Isayah Tus Tub

1 Mas (יחוח)Yahweh hais rau kuv tias, cia li coj ib daim txiag loj los sau npe ntawv hais tias, Mahaws Salahanpas. 2 Kuv nrhiav tau ob tug uas tso siab tau los ua kuv li tim khawv, yog pov thawj Uliyas thiab Yenpelekhiyas tus tub Xekhaliyas.

3 Mas kuv mus nrog poj xibhwb pw mas nws xeeb menyuam thiab yug tau ib tug tub. Ces (יחוח)Yahweh txawm hais rau kuv tias, cia li tis tus tub ntawd lub npe hu ua Mahaws Salahanpas, 4 rau qhov ua ntej uas tus menyuam ntawd txawj hu niam thiab txiv, mas Damaxakas tej nyiaj txiag thiab Xamalis tej qhov txhia chaw yuav raug Axilias tus vajntxwv txeeb coj mus.

5(יחוח)Yahweh rov hais rau kuv tias, 6 vim yog cov tibneeg no tsis yuav cov dej Silau‑as uas ntws tus yees thiab ntshai Lexi‎s thiab Lemaliya‎s tus tub, 7 vim li no, saib nawj, (יחוח)Yahweh coj tus niag dej loj Yufetis uas hlob hlob tuaj tawm tsam lawv, yog Axilias tus vajntxwv thiab nws lub meej mom hwjchim huvsi. Tej dej yuav ntws nyab kiag tej hav dej huvsi thiab nyab kiag tej ntug dej huvsi. 8 Thiab yuav kuav kiag mus rau hauv Yahdah, thiab nyab kiag dhau plaws mus txij nkaus caj dab.

Au Emanu‑ees, nws yuav nthuav tis dav puv nkaus koj lub tebchaws. 9 Ib tsoom tibneeg, cia li sau zog ua ke thiab ntshai, ib tsoom tebchaws uas nyob deb cia li tig ntsej mloog, cia li cuab zog ua rog thiab ntshai, cia li cuab zog ua rog thiab ntshai los maj. 10 Cia li sablaj ua ke, tiamsis tej uas nej xav ntawd yuav tsis tiav, cia li hais lus, los yuav tsis tau qabhau, vim (יחוח)Yahweh nrog nraim peb. Yuav tsum paub ntshai (יחוח)Yahweh.

11 (יחוח)Yahweh cev nws txhais tes uas muaj zog los rau saum kuv hais tej lus no rau kuv, thiab ntuas kuv tsis txhob ua raws li haiv neeg no ua, nws hais tias,

12 Txhua yam uas cov tibneeg no hais tias yog kev ntaus tswvyim fav xeeb, mas nej tsis txhob hais li ntawd, thiab tej uas lawv ntshai nej tsis txhob ntshai tsis txhob ceeb kiag li.

13 Nej yuav suav tias (יחוח)Yahweh uas muaj hwjchim loj kawg nkaus nws Dawbhuv. Cia nws ua tus uas nej paub ntshai, cia nws ua tus uas nej ntshai kawg. 14 Thiab nws yuav ua lub chaw Dawbhuv uas cawm siav, thiab ua lub pob zeb uas tibneeg dawm, thiab ua txhib zeb uas ua rau cov Ixayees thiab cov Yahdah puavleej dawm ntog, thiab ua rooj hlua rooj nta uas cuab cov tibneeg uas nyob hauv Yeluxalees. 15 Yuav muaj tibneeg coob dawm lub pob zeb ntawd. Lawv yuav ntog thiab yuav tawg tag, lawv yuav mag rooj hlua thiab raug ntes. 16 Cia li muab tej lus timkhawv khi khaws cia, thiab cia li muab tej lus qhia ntawd kaw cia rau hauv kuv cov thwjtim. 17 Kuv yuav tos rawv (יחוח)Yahweh uas fee plhu ntawm Yakhauj‎ caj ces lawd, thiab kuv yuav vam khom nws. 18 Saib maj, kuv thiab cov menyuam uas (יחוח)Yahweh pub rau kuv yog txujci tseem ceeb thiab yog yam uas qhia tom hauv ntej rau cov Ixayees, yog los ntawm

(יחוח)Yahweh uas muaj hwjchim loj kawg nkaus uas nyob saum lub roob Xi‑oo.

19 Thaum luag hais rau nej tias, cia li mus ua nug rau tej txiv neeb txiv yaig uas qw ua nqaj ua nqug tsis tsheej suab, mas tsis tsim nyog tibneeg ua nug rau (יחוח)Yahweh lov? Tsim nyog lawv ua nug rau tus uas tuag txog cov uas tseem ciaj lov? 20 Cia li saib tej lus qhia thiab tej lus timkhawv. Cov uas hais tej lus li ntawd kuj yog cov uas tsis pom qhov kaj.

21 Lawv yuav hla lub tebchaws mus ua ntxhov siab kawg thiab tshaib plab. Thaum lawv tshaib lawv yuav chim thiab tsa muag ntsia rau saum ntuj tsawm foom lawv tus vajntxwv thiab lawv Tus Tswv. 22 Lawv yuav saib rau lub ntiajteb tsuas muaj kev ntxhov siab kev tsaus ntuj kev lwj siab, lawv yuav raug muab xyeeb mus rau hauv qhov tsaus ntuj nti.