Xov Zoo Hais Txog Cawm Xi‑oo Dim

1 Tus Tswv (יחוח)Yahweh Tus Ntsuj Plig Dawbhuv nyob saum kuv, vim (יחוח)Yahweh tau tsa kuv kom coj xov zoo mus rau cov uas raug txom nyem nyuaj siab. Nws txib kuv mus nplij cov uas lwj siab, thiab tshaj tawm txojkev ywj pheej rau cov uas raug ntes, thiab txojkev dim rau cov uas raug kaw hauv tsev lojfaj, 2 thiab tshaj tawm xyoo uas  (יחוח)Yahweh hlub, thiab hnub uas peb Tus Tswv ua pauj, thiab nplij txhua tus uas quaj ntsuag, 3 thiab pub rau cov uas quaj ntsuag hauv Xi‑oo, pub ntshuas paj hloov tshauv chaw rau lawv, thiab roj zoo siab xyiv fab hloov kev quaj ntsuag chaw, thiab pub lub tsho hu nkauj qhuas hloov lub siab uas qaug zog, xwv luag thiaj hu lawv tias cov ntoo qheb ncaj ncees uas (יחוח)Yahweh cog cia rau nws ua nws lub hwjchim ci ntsa iab tshwm los.

4 Lawv yuav tsim tej uas thaum ub pob tag lawm dua tshiab, lawv yuav kho tej qub uas yav nram ntej liamsim tag, lawv yuav kho tej moos uas pob tag lawd yog tej uas puam tsuaj tag ntau tiam tibneeg lawm.

5 Lwm haiv neeg yuav yug nej tej yaj tej tshis, tibneeg lwm tebchaws yuav laij nej tej teb thiab tu nej tej txiv hmab.

6 Nej yuav raug hu tias (יחוח)Yahweh cov pov thawj, luag yuav hais txog nej tias yog cov uas ua koom tu peb Tus Tswv. Nej yuav tau noj ib tsoom tebchaws tej nyiaj txiag, thiab nej yuav qhuas txog qhov uas lawv nplua nuj.

7 Kuv haiv neeg yuav tau ob npaug los hloov qhov uas lawv txaj muag, lawv yuav tau kev xyiv fab los hloov qhov uas lawv poob ntsej muag. Mas hauv lawv lub tebchaws lawv yuav tau ob npaug ua lawv teej tug, lawv yuav zoo siab xyiv fab mus ib txhis.

8 Kuv yog (יחוח)Yahweh, yog Tus Tswv uas nyiam kev txiav txim ncaj, kuv ntxub qhov uas ua tub sab thiab ua txhaum. Kuv yuav ua pauj rau lawv tiag tiag li, thiab kuv yuav cog lus tseg rau lawv mus ib txhis.

9 Lawv caj ces yuav muaj suab npe rau hauv ib tsoom tebchaws, lawv tej tub ki yuav muaj suab npe rau hauv ib tsoom tibneeg.

Txhua tus uas pom lawv yuav cim tau lawv tias lawv yog haiv neeg uas (יחוח)Yahweh foom koob hmoov rau lawm.

10 Kuv yuav zoo siab kawg rau hauv (יחוח)Yahweh, kuv tus ntsuj plig yuav xyiv fab hlo rau hauv kuv Tus Tswv, rau qhov nws muab txojkev cawm dim ua lub tsho rau kuv hnav, thiab muab txojkev ncaj ncees ua lub tsho ntev kauv kuv, ib yam nkaus li tus nraug vauv coj ntshuas paj, thiab yam nkaus li tus nkauj nyab coj npauj nyiaj npauj kub.

11 Tej kaus tuaj hauv av li cas thiab tej teb ua rau tej noob uas muab tseb tuaj hlob li cas,

(יחוח)Yahweh ua rau txojkev ncaj ncees thiab kev qhuas tuaj hlob tab meeg ib tsoom tebchaws sawvdaws ib yam li ntawd.