1 Cov uas rhawv tej kevcai tsis ncaj thiab cov uas sau tej kevcai quab yuam yuav raug txom nyem lauj! 2 Lawv ua li ntawd xwv lawv thiaj tsis tu plaub ncaj rau cov tibneeg txom nyem, thiab tsuj kuv haiv neeg cov uas pluag txojcai, thiab txeeb tau cov poj ntsuam li feem thiab txeeb cov menyuam ntsuag uas tsis muaj txiv li feem. 3 Nej yuav ua li cas rau hnub uas raug txiav txim, yog hnub uas tej vij sub vij sw tuaj deb deb tuaj raug nej? Nej yuav khiav mus vam leejtwg? Nej yuav muab nej tej nyiaj txiag khaws cia rau qhovtwg? 4 Tsis tshuav ib yam abtsi li lawm tsuas yog nej yuav nyob ua nrob qaum khoov nkoos hauv nruab nrab cov uas raug ntes, lossis ntog rau hauv nruab nrab cov tibneeg uas raug tua lawm. Txawm li ntawd los nws txojkev chim kuj tsis thim, thiab nws tseem tsa nws txhais tes li qub.

(יחוח)Yahweh Siv Axilias

5 Axilias yog kuv txojkev chim rab nplawm, thiab yog kuv txojkev npau tus qws. 6 Kuv txib nws mus tawm tsam haiv neeg uas tsis hwm (יחוח)Yahweh, kuv kom nws mus ua rog rau haiv neeg uas kuv chim, mus txeeb mus lws tej qhov txhia chaw thiab muab tsuj pes ntiag yam li tsuj pas kua av hauv txojkev. 7 Tiamsis nws tsis npaj siab ua npaum li ntawd thiab tsis xav ua li ntawd xwb, nws npaj siab ua kom puam tsuaj thiab rhuav tshem ntau haiv neeg pov tseg. 8 Rau qhov nws hais tias, kuv cov thawj rog txhua tus kuj yog vajntxwv huvsi thiab. 9 Lub moos Khanau‎s kuj tsuas zoo li lub moos Khakhemis xwb, thiab lub moos Hamas kuj tsuas zoo li lub moos Apas xwb, thiab lub nroog Xamalis kuj tsuas zoo li Damaxakas xwb. 10 Kuv txhais tes twb ntaus tau tej tebchaws uas teev dab thiab muaj dab mlom loj dua Yeluxalees thiab Xamalis tej. 11 Kuv yuav tsis ua rau Yeluxalees thiab nws tej dab mlom ib yam li kuv twb ua rau Xamalis thiab nws tej dab mlom lawm lov? 12 Thaum (יחוח)Yahweh twb ua nws tej haujlwm rau Xi‑oo thiab Yeluxalees tiav lawm, nws yuav txiav txim rau qhov uas Axilias tus vajntxwv khav theeb heev thiab tsab ua loj. 13 Vim nws hais tias, kuv siv kuv txhais tes lub zog ua tau tej no, thiab siv kuv lub tswvyim ua vim kuv nkag siab zoo. Kuv tau rhuav tshem ntau haiv neeg tej ciam teb thiab tau lws lawv tej nyiaj txiag. Kuv twb nrau cov uas nyob saum tej zwm txwv poob tag ib yam li tus txiv nyuj nrau. 14 Kuv txhais tes tau muab kiag lwm haiv neeg tej nyiaj txiag ib yam li muab zes noog. Thiab ib yam li khaws tej qe uas noog twb tso tseg lawm, kuv twb sau zog lub ntiajteb huvsi ib yam li ntawd, tsis muaj ib tug ntxuaj tis tsauj lossis rua ncauj quaj nthe. 15 Rab taus tseem yuav khav ua loj dua tus uas siv thiab lov? Rab kaw tseem yuav tsab ua loj dua tus uas kaw thiab lov? Rab nplawm yuav ua li cas nqa tau tus uas tuav nws thiab rab qws yuav ua li cas nqa tau tus uas tsis yog ntoo? 16 Tus Tswv yog (יחוח)Yahweh uas muaj hwjchim loj kawg nkaus yuav tso mob yuag los rau hauv Axilias cov tibneeg uas rog nthaws, thiab yuav rauv taws kub nws lub koob meej ib yam li hluavtaws kub. 17 Cov Ixayees qhov kaj yuav ua hluavtaws thiab tus Dawbhuv hauv cov Ixayees yuav ua nplaim taws. Ib hnub xwb yuav hlawv nws tej pos kaus ntsaj pos kaus ntsim kub tag huvsi. 18 (יחוח)Yahweh yuav ua kom nws tej hav zoov uas tsim txiaj thiab tej teb uas ntsu qoob puam tsuaj tag tshooj kiag lub cev thiab ntsuj plig huvsi, mas yuav zoo yam nkaus li tibneeg mob kis yuag sem tag. 19 Tej ntoo hauv nws tej hav zoov tshuav tsawg kawg, ib tug menyuam yaus los suav tau tag huvsi.

