Tej Lus Uas Hais Rau Ahas

1 Thaum Ahas uas yog Yauthas tus tub thiab yog Uxiyas tus xeeb ntxwv ua vajntxwv kav Yahdah tebchaws, mas Alas tus vajntxwv Lexi‎s thiab Ixayees tus vajntxwv Pekha‎s uas yog Lemaliya‎s tus tub tuaj ua rog rau lub nroog Yeluxalees, tiamsis ntaus tsis yeej. 2 Thaum muaj tibneeg mus hais rau hauv Davi‎v caj ces tias, cov Alas tuaj koom nrog cov Efa‑is lawm, mas vajntxwv thiab cov pejxeem lub siab ntshai tshee hnyo yam li tej ntoo uas raug cua ntsawj. 3 (יחוח)Yahweh thiaj hais rau Isayah tias, koj thiab koj tus tub Se‑ayasus cia li tawm mus ntsib Ahas ntawm tus ciav dej uas ntws los rau lub pas sab ped, yog ntawm txojkev uas mus rau daim teb Ntxhua Xov, 4 mas hais rau nws tias, koj cia li ceev faj, ua siab tus tsis txhob ntshai thiab tsis txhob poob siab rau ob yav nyuag tw taws uas ncho pa no, uas yog Lexi‎s thiab cov Alas, thiab yog Lemaliya‎s tus tub txojkev npau taws.

5 Cov Alas thiab cov Efa‑is thiab Lemaliya‎s tus tub tau ntaus tswvyim ua phem rau koj hais tias, 6 cia peb mus ua rog rau Yahdah thiab muab lawv dua rhe thiab txeeb Yahdah rau peb, thiab tsa Thanpe‑ees tus tub ua vajntxwv kav lawv.

7 (יחוח)Yahweh hais li no tias, lawv tej tswvyim yuav tsis muaj, ua tsis tau tshwm los. 8 Rau qhov Alas lub taubhau yog lub nroog Damaxakas, Damaxakas lub taubhau tsuas yog Lexi‎s xwb. Tsis dhau rau caum tsib xyoo Efa‑is yuav tawg tag ua tej dwb daim, thiab ua tsis tsheej ib haiv neeg lawm. 9 Efa‑is lub taubhau yog lub nroog Xamalis, thiab Xamalis lub taubhau tsuas yog Lemaliya‎s tus tub xwb. Yog nej tsis tso siab tiag tiag, nej yuav tsis nyob ruaj khov kiag li.

​

Yuav Yug Emanu‑ees

10 (יחוח)Yahweh rov hais rau Ahas tias, 11 cia li thov ib yam txujci ntawm (יחוח)Yahweh uas yog koj Tus Tswv, txawm yog nyob tob li tub tuag teb lossis siab li saum ntuj kuj tau.

12 Tiamsis Ahas hais tias, kuv yuav tsis thov thiab kuv yuav tsis sim (יחוח)Yahweh. 13 Mas Isayah hais tias, Davi‎v caj ces es, cia li tig ntsej mloog. Qhov uas nej ua rau tibneeg dhuav nej, tsis txaus lov es nej tseem ua rau kuv Tus Tswv dhuav thiab lov? 14 Vim li no, (יחוח)Yahweh yuav pub txujci tshwm rau nej ntag. Saib maj, ib tug ntxhais hluas yuav xeeb menyuam thiab yug tau ib tug tub, thiab yuav tis npe hu ua Emanu‑ees. 15 Nws yuav noj kua mis nyeem thiab zib ntab rau thaum nws paub tseg qhov phem thiab xaiv yuav qhov zoo. 16 Ua ntej uas tus menyuam ntawd paub tseg qhov phem thiab xaiv yuav qhov zoo, ob tug vajntxwv uas koj ntshai kawg ntawd li tebchaws yuav nyob do cuas cia.

17 (יחוח)Yahweh yuav coj Axilias tus vajntxwv los ntaus koj thiab koj cov tibneeg thiab koj txiv caj ces, yog tej xwm txheej uas txij thaum Efa‑is ncaim ntawm Yahdah los tsis tau muaj dua li.

18 Hnub ntawd (יחוח)Yahweh yuav xuav hu tej yoov nyuj uas nyob ntawm tej hauv dej hauv Iziv tebchaws thiab tej ntab uas nyob hauv Axilias tebchaws tuaj. 19 Tej ntawd huvsi yuav tuaj nyob puv nkaus tej khuab roob khuab ha thiab tej kem zeb thiab nyob saum tej tsob pos thiab tej tshav zaub huvsi.

20 Hnub ntawd (יחוח)Yahweh yuav xuas rab chais uas nws ntiav ntawm tus dej Yufetis sab hnub tuaj uas yog Axilias tus vajntxwv ntag tuaj chais tej plaubhau thiab tej plaub ntawm kotaw thiab yuav kuam kiag tej hwj txwv pov tseg.

21 Hnub ntawd ib leeg yuav yug ib tug xyuas nyuj thiab ob tug yaj. 22 Vim tej tsiaj pub kua mis ntau nplua mias, nws yuav tau noj kua mis nyeem. Txhua tus uas tseem tshuav nyob hauv lub tebchaws yuav tau noj kua mis nyeem thiab zib ntab. 23 Hnub ntawd txhua thaj uas txeev muaj txiv hmab ib txhiab tsob uas tau nqe ib txhiab sekhees nyiaj, yuav ntxeev ua pos kaus ntsaj pos kaus ntsim. 24 Tej tibneeg uas tuaj rau qhov ntawd yuav coj hneev coj xub tuaj, vim thoob tebchaws tsuas yog muaj pos kaus ntsaj pos kaus ntsim. 25 Thiab tej pov roob uas lawv txeev xuas hlau ncaws, nej yuav mus tsis txog qhov ntawd vim ntshai pos kaus ntsaj pos kaus ntsim. Tej pov roob ntawd yuav ua chaw rau luag tso nyuj thiab ua chaw rau yaj tsuj.