1 Cia li tsa suab hu nimno.  Muaj leejtwg yuav teb koj?  Koj yuav tig mus cuag tus timtswv twg?

2 Txojkev chim siab yuav tua tus uas ruam, txojkev sib khib yuav tua tus uas tsis thoob tsib.

3 Kuv tau pom tus ruam cog cag tob, tiamsis tamsim ntawd, nws lub tsev kuj raug tsawm foom.

4 Nws tej menyuam nyob deb ntawm lub chaw tso siab plhuav, lawv raug quab yuam ntawm rooj loog uas tu plaub, tsis muaj leejtwg cawm lawv dim.

5 Tej uas tus ruam hlais mas cov tibneeg tshaib muab noj lawm, txawm yog tej uas tuaj hauv cov pos los lawv muab rho mus lawm, thiab cov tibneeg nqhis dej raws nws tej nyiaj ua txog siav qhi.

6 Txojkev txom nyem nyuaj siab, tsis yog tawm hauv hmoov av los, thiab txojkev ceeblaj, tsis yog ua kaus tawm hauv av tuaj.

7 Tibneeg yug los yeej yuav raug kev ceeblaj yam li lub txim taws uas yeej ya rau saud.

8 Kuv tus kheej mas kuv yuav nrhiav (יחוח)Yahweh, thiab muab kuv tej teeb meem tso rau (יחוח)Yahweh,

9 nws yog tus uas ua tej haujlwm loj uas paub tsis tag, thiab ua tej txujci tseem ceeb uas suav tsis txheeb.

10 Nws pub nag los rau saum lub ntiajteb, thiab tso dej los rau saum tej liaj teb. 11 Nws muab cov tibneeg qis tsa rau saum lub chaw siab, thiab muab cov tibneeg quaj ntsuag tsa rau saum lub chaw tso siab plhuav.

12 Nws tav cov tibneeg ntse tej tswvyim phem, kom lawv txhais tes ua tsis tau abtsi kom tiav.

13 Nws siv cov tibneeg muaj tswvyim txojkev ntse rov ntes lawv, thiab ua rau cov tibneeg siab nkhaus tej tswvyim ploj ntais sai kawg.

14 Lawv ntsib txojkev tsaus ntuj nti rau thaum nruab hnub, thiab thaum tav su los lawv xuas ib yam li hmo ntuj.

15 (יחוח)Yahweh cawm cov tibneeg pluag dim lub qhov ncauj hniav ntaj, thiab cawm cov uas txom nyem dim hauv cov uas muaj zog txhais tes.

16 Cov pluag thiaj li muaj vam, thiab txojkev tu plaub tsis ncaj kaw nws lub qhov ncauj.

17 Saib maj, tus tibneeg twg uas (יחוח)Yahweh ntuas kuj tau koob hmoov, yog li no tsis txhob saib tsis taus qhov uas tus muaj hwjchim loj kawg nkaus nplawm qhuab qhia.

18 Nws ua kom mob, tiamsis nws yuav qhwv lub qhov txhab. Nws nplawm, tiamsis nws txhais tes yuav kho.

19 Nws yuav cawm koj dim hauv rau yam kev ceeblaj, hauv xya yam yuav tsis muaj xwm txheej phem los raug koj.

20 Thaum muaj kev tshaib nqhis, nws yuav txhiv koj dim hauv txojkev tuag, thaum ua rog, nws yuav cawm koj dim hniav ntaj hniav riam.

21 Yuav muab koj zais ntawm tus nplaig uas xyav tsis zoo, thiab koj yuav tsis ntshai thaum kev puam tsuaj los txog.

22 Koj yuav luag txojkev puam tsuaj thiab txojkev tshaib nqhis, thiab koj yuav tsis ntshai tej tsiaj qus hauv lub ntiajteb.

23 Koj yuav nrog tej pob zeb hauv daim teb sib raug zoo, thiab tej tsiaj qus yuav nrog koj nyob zoo zoo.

24 Koj yuav paub tias, koj lub tsev ntaub nyob tso siab plhuav, koj tshuaj saib koj lub nkuaj yaj yuav tsis ploj ib tug li.

25 Koj yuav paub tias koj caj ces yuav coob kawg, thiab koj tej tub ki yuav zoo yam nkaus li tej nroj tsuag hauv ntiajteb.

26 Koj yuav los rau hauv koj lub qhov ntxa rau thaum koj laus heev lawm, yam li tej tes qoob uas coj los rau hauv tshav ntaus qoob raws li lub sijhawm.

27 Tej no yog tej uas peb tau tshuaj saib los, muaj tseeb.  Cia li mloog thiab kawm paub thiaj muaj qabhau rau koj.