Npidas Hais

1 Ces Npidas uas yog tibneeg Su‑as teb tias,

2 koj yuav yws li no ntev li cas thiab tej lus uas tawm hauv koj lub qhov ncauj yuav ua cua daj cua dub ntev li cas?

3 (יחוח)Yahweh ntxeev txojkev ua ncaj lov? Tus uas muaj hwjchim loj kawg nkaus qhau cai lov?

4 Yog koj cov menyuam ua txhaum rau (יחוח)Yahweh, nws thiaj rau txim rau lawv raws li lawv tej kev ntxeev siab.

5 Yog koj nrhiav (יחוח)Yahweh thiab taij thov tus uas muaj hwjchim loj kawg nkaus,

6 yog koj dawb huv thiab siab ncaj mas nws yuav sawv tsees pab koj, thiab yuav thim lub chaw uas yog koj teej koj tug rov rau koj.

7 Txawm yog thaum chiv thawj koj me me xwb, los thaum kawg koj yuav ua loj kawg.

8 Kuv thov kom koj nug txog yav thaum ub, thiab xav saib tej poj koob yawm txwv nrhiav tau yam twg,

9 rau qhov peb nyuam qhuav yug nag hmo xwb mas tsis paub abtsi li, vim peb lub sijhawm saum lub ntiajteb yog tus duab xwb.

10 Lawv yuav tsis qhuab qhia koj thiab tsis hais rau koj lov, thiab tsis hais tej uas lawv nkag siab rau koj lov?

11 Tauj deg yuav tuaj rau hauv qhov uas tsis muaj pas iav tau lov? Pas iav yuav hlob zoo rau hauv qhov tsis muaj dej tau lov?

12 Thaum txhawv lawm tsis tau muab txiav, los twb qhuav nkig nkuav ua ntej dua lwm yam ntoo.

13 Txhua tus uas tsis nco (יחוח)Yahweh lawd kuj zoo li ntawd ntag. Cov uas tsis hwm (יחוח)Yahweh, lawv lub chaw vam yuav puam tsuaj tag.

14 Yam uas lawv tso siab rau kuj lov ntho lawm, thiab tej uas lawv cia siab rau yog sab kab laug tsov.

15 Yog lawv pheeb rau tej sab kab laug tsov, tej sab ntawd yuav tu, lawv tuav tej sab ntawd tiamsis tej sab ntawd tsis ruaj.

16 Lawv zoo li tsob ntoo uas muaj dej yug rau thaum tshav ntuj kub, thiab lawv tej ntsuag hlav mus puv nkaus lawv lub vaj.

17 Lawv tej cag kuj nrhau mus tuav tej pob zeb, thiab saib mus rau hauv tej kem pob zeb.

18 Yog tsob ntoo raug muab ua puam tsuaj tag ntawm nws lub chaw, lub chaw ntawd yuav tsis lees paub nws thiab hais tias, kuv tsis tau pom dua koj.  

19 Saib maj, no yog lawv txojkev kaj siab, thiab lwm tus yuav ua kaus tawm hauv av tuaj.  

20 (יחוח)Yahweh yeej yuav tsis tso tus tibneeg zoo tseg, lossis tuav tus tibneeg ua phem tes.

21 Nws tseem yuav pub koj lub qhov ncauj luag puv nkaus, thiab ua rau koj daim tawv ncauj qw zoo siab.

22 Cov uas ntxub koj yuav raug txaj muag, thiab cov tibneeg phem lub tsev ntaub yuav tsis muaj dua li lawm.