(יחוח)Yahweh Teem Txim Rau Ib Tsoom Tebchaws

1 (יחוח)Yahweh hais li no tias, lub ntuj yog kuv lub zwm txwv, lub ntiajteb yog kuv lub rooj tiag taw, mas lub tsev uas nej yuav ua rau kuv yuav nyob qhovtwg, thiab kuv lub chaw so yuav nyob qhovtwg? 2 Tej no puavleej yog kuv txhais tes ua thiaj muaj huvsi tshwm los. (יחוח)Yahweh hais li no ntag. Tus uas kuv yuav saib ntsoov yog tus uas txo hwjchim thiab lees txim tuaj nruab siab thiab tshee hnyo rau kuv tej lus. 3 Tus uas tua nyuj xyeem zoo yam li tus uas tua tibneeg. Tus uas tua menyuam yaj xyeem zoo yam li tus uas lov dev caj dab. Tus uas ua kevcai xyeem qoob loo zoo yam li tus uas muab ntshav npua los xyeem, tus uas ua kevcai xyeem roj ntoos tsw qab ua lub chaw cim ntsoov, zoo yam li tus uas pe dab mlom. Lawv cov no nyias xaiv taug nyias txojkev, thiab lawv zoo siab rau lawv tej kev qias vuab tsuab. 4 Kuv yuav xaiv kev txom nyem nyuaj siab rau lawv, thiab coj tej uas lawv ntshai los raug lawv, rau qhov thaum kuv hu tsis muaj leejtwg teb, thaum kuv hais tsis muaj leejtwg mloog. Lawv ua tej uas kuv pom tias phem kawg thiab xaiv yuav yam uas kuv tsis nyiam.

5 Nej cov uas tshee hnyo rau (יחוח)Yahweh tej lus, cia li mloog nws tej lus hais tias, nej cov kwvtij uas ntxub nej thiab muab nej laim tseg vim yog saib rau kuv lub npe tau hais tias, thov cia (יחוח)Yahweh tau koob meej xwv peb thiaj tau pom nej tej kev xyiv fab. Tiamsis lawv cov ntawd yog cov uas yuav raug txaj muag.

6 Cia li mloog saib, muaj suab nrov ntsoog qees hauv lub nroog, muaj suab nrov hauv lub tuam tsev tuaj. Twb yog lub suab uas (יחוח)Yahweh ua pauj nws cov yeeb ncuab ntag. 7 Ua ntej uas nws tsis tau ua mob plab nws twb yug menyuam lawm, ua ntej uas nws tsis tau mob plab nws kuj yug tau ib tug tub.

8 Leejtwg txeev hnov dua li no? Leejtwg txeev pom tej uas zoo li no? Ib hnub xwb yuav tshwm sim tau lub tebchaws lov? Ib pliag ntshis xwb yuav yug tau ib haiv neeg lov? Thaum Xi‑oo pib mob plab yug, nws yug tau nws tej tub tamsim ntawd. 9 (יחוח)Yahweh hais tias, kuv coj los txog sijhawm lawm es tseem yuav tsis pub cia yug lov? Nej Tus Tswv hais tias, kuv uas pub kom yug yuav kaw lub plab menyuam lov? 10 Nej cov sawvdaws uas nyiam Yeluxalees es, nej cia li nrog nws xyiv fab thiab zoo siab rau nws. Nej cov sawvdaws uas quaj ntsuag nws es, nej cia li nrog nws zoo siab xyiv fab. 11 Nej thiaj tau ntxais kom tsau rau hauv nws lub xubntiag uas txawj nplij nej, thiab nej thiaj tau haus nws lub koob meej uas muaj nplua mias zoo siab hlo. 12 (יחוח)Yahweh hais li no tias, saib maj, kuv yuav pub kev vam meej rau nws ib yam li tus niag dej, thiab pub ib tsoom tebchaws tej nyiaj txiag rau nws yam li tus niag dej uas ntws los nyab kiag. Nej yuav tau ntxais, nws yuav puag nej rau ntawm nws lub xubntiag thiab nchos ntawm nws hauv caug.