Cov Ixayees Uas Tshuav Nyob

20 Hnub ntawd cov Ixayees uas tseem tshuav nyob thiab Yakhauj‎ caj ces uas dim txojsia nyob yuav tsis vam khom tus uas ntaus lawv, tiamsis lawv yuav vam khom (יחוח)Yahweh tiag tiag li uas yog Ixayees Tus Tswv uas Dawbhuv. 21 Cov uas tseem tshuav nyob ntawd yuav los cuag (יחוח)Yahweh uas muaj hwjchim loj kawg, yog Yakhauj caj ces uas tshuav nyob. 22 Ixayees es, txawm yog koj haiv neeg coob npaum li tej xuab zeb ntawm ntug hiavtxwv, los cov uas yuav rov los muaj tsawg heev. Qhov uas yuav ua kom puam tsuaj twb teem cia lawm, yeej yuav ua ncaj ua ncees rau txhua yam,23 vim Tus Tswv uas yog (יחוח)Yahweh tus muaj hwjchim loj kawg nkaus, yuav ua kom puam tsuaj tag thoob plaws ntiajteb raws li uas twb teem cia lawm.

24 Vim li no Tus Tswv uas yog (יחוח)Yahweh, tus muaj hwjchim loj kawg nkaus hais tias, kuv haiv neeg uas nyob hauv Xi‑oo es, nej tsis txhob ntshai cov Axilias rau thaum lawv xuas rab nplawm ntaus nej thiab tsa rab qws tawm tsam nej ib yam li cov Iziv txeev ua rau nej.

25 Tshuav tsis ntev kuv yuav tsis chim rau nej lawm, tiamsis kuv txojkev chim yuav ua kom lawv puam tsuaj. 26 (יחוח)Yahweh uas muaj hwjchim loj kawg nkaus yuav tsa nplawm los tawm tsam lawv ib yam li thaum nws ntaus cov Midees ntawm lub pob zeb Aulej, thiab nws yuav tsa nws tus pas nyob saum dej hiavtxwv ib yam li tsa hauv Iziv tebchaws lawm. 27 Hnub ntawd lawv tej nra hnyav yuav plam ntawm nej tej xub pwg thiab lawv tus quab ntawm nej caj qwb yuav raug muab ua puam tsuaj. Lawv twb tshais ntawm lub moos Limoos.

28 Lawv twb los txog Aiyaj lawm, lawv twb hla Miloos lawm, lawv khaws lawv tej cuab yeej toom txeem rau ntawm Mimaj. 29 Lawv twb hla hauv kem roob tuaj lawm, lawv so hmo ntuj ntawm Kenpas. Lub moos Lamas ras zom zaws, Sha-ul lub moos Kinpe‑as twb khiav lawm. 30 Kalis tus ntxhais es, cia li tsa suab quaj. Laisas es, cia li mloog. Anathaus es, ntxim hlub kawg li. 31 Mamenas tabtom khiav, cov tibneeg Kenpis khiav kom dim plaws. 32 Hnub no ntag lawv yuav so hauv lub moos Naus, lawv yuav nqus nrim rau Xi‑oo tus ntxhais lub roob, yog lub hauv roob Yeluxalees. 33 Saib maj, Tus Tswv uas yog (יחוח)Yahweh tus muaj hwjchim loj kawg nkaus yuav siv nws lub zog uas ntshai kawg txiav tej ceg ntoo. Tej ntoo uas siab kawg yuav raug muab ntov vau thiab tej uas siab yuav raug muab qhau vau. 34 (יחוח)Yahweh yuav xuas taus ntov lub hav zoov tsaus nti, thiab tej ntoo siab zoo nkauj hauv Lenpanoos yuav vau.