(יחוח)Yahweh Hu Isayah

1 Xyoo uas vajntxwv Uxiyas tuag lawd, kuv pom (יחוח)Yahweh nyob saum ib lub zwm txwv uas siab thiab muaj meej, thiab nws lub tsho ntev nthuav puv nkaus lub tuam tsev.

2 Muaj Xelafees sawv ntawm (יחוח)Yahweh lawm saud txhua tus muaj rau txhais kooj tis, siv ob txhais kooj tis npog lub ntsej muag, ob txhais npog kotaw thiab ob txhais ya.

3 Lawv ib leeg hu rau ib leeg tias, (יחוח)Yahweh uas muaj hwjchim loj kawg Dawbhuv, Dawbhuv, Dawbhuv. Nws lub hwjchim ci ntsa iab puv nkaus lub ntiajteb.

4 Tus uas hu ntawd lub suab ua rau tej taw uas tiag qhov rooj tuam tsev ntseeg ua zog kais, thiab muaj pa ncho puv nkaus lub tuam tsev.

5 Kuv hais tias, kuv raug txom nyem lauj! Kuv puam tsuaj lawm rau qhov kuv yog tibneeg uas daim tawv ncauj tsis huv thiab kuv nrog cov tibneeg uas daim tawv ncauj tsis huv nyob ua ke. Kuv lub qhov muag pom tus vajntxwv uas yog (יחוח)Yahweh muaj hwjchim loj kawg nkaus.

6 Ces cov Xelafees ntawd ib tug txawm ya los rau ntawm kuv. Hauv nws txhais tes muaj ib lub ncaig taws cig cig uas nws muab ciaj tais hauv lub thaj xyeem los.

7 Nws muab twb kuv lub qhov ncauj thiab hais tias, saib maj, lub ncaig taws no nphav koj daim tawv ncauj lawm. Koj lub txim raug muab rhuav tshem lawm thiab koj tej kev txhaum raug muab ntxuav lawm.

8 Thiab kuv hnov (יחוח)Yahweh lub suab hais tias, kuv yuav txib leejtwg mus, thiab leejtwg yuav sawv peb chaw mus? Ces kuv hais tias, kuv nyob ntawm no, thov txib kuv mus.

9 Nws hais rau kuv tias, cia li mus thiab hais rau cov tibneeg no tias, nej cia li mloog tag mloog thiab los tsis nkag siab, saib tag saib thiab los tsis pom.

10 Cia li ua rau haiv neeg no lub siab ruam puas ntsoog, thiab ntsaws lawv lub qhov ntsej, thiab pos lawv lub qhov muag, tsam ces lawv lub qhov muag ho pom, thiab lawv lub qhov ntsej ho hnov, thiab lawv lub siab ho to taub, ces lawv yuav tig rov los thiab tau kho kom zoo.

11 Mas kuv hais tias, Au (יחוח)Yahweh, yuav zoo li ntawd ntev li cas? Mas nws hais tias, yuav zoo li ntawd mus txog thaum tej moos raug nyob do cuas tsis muaj tibneeg nyob lawm, thiab tej tsev tsis muaj tibneeg nyob, thiab lub tebchaws nyob do cuas cia, 12 thiab mus txog thaum (יחוח)Yahweh muab cov tibneeg kuav mus deb, thiab muaj tej chaw uas raug muab tso tseg ntau kawg nyob rau hauv lub tebchaws.

13 Txawm yog tshuav ib feem hauv kaum nyob los kuj yuav raug muab hlawv pov tseg. Yuav zoo li tej ntoo thuv thiab tej ntoo qheb uas raug muab ntov lawm tshuav lub hauv paus xwb. Lub hauv paus yog cov noob uas Dawbhuv rau hauv lub tebchaws.