Tej Lus Nplij Xi‑oo

1 Nej cov uas huas ntshis txojkev cawm dim, nej cov uas nrhiav (יחוח)Yahweh, cia li mloog kuv hais. Cia li saib txhib zeb uas txua nej tawm los thiab saib lub qhov uas khawb tau nej los. 2 Cia li tsa muag saib nej yawg koob Anplaham thiab saib Xalas uas yug nej. Thaum muaj nws tib leeg xwb kuv twb hu nws lawm, thiab kuv foom koob hmoov rau nws thiab ua rau nws huaj vam coob.

3 (יחוח)Yahweh yuav nplij Xi‑oo, (יחוח)Yahweh yuav nplij nws tej chaw uas muab tso tseg nyob do cuas cia, thiab yuav ua rau nws tej tebchaws moj sab qhua zoo li lub vaj Edees, thiab muab tej ntuj nrag teb do ua zoo li (יחוח)Yahweh lub vaj. Yuav ntsib txoj kev xyiv fab zoo siabt hiab txojkev ua tsaug thiab suab nkauj hauv nws. 4 Kuv haiv neeg es, cia li mloog kuv hais, kuv lub tebchaws es, cia li tig pob ntseg mloog kuv, vim yog txoj kevcai yuav tawm hauv kuv mus thiab txo jkev ua ncaj ua ncees yuav tawm mus ua txoj kev kaj ci rau ib tsoom tibneeg.

5 Kuv txoj kev dim twb los ze sai sai no, kuv txojkev cawm dim twb tawm mus lawm. Kuv txhais npab yuav kav rawv ib tsoom tibneeg. Tej tebchaws ntawm ntug hiavtxwv kuj tos rawv kuv, lawv tos vam khom kuv txhais npab. 6 Cia li tsa muag saib saum ntuj thiab saib rau hauv lub ntiajteb, vim tias lub ntuj yuav ploj tag yam li tej pa ncho, thiab lub ntiajteb yuav khaub hlab tag yam li lub tsho, mas lawv cov uas nyob hauv yuav tuag tag yam li tej yoov qaib. Tiamsis kuv txojkev cawm dim yuav nyob mus ib txhis, thiab kuv txojkev dim yuav muaj mus tsis txawj kawg li. 7 Nej cov uas paub txoj  kev ncaj ncees, yog cov uas kuv txoj kevcai nyob hauv lawv lub siab, cia li mloog kuv hais. Tsis txhob ntshai qhov uas tibneeg thuam, thiab tsis txhob poob siab rau qhov uas luag iab liam, 8 rau qhov kab ntsaum yuav noj lawv yam li noj lub tsho, thiab kas yuav noj lawv yam li noj plaub yaj. Tiamsis kuv txojkev dim yuav nyob mus ib txhis thiab kuv txojkev cawm dim yuav nyob txhua txhia tiam. 9 (יחוח)Yahweh txhais npab es, cia li tsim dheev, cia li tsim dheev, cia li tsav koj lub zog, cia li tsim dheev ib yam li yav thaum ub, uas twb muaj ntev los lawm. Koj tsis yog tus uas muab Lahaj txiav ua tej dwb daim thiab nkaug niag zaj ntawd tshab plaws lov?

10 Koj tsis yog tus uas ua rau dej hiavtxwv qhuav kiag lov, yog lub Hiavtxwv Loj? Koj tsis yog tus uas muab qab thu hauv hiavtxwv ua kiag txojkev rau cov uas twb txhiv dim lawm taug hla mus lov? 11 (יחוח)Yahweh cov tibneeg uas twb txhiv dim lawm yuav rov qab los, thiab yuav hu nkauj laws los rau hauv Xi‑oo. Txoj kev xyiv fab yuav nyob rau saum lawv lub taubhau mus ib txhis tsis kawg. Lawv yuav tau txojkev xyiv fab thiab txojkev zoo siab, mas txojkev xyu thiab kev lwj siab yuav ploj ntais mus. 12 Kuv yeej yog tus uas nplij nej. Nej yog leejtwg es nej yuav ntshai tej tibneeg uas txawj tuag, thiab ntshai tibneeg tej tub uas tsim los zoo li tej nroj xwb?

13 Nej tseem tsis nco qab (יחוח)Yahweh tus uas tsim nej, yog tus uas nthuav lub ntuj thiab pua daim uas tiag lub ntiajteb, thiab tseem niaj hnub ua siab ntshai vim cov uas quab yuam nej npau taws, yog thaum lawv npaj yuav ua kom puam tsuaj. Cov uas quab yuam nej txojkev npau taws nyob qhovtwg?

14 Tus uas raug quab yuam es khoov khoov yuav raug muab tso dim sai sai, nws yuav tsis tuag thiab tsis nqes mus rau hauv qhov tuag, thiab yuav muaj noj muaj haus tsis tu li. 15 Kuv yog (יחוח)Yahweh, yog nej Tus Tswv uas do dej hiavtxwv ua kom dej ntas tej niag nthwv nrov vig voog.

(Nws lub npe yog (יחוח)Yahweh uas muaj hwjchim loj kawg nkaus). 16 Kuv muab kuv tej lus rau hauv koj lub qhov ncauj, thiab kuv muab koj zais rau hauv kuv txhais tes tus duab ntxoov ntxoo. Kuv nthuav lub ntuj thiab pua tej taw uas tiag lub ntiajteb, thiab hais rau Xi‑oo tias, koj yog kuv haiv neeg.

17 Au Yeluxalees, cia li tsa koj sawv, cia li tsa koj sawv tsees, cia li sawv ntsug, koj yog tus uas tau haus ntawm (יחוח)Yahweh txhais tes, yog (יחוח)Yahweh lub khob npau taws, koj tau haus mus txog cov txo, yog lub khob uas ua rau vau pig poog. 18 Cov tub uas Yeluxalees yug tsis muaj ib tug coj tau nws. Cov tub uas nws tu hlob los kuj tsis muaj ib tug tuav nws tes. 19 Ob yam no tau tshwm los raug koj. Leejtwg yuav nplij koj? Yog kev rhuav tshem thiab kev puam tsuaj, kev tshaib nqhis thiab hniav ntaj. Leejtwg yuav nplij koj lub siab?

20 Koj tej tub tsaus muag tsis xeev lawm, lawv pw rau txhua txoj hauv kev zoo yam nkaus li tus muas lwj mag hlua. Lawv raug (יחוח)Yahweh npau taws kawg nkaus li, thiab raug koj Tus Tswv cem. 21 Koj uas raug kev txom nyem nyuaj siab, koj uas qaug puj poog, tiamsis tsis yog qaug cawv txiv hmab, cia li mloog tej no. 22 (יחוח)Yahweh uas yog koj Tus Tswv uas pab nws haiv neeg hais plaub, hais li no tias, saib maj, kuv twb muab lub khob uas ua rau vau pig poog rho hauv koj txhais tes lawm, kuv lub khob npau taws, koj yuav tsis tau haus dua li lawm. 23 Kuv yuav muab lub khob no rau hauv cov uas tsim txom koj txhais tes, yog cov uas hais rau koj tias, Nyo maj, peb yuav hla saum koj mus, mas koj ua koj lub nrob qaum zoo li plas av thiab zoo li txojkev rau lawv taug mus.