(יחוח)Yahweh Yuav Cawm Yeluxalees Dim

1 Xi‑oo es, cia li tsim dheev, cia li tsim dheev los maj, cia li muab koj lub zog los hnav. Yeluxalees es, lub nroog Dawb huv es, cia li hnav koj tej tsoos tsho zoo nkauj, rau qhov cov uas tsis ua kevcai txiav thiab cov uas qias tsis huv yuav tsis nkag los rau hauv koj dua li lawm.

2 Yeluxalees es, cia li nchos tej hmoov av ntawm koj lub cev, cia li sawv tsees thiab zaum. Xi‑oo tus ntxhais uas raug ntes es, cia li daws tej hlua ntawm koj caj dab.

3 Rau qhov (יחוח)Yahweh hais li no tias, koj raug muab muag dawb dawb, koj kuj yuav raug txhiv tsis them nqe li.

4 Tus Tswv (יחוח)Yahweh hais li no tias, thaum ub kuv haiv neeg mus nyob rau hauv Iziv tebchaws, thiab cov tibneeg Axilias quab yuam lawv dawb dawb xwb. 5 (יחוח)Yahweh hais tias, nimno kuv muaj abtsi nyob ntawm no, rau qhov uas kuv haiv neeg raug muab coj mus dawb dawb lawm? (יחוח)Yahweh hais tias, lawv cov thawj quaj nyiav thiab hais lus tuam mom kuv lub npe tas hnub tas hmo tsis tu li.

6 Vim li no kuv haiv neeg yuav paub kuv lub npe, rau qhov hnub ntawd lawv yuav paub tias yog kuv hais ntag, kuv nyob ntawm no.

7 Tus uas coj xov zoo tuaj txhais kotaw zoo nkauj kawg rau saum tej roob, yog tus uas tshaj tawm txojkev thaj yeeb thiab coj xov zoo hais txog zaj uas zoo, yog tus uas tshaj tawm txojkev cawm dim, thiab hais rau Xi‑oo tias, Koj Tus Tswv ua vajntxwv kav.

8 Cia li tig ntsej mloog. Cov uas faj xwm kuj tsa lub suab, lawv hu nkauj ua ke zoo siab xyiv fab, rau qhov lawv qhov muag pom ntsoov (יחוח)Yahweh rov los rau hauv Xi‑oo.

9 Yeluxalees tej chaw uas raug muab tso tseg nyob do cuas, cia li tsa suab hu nkauj, rau qhov (יחוח)Yahweh twb nplij nws haiv neeg, nws twb txhiv Yeluxalees lawm.

10 (יחוח)Yahweh twb loj npab ntshuas nws txhais npab uas Dawbhuv tab meeg ib tsoom tebchaws sawvdaws, mas thoob qab ntuj kawg yuav pom peb Tus Tswv txojkev cawm dim.

11 Cia li mus, cia li tawm mus, cia li tawm qhov ntawd mus, tsis txhob kov tej uas qias tsis huv.

Nej cov uas nqa (יחוח)Yahweh tej twj siv, cia li tawm hauv lub plawv nroog ntawd mus, cia li tu nej tus kheej kom Dawb huv.

12 Nej yuav tsis maj tawm mus, thiab nej yuav tsis nyiag kev khiav mus, rau qhov (יחוח)Yahweh yuav mus ua nej ntej, thiab Ixayees Tus Tswv yuav faj seeb tom nej qub qab.

​

(יחוח)Yahweh Tus tub qhe Raug Txom Nyem

13 Saib maj, kuv tus tub qhe yuav muaj tswvyim ua tau txhua yam, nws yuav muaj koob meej thiab raug luag txhawb nqa thiab nws yuav nyob lub rooj siab heev.

14 Tibneeg coob heev yuav ceeb nkaus nws, nws lub ntsej muag txawv heev tsis thooj li tibneeg, thiab nws lub cev kuj txawv tsis thooj li tibneeg tej tub.

15 Nws yuav ua rau ntau lub tebchaws ceeb nkaus ib yam nkaus. Tej vajntxwv yuav qos ncauj nti vim yog tim nws, rau qhov lawv yuav pom yam uas tsis tau muaj leejtwg hais rau lawv, thiab lawv yuav nkag siab txog yam uas lawv tsis tau hnov dua.