Xi‑oo Yuav Tau Koob Meej

1 Cia li sawv tsees tsom tus duab ci, rau qhov koj txojkev kaj los lawm, thiab (יחוח)Yahweh lub hwjchim ci ntsa iab tuaj rau saum koj. 2 Saib maj, kev tsaus ntuj yuav los laum ntiajteb, thiab kev tsaus ntuj dub nciab yuav laum ib tsoom tibneeg. Tiamsis (יחוח)Yahweh yuav sawv rau saum koj, mas luag yuav pom nws lub hwjchim ci ntsa iab nyob saum koj. 3 Tej tebchaws yuav los rau ntawm koj txojkev kaj, thiab tej vajntxwv yuav los rau ntawm koj uas nyuam qhuav tawm tuaj ci kaj lug. 4 Cia li tsa koj lub qhov muag saib rau ib ncig thiab pom, lawv sawvdaws sau zog ua ke tuaj cuag koj. Koj cov tub yuav tuaj deb deb li tuaj, thiab lawv yuav puag koj cov ntxhais tuaj. 5 Mas koj yuav pom thiab xyiv fab luag ntxhi, koj xyiv fab siab dhia pig poog, rau qhov tej kev nplua nuj hauv hiavtxwv luag yuav coj los rau koj, ib tsoom tebchaws tej nyiaj txiag yuav los rau koj. 6 Tej niag pab ntxhuav yuav tuaj laum nkaus koj, yog cov Midees thiab Efas tej ntxhuav mos. Thiab txhua tus ntxhuav hauv Senpas yuav tuaj, lawv yuav coj kub coj roj ntoos tsw qab tuaj thiab lawv yuav qhia txog tej uas tsim nyog qhuas (יחוח)Yahweh. 7 Tej pab tshis pab yaj huvsi ntawm Khedas yuav muab sau zog tuaj rau koj, tej txiv yaj ntawm Nenpayaus yuav tu koj. Kuv txais yuav tej tsiaj ntawd uas xyeem rau saum kuv lub thaj, thiab kuv yuav ua rau kuv lub tuam tsev uas muaj koob meej nto moo lug. 8 Tej no yog leejtwg nev, uas ya los li tej huab thiab yam li nquab taug ya los rau ntawm lub chaw nyob? 9 Tej tebchaws ntawm ntug hiavtxwv yuav tos kuv, thiab Thasis tej nkoj txwg tuaj ua ntej, coj koj cov tub deb deb los, coj nrog lawv tej nyiaj tej kub ua ke los, yog saib rau koj Tus Tswv (יחוח)Yahweh lub npe thiab saib rau tus Dawbhuv hauv cov Ixayees, vim nws tau ua rau koj tau koob meej. 10 Lwm haiv neeg yuav tsim koj tej ntsa loog, thiab lawv tej vajntxwv yuav zwm rau koj. Vim kuv npau taws kuv thiaj nplawm koj, tiamsis vim kuv hlub kuv thiaj khuvleej koj. 11 Koj tej rooj loog yuav qheb lug mus li, nruab hnub hmo ntuj yuav tsis muab kaw, tibneeg thiaj coj tau ib tsoom tebchaws tej nyiaj txiag thiab cab lawv tej vajntxwv tuaj rau koj. 12 Haiv neeg twg thiab lub tebchaws twg uas tsis ua num rau koj yuav puam tsuaj, tej tebchaws ntawd yuav raug muab tso tseg piam tag huvsi. 13 Lenpanoos lub koob meej yuav los rau koj, tej ntoo ciab nplooj suab, tej ntoo seb, thiab tej thuv yuav los thiaj ua tau qhov chaw uas pe kuv zoo nkauj. Kuv yuav ua lub chaw uas tiag kuv ko-taw tau koob meej. 14 Cov tibneeg uas quab yuam koj tej tub yuav tuaj khoov ntshis pe koj, thiab txhua tus uas saib tsis taus koj, yuav khoov ntshis pe ntawm koj kotaw. Lawv yuav hu koj tias yog (יחוח)Yahweh lub nroog, yog Ixayees Tus Tswv uas Dawbhuv lub nroog Xi‑oo. 15 Txawm yog koj raug muab tso tseg thiab raug luag ntxub, tsis muaj leejtwg hla koj tuaj li, los kuv yuav ua rau koj tau hwjchim meej mom mus ib txhis, thiab ua chaw zoo siab xyiv fab rau ib tiam dhau ib tiam. 16 Koj yuav tau ntxais ib tsoom tebchaws li kua mis, thiab koj yuav tau ntxais tej vajntxwv li mis.

Koj yuav paub tias kuv (יחוח)Yahweh yog koj tus cawmseej thiab tus uas txhiv koj, yog Yakhauj Tus Tswv uas muaj hwjchim loj kawg. 17 Kuv yuav coj kub los nyob tooj liab chaw, thiab coj nyiaj los nyob hlau chaw, coj tooj liab nyob ntoo chaw, thiab coj hlau nyob pob zeb chaw. Kuv yuav muab txojkev haum‎ xeeb ua tus uas tswjhwm koj, thiab muab txojkev ncaj ncees ua tus uas coj koj ua haujlwm. 18 Hauv koj lub tebchaws yuav tsis hnov qhov uas ua nruj ua tsiv dua li lawm, hauv koj ciam teb yuav tsis hnov kev puam tsuaj lossis kev liamsim. Koj yuav hu koj lub ntsa loog tias, Txojkev cawm dim, thiab hu koj tej rooj loog tias, Qhuas.

19 Nruab hnub lub hnub yuav tsis ci rau koj dua li lawm, hmo ntuj lub hli yuav tsis ci kaj lug lawm, tiamsis (יחוח)Yahweh yuav ua lub teeb ci rau koj mus ib txhis, thiab koj Tus Tswv yuav ua koj lub koob meej. 20 Koj lub hnub yuav tsis txawj poob qho, koj lub hli yuav tsis txawj nqeg, rau qhov (יחוח)Yahweh lub teeb ci kaj rau koj mus ib txhis, thiab lub sijhawm uas koj quaj ntsuag yuav tag tsis muaj li lawm. 21 Koj cov tibneeg yuav ncaj ncees huvsi, lawv yuav tau lub tebchaws ua lawv teej lawv tug mus ib txhis. Lawv yog tej ntsuag uas kuv cog thiab yog tej uas kuv txhais tes ua, kuv thiaj ua tau kuv lub hwjchim ci ntsa iab tshwm los. 22 Tus uas yau kawg yuav tau ua ib xeem, tus uas me dhau yuav tau ua ib haiv neeg uas muaj hwjchim. Kuv yog (יחוח)Yahweh, thaum txog sijhawm kuv yuav maj nroos ua.