Yauj Teb

1 Mas Yauj teb tias,

2 Au, kuv xav muab kuv tej kev ntxhov siab luj, thiab muab kuv tej kev txom nyem huvsi tso rau saum rab teev.

3 Mas yuav nyhav dua tej xuab zeb hauv hiavtxwv, vim li no, kuv tej lus thiaj tawm ua kub lug.

4 Vim tus uas muaj hwjchim loj kawg nkaus rab xub chob kuv, kuv tus ntsuj plig haus tej kua tshuaj lom, txojkev ntshai uas tuaj ntawm (יחוח)Yahweh npaj txhij tuaj tawm tsam kuv.

5 Nees luav qus yuav quaj rau thaum nws muaj zaub noj lov?  Txiv nyuj yuav nqov rau saum nws pawg zaub lov?

6 Yuav noj zaub tsuag tsis rau ntsev tau lov? Cov kua qe dawb dawb nyob hauv lub qe qab li cas? 

7 Tej yam ntawd kuv lub siab tsis xav kov kiag li, txhua yam zaub mov ntawd kuv dhuav tag.

8 Au, kuv xav tau raws li kuv thov, thiab xav kom (יחוח)Yahweh pub raws li uas kuv lub siab ntshaw.  

9 Thiab xav tias, (יחוח)Yahweh txaus siab muab kuv zuaj, thiab tsis txhob nkaum tes rau qhov uas muab kuv txiav pov tseg.

10 Qhov no yuav nplij tau kuv lub siab, txawm yog kuv mob tsis tu li los kuv yuav zoo siab kawg, rau qhov kuv tsis tau kwv tawv tus uas Dawb huv tej lus.

11 Kuv muaj zog li cas es kuv yuav tau tos? Thiab kuv qhov kawg yog abtsi es kuv yuav tau ua siab ntev thev?

12 Kuv lub zog zoo li tej pob zeb lov, kuv tej nqaij yog nqaij tooj liab lov?

13 Kuv tus kheej pab tsis tau kuv, txhua txojkev pab khiav ntawm kuv lawm.

14 Leejtwg tav txojkev hlub ntawm tus kwvluag, kuj yog tso qhov uas hwm thiab ntshai tus uas muaj hwjchim loj kawg nkaus tseg.

15 Kuv cov kwvtij pheej ntxeev ntxias yam li lub hav dej qhuav thaum tsis muaj nag, tiamsis thaum lub caij ntuj nag mas dej ho ntau phwj yos,

16 thiab tsaus nti, vim yog tej dej uas nkoog khov thiab tej daus yaj rau hauv.

17 Thaum tshav ntuj kub kuj yaj tag, thaum tshav ntuj kub heev, kuj ploj tag ntawm lub chaw lawm.

18 Cov tub lag tub luam uas taug kev, kuj tig lug ntawm lawv txojkev, lawv mus rau tej ntuj nrag teb do thiab puam tsuaj tag.

19 Cov tibneeg uas taug kev ntawm Themas tuaj nrhiav, cov tub lag tub luam uas taug kev ntawm lub moos Senpas muaj chaw vam.

20 Lawv plam, vim yog lawv vam ntsoov, lawv tuaj txog qhov ntawd mas lawv nyuaj siab heev.

21 Nimno nej zoo ib yam li ntawd rau kuv, nej pom kuv tej kev txom nyem mas nej ntshai.

22 Kuv puas tau hais rau nej tias, thov pub mentsis tshav ntuj rau kuv, lossis thov nej li nyiaj?

23 Kuv puas tau hais rau nej tias, muab kuv tus yeeb ncuab li hwjchim rau kuv, lossis thov txhiv kuv kom dim hauv kuv tus yeeb ncuab txhais tes?  

24 Qhia rau kuv saib kuv tau ua txhaum li cas, ces kuv mam li nyob twjywm tsis hais lus ntxiv lawm. Qhia kuv saib kuv ua txhaum qhov twg.

25 Lo lus hais ncaj muaj hwjchim heev, tiamsis nej lo lus ntuas yog ntuas abtsi?

26 Nej xav tias nej qhuab ntuas kuv tej lus thiab saib tus uas tsis muaj chaw vam tej lus zoo li cua xwb lov?

27 Nej yeej yuav rho ntawv thiaj tau tus menyuam ntsuag uas tsis muaj txiv, thiab yuav muab nej tus kwvluag ntaus nqi muag los sav.

28 Nimno thov nej tsa muag saib kuv, rau qhov tsis yog kuv tab meeg dag nej.

29 Thov nej xav dua tshiab, tsis txhob ua tsis ncaj.  Thov ntxeev dua siab, kuv tseem ua raug cai.

30 Kuv tus nplaig hais ib yam abtsi tsis ncaj lov? Kuv tus nplaig tsis txawj sim paub kev txom nyem lov?