Yauj Teb

1 Yauj teb tias,

2 qhov tseeb kuv paub tias yog li ntawd, tiamsis tibneeg yuav ua ncaj rau ntawm (יחוח)Yahweh xubntiag tau li cas?

3 Yog leejtwg xav nrog (יחוח)Yahweh sib cav, mas ib txhiab zaug los nws twb teb tsis tau (יחוח)Yahweh ib zaug.   

4 (יחוח)Yahweh lub siab ntse, thiab nws muaj zog heev, leej twg tau tawm tsam nws thiab kov yeej?

5 Nws yog tus uas muab tej roob txav los tej roob kuj tsis paub, rau thaum nws muab tej roob ntxeev ua npau taw vog.

6 Nws co lub ntiajteb txav ntawm lub qub chaw, thiab tej ncej uas txawb lub ntiajteb kuj ua zog kais.

7 Nws nkaw lus rau lub hnub mas lub hnub tsis tawm tuaj, nws thaiv tej hnub qub tsis pub ci tuaj.

8 Nws tib leeg nthuav lub ntuj, thiab tsuj tej nthwv dej hauv hiavtxwv.

9 Nws tsim hnub qub Khais thiab hnub qub Poj Sua Kwv Ntas thiab hnub qub Txhiaj Txiv Mim thiab tej hnub qub sab nrad.

10 Nws ua tej haujlwm loj uas tsis txawj nkag siab tau, thiab tej txujci tseem ceeb suav tsis txheeb.

11 Ua ciav, nws hla kuv mus lawm, kuv twb tsis pom nws, nws mus dhau lawm, kuv twb xam tsis pom nws.

12 Saib maj, nws txeeb kiag mus lawm, leejtwg yuav txwv tau?  Leejtwg yuav hais rau nws tias, koj ua abtsi li kod?

13 (יחוח)Yahweh yuav tsis thim nws txojkev chim. Tus zaj laug Lahaj cov qhev khwb nkaus hauv nws xib taws.

14 Mas kuv yuav teb tau (יחוח)Yahweh li cas, yuav xaiv lo lus twg los cav nws?

15 Txawm yog kuv tsis txhaum, kuv kuj teb tsis tau nws. Kuv tsuas thov tus thawj txiav txim kom zam txim rau kuv xwb.  

16 Yog kuv hu nws tuaj thiab nws teb kuv, los kuv tsis ntseeg tias nws yuav mloog kuv lus,

17 rau qhov nws siv cua daj cua dub zuaj kuv, txawm yog tsis tim li cas los nws ua rau kuv mob nyhav zuj zus tuaj.

18 Nws tsis pub kuv ua tau pa li, tsuas yog tsav kev lwj siab puv nkaus rau kuv xwb.

19 Yog muaj kev sib ntsuas zog, nws yog tus uas muaj hwjchim loj tshaj plaws, yog muaj kev ua plaub ua ntug, leejtwg yuav teem tau nws tuaj?

20 Txawm yog kuv tsis txhaum, los kuv lub qhov ncauj yuav hais kuv qhov txhaum, yog kuv hais tias kuv zoo kawg, los kuv lub qhov ncauj yuav tshuaj tau tias kuv tsis ncaj.

21 Kuv zoo tsis muaj chaw thuam li, kuv tsis mob siab kuv tus kheej, kuv ntxub kuv txojsia.

22 Sawvdaws zoo ib yam nkaus, vim li ntawd kuv thiaj hais tias, (יחוח)Yahweh ua rau cov tibneeg zoo puam tsuaj nrog rau cov tibneeg limhiam huvsi.

23 Thaum tej vij sub vij sw coj kev tuag los tamsid, nws kuj thuam luag cov uas tsis txhaum tej kev txom nyem.

24 Lub ntiajteb muab cob rau hauv cov tibneeg limhiam txhais tes. Nws npog cov uas tu plaub hauv lub ntiajteb lub qhov muag. Tsis yog nws es yog leejtwg?

25 Kuv lub hnub nyoog mus sai dua li tus tub xa ntawv, mus dhau plaws lawm tsis pom ib qhov zoo kiag li.

26 Hnub nyoog dhau plaws yam li lub nkoj uas xuas pias iav ua, yam nkaus li tus dav ya uas ntsaub ntsuav los rau tus qauv.

27 Yog kuv hais tias, kuv yuav tsis nco qab kuv txojkev quaj txom nyem, thiab kuv yuav tso kuv lub ntsej muag mluas mlob tseg thiab luag ntxhi,

28 kuv kuj ntshai kuv tej kev txom nyem huvsi, rau qhov kuv paub tias koj yuav tsis suav hais tias kuv tsis txhaum.

29 Kuv yeej yuav raug rau txim, mas kuv yuav siv zog do do ua abtsi?

30 Yog kuv muab tej daus los ntxuav kuv, thiab muab kua tshuaj los ntxuav kuv txhais tes,

31 los koj tseem yuav muab kuv raus rau hauv lub qhov dej qias, thiab kuv tej ris tsho yuav ntxub kuv.

32 (יחוח)Yahweh tsis yog tibneeg zoo li kuv uas kuv yuav teb nws, thiab tuaj nrog nws ua plaub.

33 Tsis muaj ib tug uas nyob nruab nrab wb ob tog, ua tus uas cheem tau wb ob leeg.

34 Thov nws tshem nws tus nplawm ntawm kuv mus, thiab thov qhov uas ntshai rwg nws tsis txhob ua rau kuv ntshai.

35 Mas kuv yuav hais thiab thiaj tsis ntshai nws, rau qhov nimno kuv lub siab ua tsis tau li ntawd.