv ua li ntawd vim yog saib rau kuv, yog saib rau kuv xwb, rau qhov kuv lub npe yuav raug luag saib tsis taus tau li cas? Kuv tsis pub kuv lub hwjchim ci ntsa iab rau lwm tus li.

(יחוח)Yahweh Txhiv Ixayees

12 Yakhauj thiab Ixayees uas kuv hu los es, cia li mloog kuv hais. Kuv yog (יחוח)Yahweh ntag, kuv yog lub hauv paus thiab yog lub ntsis. 13 Kuv txhais tes tau pua daim uas tiag lub ntiajteb thiab kuv txhais tes xis tau nthuav lub ntuj. Thaum kuv hu mas lub ntuj thiab lub ntiajteb kuj sawv pes tsees. 14 Nej sawvdaws cia li tuaj txoos ua ke tig ntsej mloog. Lawv tej dab tus twg tau qhia txog tej no rau nej mloog? (יחוח)Yahweh hlub Xailab, mas nws yuav ua raws li (יחוח)Yahweh twb npaj tseg rau Npanpiloos thiab nws yuav tawm tsam cov Kheedias. 15 Kuv ntag lauj yog tus hais thiab hu nws, kuv coj nws los mas txhua yam uas nws ua nws yuav ua tau kom tiav. 16 Cia li txav los ze kuv thiab mloog zaj no. Txij thaum chiv thawj los kuv yeej qhia tsis zais li. Txij thaum tej lus ntawd tshwm los, kuv yeej nrog nyob ua ke lawm. Nimno (יחוח)Yahweh tau txib kuv thiab pub nws Tus Ntsuj Plig Dawbhuv rau kuv.

17 (יחוח)Yahweh uas yog tus txhiv nej thiab yog tus Dawbhuv hauv cov Ixayees hais li no hais tias, kuv yog (יחוח)Yahweh, yog nej Tus Tswv, kuv qhuab qhia tej uas muaj nuj nqes rau nej thiab coj nej taug txojkev uas tsim nyog mus. 18 Au, yog nej tau mloog kuv tej lus nkaw, mas nej lub siab yuav tus yees yam nkaus li tus niag dej puv ntug nkaus, thiab nej txojkev ncaj ncees yuav zoo litej nthwv dej hiavtxwv ntas, 19 thiab nej tej tub ki yuav coob yam nkaus li tej xuab zeb, thiab nej caj ces yuav coob yam li tej tsig xuab zeb, lawv tej npe yuav tsis raug muab txiav pov tseg thiab tsis raug muab rhuav kom ploj tag ntawm kuv xubntiag.

20 Cia li tawm hauv Npanpiloos mus, cia li khiav hauv Kheedias mus. Cia li tshaj tawm zaj no qw nrov nrov xyiv fab hlo, cia li piav rau sawvdaws mloog, cia li xa xov kom thoob qab ntuj hais tias, (יחוח)Yahweh twb txhiv nws tus tub qhe Yakhauj dim lawm.

21 Thaum (יחוח)Yahweh coj lawv taug txoj-kev hauv ntuj nrag teb do lawv kuj tsis nqhis dej. Nws ua dej txhawv hauv phab zeb los rau lawv haus. Nws phua phab zeb mas dej txhawv hlob kawg los. 22 (יחוח)Yahweh hais tias, cov tibneeg limhiam yuav tsis muaj lub siab tus li.