Hnub Uas (יחוח)Yahweh Ua Pauj

1 Leejtwg tawm ntawm Edoos tuaj? Nws tawm hauv lub moos Npauxas tuaj hnav tej tsoos tsho uas liab ploog, nws hnav tsoos tsho muaj meej mom thiab muaj zog heev tawm tuaj. Yog kuv ntag uas tshaj tawm qhov uas tsa txojcai, thiab yog tus muaj hwjchim cawm kom dim.

2 Ua cas koj tej tsoos tsho liab ploog thiab koj lub tsho zoo yam li tus uas tsuam kua txiv hmab hauv lub rhawv?

3 Kuv tib leeg tsuj rau hauv lub rhawv tsuam txiv hmab, ib tsoom tibneeg tsis muaj leejtwg nrog kuv nyob li. Kuv tsuj lawv ua chim tsawv, kuv tsuam lawv ua npau taws vog. Lawv tej ntshav nchos lo kuv lub tsho thiab ntshav tsuas kuv tej tsoos tsho huvsi.

4 Hnub uas ua pauj nyob hauv kuv lub siab, thiab xyoo uas kuv txhiv los txog lawm.

5 Kuv tsa muag saiv los tsis muaj leejtwg pab li. Kuv poob siab nthavlos tsis muaj leejtwg txhawb kuv lub zog. Kuv tib leeg txhais tes thiaj pab kuv kov yeej, thiab kuv txojkev npau taws txhawb kuv lub zog.

6 Kuv tsuj ib tsoom tibneeg ua chim tsawv, kuv npau taws vog ua rau lawv qaug li qaug cawv, thiab kuv nchuav lawv tej ntshav rau hauv av.

​

(יחוח)Yahweh Ua Zoo Rau Cov Ixayees

7 Kuv yuav qhia (יחוח)Yahweh txojkev hlub uas ruaj khov thiab (יחוח)Yahweh tej hauj lwm uas tsim nyog qhuas, raws li txhua yam uas (יחוח)Yahweh ua pab peb, yog tej kev zoo uas nws pub ntau kawg rau cov Ixayees, raws li nws txojkev khuvleej thiab nws txojkev hlub ruaj khov uas muaj nplua mias.

8 Nws hais tias, lawv yeej yog kuv haiv neeg, yog cov tub uas yuav tsis dag kuv, nws thiaj ua lawv tus cawmseej.

9 Thaum lawv raug kev txom nyem nyuaj siab nws kuj nrog lawv raug thiab, mas tus tubtxib uas nyob ntawm nws xubntiag cawm lawv dim. Vim nws hlub thiab khuvleej lawv nws thiaj li txhiv lawv. Yav thaum ub nws niaj hnub tsa lawv thiab puag lawv.

10 Tiamsis lawv fav xeeb thiab ua rau nws Tus Ntsuj Plig Dawbhuv tu siab. Vim li no nws thiaj ua yeeb ncuab rau lawv lawm thiab tawm tsam lawv.

11 Ces lawv txawm nco txog yav thaum ub uas Mauxes thiab nws cov tibneeg nyob. Tus uas coj lawv nrog tus uas yug nws pab yaj tawm hauv hiavtxwv los nws nyob qhovtwg? Tus uas pub nws Tus Ntsuj Plig Dawbhuv rau hauv lawv nruab nrab, nyob qhovtwg?

12 Nws yog tus uas pub nws txhais npab uas muaj hwjchim nrog Mauxes txhais tes xis mus, thiab faib dej rau ntawm lawv hauv ntej thiaj ua rau nws lub npe nto moo mus ib txhis,

13 thiab coj lawv hla dej hiavtxwv. Ib yam li tus nees mus hauv tebchaws moj sab qhua lawv twb tsis dawm li.

14 Tej tsiaj txhu nqes mus rau hauv lub hav li cas, (יחוח)Yahweh Tus Ntsuj Plig Dawbhuv pub lawv tau so ib yam li ntawd. Koj thiaj coj koj haiv neeg, ua rau koj lub npe nto moo lug.

15 Thov koj tsa qhov muag saib saum ntuj tuaj thiab saib ntsoov ntawm koj lub chaw nyob uas Dawbhuv thiab muaj meej mom tuaj. Koj lub siab kub lug thiab koj lub hwjchim dua twg lawm? Koj lub siab uas khuvleej pebt hiab mob siab peb raug muab rho ntawm peb lawm.

16 Txawm yog Anplaham tsis paub peb thiab Ixayees cim tsis tau peb, los koj yeej yog peb leej txiv. Au (יחוח)Yahweh, koj yog peb leej txiv, koj lub npe yog tus uas txhiv peb thaum ub los.

17 Au (יחוח)Yahweh, ua cas koj ua rau peb yuam kev ntawm koj txojkev, thiab ua rau peb lub siab tawv, peb thiaj tsis paub ntshai koj lawm? Vim yog saib rau koj cov qhev, yog saib rau cov xeem uas yog koj qub txeeg qub teg, thov koj rov qab los cuag pb.

18 Koj cov tibneeg Dawbhuv tau lub chaw pe koj ua lawv tug ib nyuag pliag xwb, mas cov uas tawm tsam peb muab lub chaw pe koj tsuj pes ntiag.

19 Peb zoo yam nkaus li cov tibneeg uas koj tsis tau kav kiag li, thiab zoo yam li lawv cov uas tsis raug hu raws koj lub npe.