(יחוח)Yahweh Tus Tub Qhe

1 Tej tebchaws raws ntug hiavtxwv es, cia li mloog kuv hais, nej cov tibneeg uas nyob deb es, cia tig ntsej mloog.

(יחוח)Yahweh hu kuv txij thaum nruab thiab los, nws tis kuv npe txij thaum kuv nyob hauv kuv niam lub plab los.

2 Nws ua kuv lub qhov ncauj ntse li rab ntaj, nws muab kuv zais rau hauv nws txhais tes tus duab ntxoov ntxoo. Nws muab kuv ua rab xub uas muab txhuam zoo zoo lawm, nws muab kuv zais rau hauv nws lub raj xub. 3 Nws hais rau kuv tias, Ixayees, koj yog kuv tus tub qhe, kuv yuav tau koob meej ntawm koj.

4 Tiamsis kuv hais tias, kuv ua haujlwm khwv dawb dawb xwb, kuv nkim kuv lub zog do do qhuav qhawv xwb. Tiamsis kuv txojcai nyob ntawm (יחוח)Yahweh, thiab kuv tus nqe zog nyob ntawm kuv Tus Tswv. 5 (יחוח)Yahweh yog tus uas puab kuv hauv lub plab los ua nws tus tub qhe thiab coj Yakhauj‎ rov los cuag nws thiab qaws Ixayees sau zog ua ke los cuag nws, vim yog kuv tau koob meej ntawm (יחוח)Yahweh lub qhov muag, thiab kuv Tus Tswv yog kuv lub dag lub zog. 6 Nws hais tias, qhov uas koj yuav ua kuv tus tub qhe es tsa Yakhauj‎ cov xeem sawv thiab pub cov uas tseem tshuav nyob hauv Ixayees rov tau zoo li qub yog ib qho me me xwb. Kuv yuav pub koj ua lub teeb uas ci rau ib tsoom tebchaws, kom kuv txojkev cawm dim thiaj mus txog qab ntuj kawg.

7 (יחוח)Yahweh uas yog tus txhiv Ixayees thiab yog tus Dawbhuv hauv cov Ixayees, hais li no rau tus uas ib tsoom tebchaws saib tsis taus thiab ntxub kawg, yog cov tibneeg uas kav cov tub qhe, hais tias, Tej vajntxwv yuav tsa muag saib thiab sawv tsees, cov thawj yuav pom thiab yuav pe, vim (יחוח)Yahweh yog tus uas ua ncaj, nws yog tus Dawbhuv hauv cov Ixayees, yog tus uas xaiv koj lawm.

​

Ixayees Yuav Rov Zoo Li Qub

8 (יחוח)Yahweh hais li no tias, lub sijhawm uas kuv hlub, kuv yuav teb koj, hnub uas cawm dim, kuv yuav pab koj. Kuv yuav tsom kwm koj thiab pub koj ua lo lus cog tseg rau ib tsoom tibneeg, kom thiaj li tuav tau lub teb-chaws nyob ruaj thiab rov muab tej teb uas nyob do cuas faib ua qub txeeg qub teg, 9 thiab hais rau cov uas raug kaw tias, Cia li tawm los lauj, thiab hais rau cov uas nyob hauvqhov tsaus ntuj tias, cia li tshwm plaws los. Lawv yuav nrhiav noj ntawm tej ntug kev, thiab saum tej roob do hau yuav ua lawv lub tshav zaub. 10 Lawv yuav tsis tshaib tsis nqhis, tej cua kub thiab lub hnub yuav tsis hlawv lawv rau qhov tus uas khuvleej lawv yuav coj lawv, nws yuav coj lawv taug kev ze tej qhov dej txhawv. 11 Kuv yuav muab kuv tej roob huvsi ua txojkev, kuv tej niag kev yuav raug muab tsim tsa cia. 12 Saib maj, lawv yuav los deb deb los, saib maj, lawv los sab ped thiab sab hnub poob, thiab lawv los tebchaws Xi‑enes los.

