1 Vim saib rau Xi‑oo, kuv thiaj tsis tswj kuv lub suab, thiab yog saib rau Yeluxalees kuv thiaj tsis nyob twjywm mus txog thaum uas Yeluxalees kev ncaj ncees ci yam li kaj ntug thiab nws txojkev cawm dim ci yam nkaus li teg tsau.

2 Mas ib tsoom tebchaws yuav pom qhov uas koj ncaj ncees, thiab ib tsoom vajntxwv yuav pom koj lub meej mom. Koj yuav raug hu lub npe tshiab uas (יחוח)Yahweh lub qhov ncauj yuav tis rau koj.

3 Koj yuav ua lub mom kub uas zoo nkauj kawg nyob hauv (יחוח)Yahweh txhais tes, thiab ua lub mom vajntxwv nyob hauv koj Tus Tswv txhais tes.

4 Luag yuav tsis hu koj lub npe hais tias, raug muab pov tseg, dua li lawm thiab yuav tsis hu koj lub tebchaws tias, nyob do cuas cia, dua li lawm, tiamsis koj yuav raug hu tias, Hexinpas, thiab hu koj lub tebchaws tias, Npe‑ulas, rau qhov (יחוח)Yahweh zoo siab txaus siab rau koj, thiab koj lub tebchaws yuav muaj txij nkawm.

5 Tus tub hluas yuav tus ntxhais hluas uas Dawbhuv li cas, tus uas tsim koj yuav yuav koj ib yam li ntawd. Tus nraug vauv zoo siab xyiv fab rau tus nkauj nyab li cas, koj Tus Tswv yuav zoo siab xyiv fab ib yam li ntawd rau koj.

6 Yeluxalees es, kuv tso cov uas faj xwm nyob saum koj tej ntsa loog, nruab hnub hmo ntuj lawv tej suab tsis ntsiag li. Nej cov uas ua kom (יחוח)Yahweh nco ntsoov tsis txhob so li, 7 thiab tsis txhob cia (יחוח)Yahweh so mus txog thaum nws tsim tsa Yeluxalees kom ruaj, thiab ua kom yog lub chaw rau ib tsoom hauv ntiajteb qhuas.

8 (יחוח)Yahweh tau cog lus khov kho rau nws txhais tes xis thiab nws txhais npab uas muaj zog hais tias, kuv yuav tsis muab koj tej qoob loo rau nej cov yeeb ncuab noj dua li lawm, thiab lwm haiv neeg yuav tsis haus nej tej cawv txiv hmab uas nej khwv tau.

9 Mas cov uas hlais yuav tau noj thiab qhuas (יחוח)Yahweh, thiab cov uas muab tej txiv hmab sau los cia yuav tau haus rau hauv kuv lub tuam tsev tej tshav puam.

10 Cia li tawm mus, cia li tawm plaws ntawm rooj loog mus, cia li npaj kev rau haiv neeg no, cia li tsub kev, cia li tsub txoj niag kev, thiab khaws tej pob zeb pov tseg kom du lug, cia li tsa chij rau saum ib tsoom tibneeg.

11(יחוח)Yahweh tau tshaj tawm mus thoob plaws ntiajteb hais tias, cia li hais rau Xi‑oo tus ntxhais tias, saib maj, koj txojkev dim tabtom los. Nws coj yeeb koob nrog nws los, tej nqe zog kuj nyob ntawm nws lub xubntiag.

12 Thiab luag yuav hu lawv tias, Cov tibneeg uas Dawbhuv, thiab cov uas (יחוח)Yahweh twb txhiv los lawm, thiab yuav hu koj hais tias, nrhiav tau los, yog lub nroog uas tsis muab tso tseg lawm.