13 Ib yam li leej niam nplij tus menyuam, kuv yuav nplij nej li ntawd, nej yuav tau txais kev nplij siab rau hauv Yeluxalees. 14 Nej yuav pom thiab nej yuav zoo siab xyiv fab, nej tej pob txha yuav hlob mos nyoos yam li tej nroj tsuag. Mas luag yuav paub tias (יחוח)Yahweh txhais tes nrog nraim nws cov tub qhe nyob, thiab nws txojkev chim tawm tsam nws cov yeeb ncuab. 1 5 (יחוח)Yahweh yuav nrog nplaim taws los, thiab nws tej tsheb ua rog los zoo yam li cua daj cua dub. Nws yuav coj nws txojkev chim los ua npau vog, thiab nws yuav xuas nplaim taws qhuab ntuas.

16 (יחוח)Yahweh yuav xuas hluavtaws thiab nws rab ntaj txiav txim rau ib tsoom tibneeg, mas cov uas raug (יחוח)Yahweh tua tuag yuav coob kawg li. 17 Cov uas tu thiab ntxuav lawv tus kheej kom Dawbhuv thiaj nkag tau rau hauv tej vaj, mus raws kua tus uas nyob hauv lawv nruab nrab, thiab noj nqaij npua thiab nqaij nas tsuag thiab tej uas qias vuab tsuab, mas lawv yuav ua ke mus txog qhov kawg. (יחוח)Yahweh hais li no ntag. 18 Kuv paub tej uas lawv ua thiab tej uas lawv xav, mas kuv los qaws ib tsoom tebchaws thiab cov tibneeg uas hais txhua yam lus huvsi. Lawv yuav tuaj pom kuv lub hwjchim ci ntsa iab. 19 Kuv yuav txawb ib yam txujci rau hauv lawv nruab nrab. Thiab kuv yuav txib cov uas dim kev tuag mus rau ib tsoom tebchaws, yog mus rau tebchaws Thasis thiab cov tibneeg Puj thiab Lus uas txawj tua hneev nti, thiab mus txog tebchaws Thunpas thiab tebchaws Yavas, mus txog tej tebchaws ntawm ntug hiavtxwv uas deb kawg, yog cov uas tsis tau hnov kuv lub koob meej thiab tsis tau pom dua kuv lub hwjchim ci ntsa iab. Mas lawv yuav qhia kuv lub hwjchim ci ntsa iab hauv nruab nrab ib tsoom tebchaws. 20 Lawv yuav coj nej tej kwv-tij sawvdaws tawm hauv ib tsoom tebchaws huvsi los xyeem rau (יחוח)Yahweh, yuav caij tej nees tej tsheb ua rog tej tsheb nyuj thiab caij luj txwv thiab caij ntxhuav los rau hauv Yeluxalees uas yog kuv lub roob Dawbhuv, ib yam li cov Ixayees coj tej uas ua kevcai xyeem qoob loo hauv lub choo uas huv lawd tuaj xyeem rau hauv (יחוח)Yahweh lub tuam tsev. (יחוח)Yahweh hais li no ntag. 21 Thiab kuv yuav muab lawv cov qee leej ua pov thawj thiab ua cov Levis. (יחוח)Yahweh hais li no ntag.

22 (יחוח)Yahweh hais tias, lub ntuj tshiab thiab lub ntiajteb tshiab uas kuv yuav tsim nyob ruaj rau ntawm kuv xubntiag li cas, nej caj ces thiab nej lub npe yuav nyob ruaj ib yam li ntawd. 23 Txhua hnub hli xiab mus txog hnub hli tag thiab txij hnub Sabbath mus txog lwm hnub Sabbath ib tsoom tibneeg sawvdaws yuav tuaj pe hawm rau ntawm kuv xubntiag. (יחוח)Yahweh hais li no ntag.

24 Thiab lawv yuav tawm mus saib tej tibneeg uas fav xeeb rau kuv tej cev tuag. Tej kas uas noj lawv yuav tsis tuag thiab tej hluavtaws uas kub lawv yuav tsis tuag li, lawv yuav qias vuab tsuab rau ib tsoom tibneeg sawvdaws.