13 Lub ntuj es, cia li hu nkauj zoo siab xyiv fab, lub ntiajteb es, cia li xyiv fab kawg, tej roob es, cia li tsa suab hu nkauj, rau qhov (יחוח)Yahweh nplij nws haiv neeg lub siab, thiab yuav khuvleej nws cov tibneeg uas raug kev txom nyem nyuaj siab. 14 Tiamsis Xi‑oo hais tias, (יחוח)Yahweh tso kuv tseg lawm, kuv Tus Tswv tsis nco qab kuv lawm. 15 Tus pojniam yuav tsis nco qab nws tus menyuam uas tseem noj mis, thiab tsis khuvleej tus tub uas nws yug tau thiab lov? Txawm yog lawv tseem tsis nco qab tau los kuv pheej yuav nco ntsoov koj. 16 Saib maj, kuv sais koj rau hauv kuv xib teg, koj lub ntsa loog nyob rawv ntawm kuv xubntiag. 17 Cov uas tsim kho koj kuj kov yeej cov uas ua kom puam tsuaj cov uas ua rau koj raug tso tseg nyob do cuas kuj khiav ntawm koj mus lawm.

18 Cia li tsa muag saib puag ncig thiab pom, lawv sawvdaws tuaj txoos ua ke, lawv tuaj cuag koj. (יחוח)Yahweh hais tias, kuv muaj txojsia nyob pom, koj yuav muab lawv los coj ib yam li coj tej npauj nyiaj npauj kub, koj yuav muab lawv coj ib yam li tus nkauj nyab coj npauj. 19 Txawm yog koj tej chaw raug muab tso tseg nyob do cuas thiab koj lub teb-chaws raug liamsim tag, los nimno koj yeej yuav nqaim dhau tsis txaus koj cov tibneeg nyob, thiab cov uas nqos koj yuav nyob deb deb lawm. 20 Cov menyuam uas yug rau thaum koj quaj ntsuag poob tebchaws yuav hais rau koj lub qhov ntsej tias, lub chaw no nqaim dhau tsis txaus kuv nyob, cia li nrhiav chaw rau kuv nyob. 21 Thaum ntawd koj yuav hais hauv lub siab tias, leejtwg yug cov tibneeg no rau kuv? Kuv cov menyuam tuag thiab kuv xeeb tsis taus menyuam lawm. Kuv raug poob tebchaws thiab raug ntiab khiav tag lawm, mas leejtwg tu cov menyuam no? Saib maj kuv raug muab tso tseg nyob tib leeg, es cov no tawm qhovtwg los?

22 Tus Tswv (יחוח)Yahweh hais li no tias, kuv yuav tsa kuv txhais tes co rau ib tsoom tebchaws, thiab tsa kuv tus chij rau ib tsoom tibneeg, mas lawv yuav puag koj cov tub rau ntawm xubntiag los, thiab yuav ris koj cov ntxhais saum xub pwg los. 23 Tej vajntxwv yuav ua koj txiv tshiab, thiab tej poj vaj yuav ua koj niam tshiab tu koj. Lawv cov no yuav khoov ntshis rau hauv av pe koj, lawv yuav yaim hmoov av ntawm koj kotaw. Ces koj thiaj paub tias kuv yog (יחוח)Yahweh. Cov uas tos ntsoov kuv yuav tsis raug txaj muag.

24 Yuav txeeb tau tej uas tus muaj zog heev lws tau rov los lov? Lossis cawm cov uas tus limhiam ntais ntuj ntes tau kom dim lov?

25 (יחוח)Yahweh yeej hais li no tias, txawm yog cov uas raug tus muaj zog heev ntes lawm los yuav muab txeeb tau rov los, thiab tej uas tus limhiam ntais ntuj lws tau lawm los yuav cawm kom dim tau rov los, rau qhov kuv yuav tawm tsam cov uas tawm tsam koj, thiab kuv yuav cawm koj tej tub ki kom dim. 26 Kuv yuav ua kom cov uas quab yuam kojrov noj lawv cev nqaij, thiab haus lawv tej ntshav qaug ib yam li qaug cawv txiv hmab. Mas ib tsoom tibneeg thiaj paub tias kuv yog (יחוח)Yahweh, yog koj tus cawmseej, yog tus uas txhiv koj thiab yog Yakhauj Tus Tswv uas muaj hwjchim.