(יחוח)Yahweh Hlub Sawvdaws

1 Txhua tus uas nqhis cia li los cuag dej, tus uas tsis muaj nyiaj cia li los yuav thiab noj. Cia li los yuav cawv txiv hmab thiab kua mis tsis txog them nyiaj them nqe.

2 Ua cas nej siv nej tej nyiaj yuav yam uas tsis yog zaub mov, thiab ua haujlwm khwv rau tej uas tsis txaus nej siab? Cia li rau siab mloog kuv hais, thiab noj yam uas zoo, thiab cia li zoo siab rau tej zaub mov uas zoo tshaj.

3 Cia li tig ntsej mloog thiab los cuag kuv. Cia li mloog kom nej tus ntsuj plig thiaj li ciaj sia nyob. Kuv yuav cog lus tseg mus ib txhis rau nej, yog kuv txojkev hlub ruaj khov uas muaj tseeb rau Davi‎v.

4 Saib maj, kuv muab nws ua timkhawv rau ib tsoom tibneeg, ua tus thawj thiab tus uas kav ib tsoom tibneeg.

5 Koj yuav hu tej tebchaws uas koj tsis tau paub dua, thiab tej haiv neeg uas tsis tau paub dua koj, yuav dhia tuaj cuag koj, vim yog muaj koj Tus Tswv (יחוח)Yahweh uas yog tus Dawbhuv hauv cov Ixayees, rau qhov nws pub koob meej rau koj.

6 Cia li nrhiav (יחוח)Yahweh rau thaum uas tseem ntsib tau, cia li thov nws rau thaum nws tseem nyob ze.

7 Cia cov tibneeg limhiam tso lawv tej kev phem tseg, thiab tus uas tsis ncaj ncees tso nws tej kev xav tseg. Cia lawv rov los cuag (יחוח)Yahweh kom nws thiaj li khuv-leej lawv, thiab los cuag peb Tus Tswv, vim nws yuav zam txim huvsi rau lawv. 8 Kuv tej kev xav tsis thooj li nej tej kev xav, thiab nej tej kev tsis thooj li kuv tej kev. (יחוח)Yahweh hais li no ntag.

9 Lub ntuj siab dua lub ntiajteb li cas, kuv tej kev kuj siab dua nej tej kev, thiab kuv tej kev xav siab dua nej tej kev xav li ntawd.

10 Nag thiab daus xib daus npu los saum ntuj los thiab tsis rov qab mus rau saud tsuas muaj uas ntub lub ntiajteb ua rau lub ntiajteb tuaj kaus tuaj ntsuag, pub noob rau tus uas tseb noob thiab pub zaub mov rau tus uas noj li cas,

11 kuv tej lus uas tawm hauv kuvlub qhov ncauj mus kuj zoo ib yam li ntawd. Tej lus ntawd yuav tsis rov los do cuas rau kuv, tiamsis yuav ua tej uas kuv hom tseg lawd kom tiav, thiab ua rau tej uas kuv txib mus ua ntawd hlob tuaj.

12 Nej yuav tawm mus ua zoo siab xyiv fab thiab raug coj mus kaj siab lug. Tej roob thiab tej pov roob yuav tsa suab hu nkauj ua nej ntej, thiab tej ntoo huvsi hauv nruab teb yuav npuaj teg.

13 Ntoo ciab nplooj suab yuav tuaj nyob pos kaus ntsaj chaw, txiv ntoo roj yuav tuaj nyob pos kaus ntsim chaw.

Tej no yuav ua lub chaw cim kom nco ntsoov (יחוח)Yahweh, yuav yog txujci tseem ceeb mus ib txhis uas tsis muab rhuav li.