Yoo Mov Kom Raug Lub Ntsiab

1 Cia li qw nrov nrov, tsis txhob qos ncauj cia, cia li tsa hlo koj lub suab yam nkaus li suab raj kub yaj. Cia li qhia rau kuv haiv neeg kom paub txog qhov uas lawv fav xeeb, qhia rau Yakhauj‎ caj ces paub lawv tej kev txhaum.

2 Tiamsis lawv tseem niaj hnub nrhiav kuv thiab tseem zoo siab kawm paub kuv tej kev, ib yam li lawv yog haiv neeg uas xyaum ncaj ncees thiab tsis tso lawv Tus Tswv tej kevcai tseg. Lawv kuj thov kom kuv phua cai ncaj ncees rau lawv, lawv zoo siab uas yuav los ze (יחוח)Yahweh.

3 Ua li cas peb twb ua kevcai yoo movlos koj tsis tsa muag ntsia? Ua li cas peb twb txo hwjchim los koj tsis quav ntsej li? Nej sim xav saib maj, hnub uas nej yoo mov nej tsuas ua raws li nej lub siab nyiam xwb thiab nej quab yuam nej tej tub dag tub zog txhua tus.

4 Saib maj, nej tsuas yog yoo mov los sib cav sib ceg thiab sib ntaus sib nrig phem kawg. Kev yoo mov uas niaj hnub nimno nej ua, tsis ua rau nej lub suab mus txog saum ntuj.

5 Qhov uas nej ua kevcai yoo mov li no thiab ua hnub uas txo hwjchim xwb yog tej uas kuv xaiv yuav lov? Qhov uas nyo taubhau zoo yam nkaus li tus tauj iab rawv, thiab muab khaub seev tsaj thiab tshauv pua chaw pw yog kevcai yoo mov lov?

Nej hu qhov uas ua li no tias yog yoo mov thiab yog hnub uas (יחוח)Yahweh txaus siab yuav no lov?

6 Kevcai yoo mov uas kuv cheem tsum yuavtsis yog li no lov? Yog qhov uas daws txojkev limhiam txoj hlua uas khi tibneeg thiab daws txoj hlua ntawm tus quab, thiab muab cov uas raug quab yuam tso kom dim thiab muab tej quab lov pov tseg huvsi,

7 thiab yog qhov uas muab nej tej mov faib rau cov uas tshaib plab, thiab coj cov pluag uas tsis muaj tsev nyob los rau hauv nej tsev, thiab thaum nej pom leejtwg liab qab kuj pub rau nws hnav, thiab tsis nkaum tes ntawm nej tej kwvtij txheeb.

8 Mas txojkev kaj yuav tshwm plaws rau hauv nej yam li kaj ntug, thiab yuav muab nej kho zoo sai sai. Nej txojkev ncaj ncees yuav ua nej ntej, (יחוח)Yahweh lub hwjchim ci ntsa iab yuav raws nej qab tiv thaiv nej.

9 Mas thaum nej hu, (יחוח)Yahweh yuav teb, thaum nej taij hu nws yuav hais tias, kuv nyob ntawm no. Yog nej muab tus quab uas yuam luag thiab qhov uas taw tes thiab qhov uas hais lus phem rho hauv nej mus,

10 thiab yog nej kub siab lug pub rau cov uas tshaib plab thiab pub rau cov uas txom nyem nyuaj siab tau txaus li lawv lub siab, mas txojkev kaj yuav tshwm plaws hauv qhov tsaus ntuj los rau nej, thiab qhov uas nej nyob qhov tsaus dub nciab yuav kaj lug zoo li thaum tav su.

11 Thiab (יחוח)Yahweh yuav coj nej mus ib txhis thiab pub tej uas nej cheem tsum rau hauv lub tebchaws uas qhuav nkig nkuav, thiab yuav ua rau nej tej pob txha muaj zog. Nej yuav zoo yam nkaus li lub vaj uas muaj dej ntov, thiab zoo yam li lub qhov dej txhawv uas muaj dej tsis tu.

12 Thiab tej uas twb pob tag ntev los lawm yuav raug muab tsim dua tshiab, thiab nej yuav kho dua tshiab rau saum tej taw tiag uas twb nyob ntau tiam tibneeg los lawm. Nej yuav tau lub npe hu tias yog cov uas kho tej ntsa loog uas pob tag lawm thiab kho tej kev thiaj tau chaw nyob.

​

Hwm Hnub Sabbath

13 Yog nej tseg tsis txhob saib tsis taus hnub Sabbath thiab tsis ua raws li nej lub siab nyiam rau kuv hnub uas Dawbhuv, thiab yog nej hu hnub Sabbath ua hnub uas siab xyiv fab, thiab hu (יחוח)Yahweh hnub uas Dawb huv tias yog hnub muaj meej, thiab yog nej hwm hnub ntawd tsis txhob mus raws li nej txojkev, lossis ua raws li nej lub siab nyiam, thiab tsis txhob hais tej uas tsis muaj qabhau,

14 mas nej yuav tau kevzoo siab xyiv fab hauv (יחוח)Yahweh, thiab kuv yuav cia nej caij saum tej chaw siab hauv lub ntiajteb, thiab kuv yuav muab nej yawg koob Yakhauj tej qub txeeg qub teg yug nej. vim yog (יחוח)Yahweh lub qhov ncauj tau hais li no lawm.