1 Leejtwg ntseeg tej uas peb tau hais? (יחוח)Yahweh ua nws txhais npab tshwm rau leejtwg?

2 Nws tus tub qhe loj hlob rau ntawm nws xubntiag ib yam li tus kaus mos, thiab yam li tus cag uas hlav ntsuag hauv cov av qhuav tuaj. Nws lub cev ntaj ntsug tsis muaj ib qho zoo nraug uas txaus peb saib, thiab nws tsis muaj ib qho zoo uas txaus peb ntshaw nws.

3 Nws raug tibneeg saib tsis taus thiab muab tso tseg, nws yog ib tug uas pheej raug kev txom nyem nyuaj siab, thiab txeev muaj mob nkeeg, nws raug saib tsis taus yam li tus uas tej tibneeg fee plhu, thiab peb tsis hwm nws kiag li.

4 Yeej yog nws ris peb tej mob nkeeg thiab sau peb tej kev txom nyem nyuaj siab mus, txawm li ntawd los peb tseem suav tias nws raug nplawm, yog raug (יחוח)Yahweh nplawm thiab raug kev txom nyem nyuaj siab.

5 Tiamsis nws raug mob vim yog tim peb tej kev fav xeeb, nws raug ntsoog vim yog tim peb tej kev txhaum. Txojkev nplawm uas ua rau peb tau nyob kaj siab lug poob rau saum nws, qhov nws raug to ntawd kuj yog kho kom peb zoo.

 6 Peb txhua tus yuam kev yam li tej yaj, peb txhua tus nyias tig mus taug nyias txojkev, mas (יחוח)Yahweh muab peb sawvdaws lub txim tso rau saum nws.

7 Nws raug quab yuam thiab raug txom nyem nyuaj siab los nws tsis rua ncauj, ib yam li tus menyuam yaj uas raug coj mus tua, thiab ib yam li tus yaj nyob twjywm ntawm tus uas txiav plaub xubntiag li cas, nws kuj tsis rua ncauj ib yam li ntawd.

8 Nws raug quab yuam raug txiav txim thiab raug coj mus. Nws tiam tibneeg leejtwg xav tias nws raug muab txiav ntawm cov tibneeg ciaj mus thiab raug ntaus vim yog tim kuv haiv neeg tej kev fav xeeb?

9 Txawm yog nws tsis tau ua nruj ua tsiv, thiab nws lub qhov ncauj tsis tau dag ntxias, los luag npaj nws lub qhov ntxa nrog cov tibneeg limhiam ua ke, thiab thaum nws tuag lawv muab faus nrog tus nplua nuj.

10 Yeej yog (יחוח)Yahweh pom zoo yuav tsoo nws ntsoog thiab ua rau nws raug mob nkeeg. Txawm yog nws muab nws muab nws tus kheej xyeem daws txim, los nws yuav pom nws caj ces thiab yuav muaj txojsia nyob ntev. Tej uas (יחוח)Yahweh pom zoo yuav vam meej hauv nws txhais tes.

11 Nws yuav pom qhov uas nws tus ntsuj plig raug txom nyem tej txiaj ntsig thiab nws yuav txaus siab, kuv tus tub qhe uas ncaj ncees yuav siv nws txojkev txawj ntse ua rau tibneeg coob coob ua tau tibneeg ncaj ncees, thiab nws yuav ris lawv tej kev txhaum.

12 Kuv thiaj yuav pub nws muaj feem nrog cov uas ua hlob ua ke, thiab nws yuav nrog cov uas muaj zog muaj feem tau tej uas txeeb tau los, rau qhov nws tso nws tus ntsuj plig txog qhov uas tuag thiab raug muab suavr au hauv cov tibneeg fav xeeb. Txawm li ntawd los nws kuj ris tibneeg coob coob lub txim, thiab thov (יחוח)Yahweh pab cov tibneeg uas fav xeeb.