(יחוח)Yahweh Hlub Yeluxalees Tsis Tu Li

1 Tus pojniam mooj es, tus uas tsis tau yug dua menyuam, cia li hu nkauj, koj uas tsis tau mob dua plab yug menyuam es, cia li tsa suab hu nkauj thiab hu nrov nrov, rau qhov tus pojniam uas tsis muaj txiv cov menyuam yuav coob dua tus pojniam uas muaj txiv. (יחוח)Yahweh hais li no ntag.

2 Cia li txuas koj lub tsev ntaub kom dav, thiab nthuav daim ntaub uas xov koj lub chaw nyob kom dav. Tsis txhob nkaum tes, cia li txuas koj txoj hlua kom ntev thiab txhos koj tej tswg kom ruaj,

3 rau qhov koj yuav nthuav dav mus rau sab xis sab laug. Koj tej caj ces yuav tau ib tsoom tebchaws los ua lawv tug, thiab yuav mus nyob rau hauv tej moos uas nyob do cuas.

4 Tsis txhob ntshai vim koj yuav tsis raug txaj muag, tsis txhob poob siab vim koj yuav tsis poob ntsej muag. Koj yuav tsis nco qab tej kev txaj muag thaum koj tseem hluas nkauj, thiab koj yuav tsis nco qhov uas luag thuam koj ua poj ntsuam dua li lawm.

5 Tus uas tsim koj, yog koj txiv, nws npe yog (יחוח)Yahweh uas muaj hwjchim loj kawg nkaus, thiab tus Dawbhuv hauv cov Ixayees yog tus txhiv koj, nws hu ua (יחוח)Yahweh uas kav tag nrho lub ntiajteb huvsi.

6 (יחוח)Yahweh tau hu koj yam li tus pojniam uas raug muab tso tseg es lwj siab lawd, yam li tus pojniam hluas uas raug muab tso tseg. Koj Tus Tswv hais li no ntag.

7 Kuv tso koj tseg ib nyuag pliag xwb, tiamsis kuv khuvleej koj heev es kuv yuav qaws koj rov los.

8 Kuv npau taws ceev es fee plhu ntawm koj ib nyuag pliag xwb, tiamsis vim yog muaj txojkev hlub ib txhis kuv yuav khuvleej koj. (יחוח)Yahweh tus uas txhiv koj hais li no ntag.

9 Kuv saib tej no zoo ib yam li thaum Nau‑as nyob. Kuv cog lus twv rau Nau‑as tias dej yuav tsis nyab lub ntiajteb dua li lawm, ib yam li ntawd kuv tau cog lus twv tias kuv yuav tsis chim rau koj thiab yuav tsis cem koj.

10 Txawm yog tej roob yuav ncaim mus thiab tej pov roob yuav raug muab rhuav tshem mus, los kuv txojkev hlub uas ruaj khov yuav tsis ncaim koj, thiab kuv tej lus cog tseg sib raug zoo yuav tsis raug muab rhuav tshem. (יחוח)Yahweh uas khuvleej koj hais li no ntag.

11 Au koj uas raug txom nyem nyuaj siab, raug cua daj cua dub ntsawj thiab tsis muaj leejtwg nplij, saib maj, kuv muab koj tej pob zeb lo tej qe zeb hlaws dub txho txaij thiab muab tej qe zeb phaithus tsamxem los tiag koj luj taw.

12 Kuv yuav muab tej qe zeb liab los ua koj tej chaw tsom faj, thiab muab tej qe zeb hlaws ci ci muaj nqes los ua koj tej rooj loog, thiab muab tej qe zeb muaj nqes los ua koj tej ntsa loog.

13 (יחוח)Yahweh yuav qhuab qhia koj tej tub huvsi, thiab koj tej tub ki yuav vam meej heev kawg.

14 Koj yuav raug muab tsa rau hauv txojkev ncaj ncees, koj yuav nyob deb ntawm kev raug luag quab yuam, vim koj yuav tsis ntshai, thiab deb ntawm txojkev txhawj xeeb kev ntshai vim tej ntawd yuav tsis los ze koj.

15 Yog leejtwg tshum kom muaj kev sib txeeb, kuj tsis yog kuv ua. Leejtwg tshum kom muaj kev sib txeeb tus ntawd yuav piam tag rau koj tes.

16 Saib maj, kuv twb tsim tus Kws hlau uas tshuab tej thee hluavtaws, thiab ua tej cuab yeej uas haum‎ siv rau tej haujlwm ntawd. Kuv twb tsim tus uas rhuav tshem ua kom puam tsuaj.

17 Tsis muaj ib yam cuab yeej uas tsim los tawm tsam yeej koj, thiab koj yuav rhuav tshem txhua tus nplaig uas sawv los txiav txim rau koj. No yog (יחוח)Yahweh cov tub qhe li qub txeeg qub teg, thiab yog qhov uas kuv tsa lawv cai. (יחוח)Yahweh hais li no ntag.