Tus Vajntxwv Uas Yuav Los Kav

1 Yuav tsis muaj kev tsaus ntuj rau tus uas txeev raug kev txom nyem lwj siab dua li lawm. Yav thaum ub (יחוח)Yahweh ua rau Xenpuloos tebchaws thiab Nathalis tebchaws raug luag saib tsis taus. Tiamsis yav tom qab nws yuav ua kom txojkev ntawm ntug hiavtxwv uas nyob sab dej Yaladees hnub poob tau koob meej, yog Kalilais uas lwm haiv neeg los nyob. 2 Cov tibneeg uas taug txojkev tsaus ntuj twb pom qhov kaj uas loj kawg lawm. Cov uas nyob hauv txojkev tuag tus duab tsaus txojkev kaj ci rau lawv lawm. 3 Koj twb pub lub tebchaws nthuav dav thiab tsav txojkev xyiv fab rau lawv lawm. Lawv zoo siab xyiv fab rau ntawm koj xubntiag, yam li xyiv fab rau thaum sau qoob loo, thiab yam li xyiv fab rau thaum muab tej uas txeeb tau los sib faib. 4 Rab quab uas hnyav thiab tus las ntawm xub pwg thiab tus qws uas quab yuam lawv, koj twb muab lov ib yam li hnub uas ua rau cov Midees lawm. 5 Txhua nkawm khau uas tswm av ntseeg mus ua rog, thiab txhua lub tsho uas raus hauv cov ntshav yuav raug muab ua taws hlawv hauv cub hluavtaws.

6 Muaj ib tug menyuam yug los rau peb, muaj ib tug tub pub rau peb. Yuav muab qhov uas kav tebchaws rau saum nws xubpwg, thiab nws lub npe yuav hu tias yog lub chaw sablaj uas phimhwj kawg,yog (יחוח)Yahweh uas muaj hwjchim loj kawg, yog leej txiv uas nyob mus ib txhis, yog vajntxwv leej tub uas coj kev thaj yeeb. 7 Nws kev tswjhwm yuav dav zuj zus tuaj, thiab txojkev thaj yeeb yuav muaj tsis txawj kawg, rau saum Davi‎v lub zwm txwv thiab saum nws lub tebchaws. Nws yuav txiav txim ncaj thiab ua ncaj ncees thiaj ua rau lub tebchaws nyob ruaj khov, thiab tuav lub tebchaws txij nimno mus ib txhis tsis kawg. (יחוח)Yahweh uas muaj hwjchim loj kawg nkaus kub siab lug yuav ua tej haujlwm no kom tiav.

​

(יחוח)Yahweh Chim Rau Cov Ixayees

8 (יחוח)Yahweh xa xov mus tawm tsam Yakhauj, thiab yuav mus raug Ixayees.

9 Tej pejxeem sawvdaws yuav paub, yog Efa‑is thiab cov tibneeg Xamalis uas tsab ua loj thiab lub siab khav theeb hais tias, 10 Tej thwv cib pob tag lawm, tiamsis peb yuav siv tej txhib zeb uas txhwm los ua dua tshiab. Tej ntoo txiv cev raug muab ntov lawm, tiamsis peb yuav muab ntoo ciab cog rau hauv lub qub chaw.

11 (יחוח)Yahweh thiaj txhawb Lexi‎s cov tshawj chim tawm tsam lawv, thiab tshum lawv cov yeeb ncuab. 12 Cov Alas uas nyob sab hnub tuaj thiab cov Filixatee‎s uas nyob sab hnub poob yuav rua ncauj nqos cov Ixayees. Txawm li ntawd los nws txojkev chim kuj tsis thim, thiab nws tseem tsa nws txhais tes li qub.

13 Cov pejxeem kuj tsis tig los cuag tus uas nplawm lawv, tsis nrhiav (יחוח)Yahweh uas muaj hwjchim loj kawg nkaus.

14 (יחוח)Yahweh thiaj li txiav Ixayees taubhau thiab kotw, thiab tej nplooj kuj yem thiab tej tauj deg rau tib hnub. 15 Cov kev txwj laug thiab cov uas muaj meej yog lub taubhau, cov cuav xibhwb cev (יחוח)Yahweh lus uas qhia tsis tseeb yog kotw. 16 Cov thawj uas coj cov tibneeg no tau coj lawv yuam kev, thiab cov uas lawv coj kuj raug muab nqos.

17 Vim li ntawd (יחוח)Yahweh thiaj tsis zoo siab rau lawv cov hluas, thiab tsis khuvleej cov menyuam ntsuag tsis muaj txiv thiab cov poj ntsuam, rau qhov txhua tus tsis hwm (יחוח)Yahweh thiab ua phem thiab txhua lub qhov ncauj hais tej lus tsis paub qabhau. Txawm li ntawd los nws txojkev chim kuj tsis thim, thiab nws tseem tsa nws txhais tes li qub. 18 Txojkev phem kub hnyiab yam li hluavtaws kub, mas kub kiag tej pos kaus ntsaj pos kaus ntsim, zes taws rau tej hav zoov ntom, mas hav zoov kub pa ncho tej niag nthwv rau saud. 19 Lub tebchaws raug muab hlawv vim yog (יחוח)Yahweh uas muaj hwjchim loj kawg txojkev npau taws. Cov pejxeem zoo yam li tej taws uas muab rauv, tsis muaj ib tug twg tseg nws cov kwvtij txojsia li. 20 Lawv txeeb tau rau sab xis los tseem tshaib, noj rau sab laug los kuj tsis tsau, nyias taus nyias noj kwvtij li nqaij.

21 Manaxes noj Efa‑is, Efa‑is noj Manaxes, mas ob tug koom tawm tsam Yahdah. Txawm li ntawd los (יחוח)Yahweh txojkev chim kuj tsis thim, thiab nws tseem tsa nws txhais tes li qub.

​