1 Tibneeg tsis ua haujlwm khwv khwv hauv ntiajteb no lov? Thiab lawv lub neej zoo tsis thooj li cov uas ua zog lov?

2 Ib yam li tus qhev tos nrhw duab ntxoov ntxoo, thiab yam li tus tub zog uas tos rawv cov nqi zog,

3 ib yam li ntawd, kuv li feem yog nyob ntau lub hli qhuav qhawv, thiab tej uas faib rau kuv yog hmo ntuj raug kev txhawj xeeb ntxhov siab.

4 Thaum kuv pw kuv hais tias, thaum twg kuv li sawv? Tiamsis hmo ntuj kuj ntev, kuv ntxeev mus ntxeev los txog kaj ntug.

5 Kuv tej nqaij muaj kas lwj thiab lo hmoov av, kuv daim tawv tu pleb ntsuav thiab rov ua kua paug.

6 Kuv lub hnub nyoog sai dua tus nqos uas tab tom ntos ntaub, mas thaum kawg kuj tsis muaj chaw vam.

7 (יחוח)Yahweh, thov nco tias kuv txojsia tsuas ntev li ua ib pas cua xwb, kuv lub qhov muag yuav tsis pom qhov zoo dua li lawm.

8 Tus uas lub qhov muag pom kuv nimno, yuav tsis pom kuv dua li lawm, koj yuav nrhiav kuv los yuav nrhiav tsis pom kuv lawm.

9 Tej huab yaj xam tag li cas, tus uas mus rau hauv tub tuag teb yeej tsis rov los ib yam li ntawd.

10 Nws tsis rov mus rau hauv nws lub tsev dua li lawm, thiab nws tsev neeg yuav tsis pom nws dua li lawm.

11 Vim li no kuv thiaj tsis tswj kuv lub qhov ncauj, kuv tus ntsuj plig txom nyem lwj siab kuv thiaj hais, iab kuv lub siab kawg kuv thiaj yws.

12 Kuv yog hiavtxwv lossis yog ib tug zaj uas nyob qhov tob tob, koj thiaj xav muab kuv cov lus xauv cia lov?

13 Thaum kuv hais tias, kuv lub rooj zaum yuav zooj rau kuv thiab kuv lub txaj pw yuav pab tau kuv tsis mob ib ce,

14 ces koj ua rau kuv ua yog toog ntshai heev, thiab ua rau kuv ua yog toog pom tej yam ua rau kuv ntshai kawg,

15 kuv thiaj xaiv qhov uas raug zawm caj pas tuag, zoo dua li muaj txojsia nyob nrog kuv tej pob txha.

16 Kuv ntxub kuv txojsia lawm, kuv tsis xav nyob mus ib txhis.  Thov tso kuv nyob kuv ib leeg, vim kuv lub hnub nyoog ntev li ua ib pas cua xwb.

17 Tibneeg yog abtsi es koj yuav suav tias tseem ceeb heev, thiab koj yuav mob siab lawv,

18 thiab niaj tagkis tuaj saib lawv, thiab sim lawv txhua lub sijhawm?

19 Koj yuav tsis fee plhu ntawm kuv ib nyuag pliag thiab tsis tso kuv nyob kuv ib leeg ntev li uas kuv nqos ib pa qaub ncaug lov?

20 Au koj uas yog tus uas zov tibneeg, yog kuv ua txhaum, kuv tau ua li cas rau koj lawm? Ua cas koj muab kuv ua daim phiaj rau koj? Ua cas kuv ua lub nra nyhav rau koj lawm?  

21 Ua cas koj tsis zam kuv tej kev ntxeev siab thiab tsis daws kuv lub txim mus pov tseg?  Rau qhov nimno kuv yuav pw rau hauv av, koj yuav nrhiav kuv tiamsis tsis muaj kuv lawm.