(יחוח)Yahweh Loj Kawg Nkaus

1 Vim li no nej yuav tau hlub (יחוח)Yahweh uas yog nej Tus Tswv thiab tuav rawv tej lus uas nws qhia thiab nws tej kab ke thiab nws tej kevcai thiab nws tej lus cob qhia mus li.

2 Hnub no nej yuav tau nco ntsoov txog (יחוח)Yahweh uas yog nej Tus Tswv txoj kev nplawm qhuab qhia. Twb yog nej pom, tsis yog nej cov menyuam paub thiab pom. Nej cia li nco txog (יחוח)Yahweh uas loj kawg nkaus thiab nws txhais tes uas muaj hwj chim thiab nws txhais npab uas tsa hlo,

3 thiab nco txog nws tej txujci tseem ceeb uas nws ua rau Iziv tus vajntxwv Falaus thiab nws lub teb chaws huvsi,

4 thiab tej uas nws ua rau Iziv pab tub rog thiab cov nees thiab lawv tej tsheb ua rog, thiab ua rau Hiavtxwv Liab nphau nyab kiag lawv rau thaum lawv raws caum nej, (יחוח)Yahweh thiaj ua rau lawv puam tsuaj txog niaj hnub nimno.

5 Thiab nco txog tej uas nws ua rau nej hauv tebchaws moj sab qhua mus txog thaum nej los txog ntawm no,

6 thiab tej uas nws ua rau Dathas thiab Anpilas uas yog Elias cov tub thiab yog Lunpees cov xeeb ntxwv, uas yog thaj av rua ncauj nqos kiag lawv thiab lawv tsev neeg thiab lawv tej tsev ntaub thiab txhua yam muaj sia uas nrog lawv nyob, tab meeg cov Ixayees sawvdaws.

7 Nej lub qhov muag twb pom ntsoov tej xwm txheej loj uas (יחוח)Yahweh ua no huvsi.

​

Yuav Tau Koob Hmoov Rau Hauv Khana‑as Tebchaws 

8 Yog li no nej yuav tau tuav rawv tej lus cob qhia huvsi uas hnub no kuv cob rau nej, xwv nej thiaj li muaj zog thiab mus txeeb tau lub tebchaws uas nej tab tom hla mus tuav ua nej tug,

9 thiab nej thiaj muaj txojsia nyob ntev rau hauv lub tebchaws uas (יחוח)Yahweh cog lus ruaj khov cia rau nej tej poj koob yawm txwv tias yuav pub rau lawv thiab lawv tej caj ces, yog lub tebchaws uas muaj kua mis thiab zib ntab ntws nto.

10 Lub tebchaws uas nej yuav mus txeeb ntawd tsis thooj li Iziv tebchaws uas nej tawm los. Hauv Iziv tebchaws nej tseb noob thiab xuas kotaw tuam tshuab ntov dej yam li tej vaj zaub.

11 Tiamsis lub tebchaws uas nej hla mus txeeb ua nej tug ntawd muaj roob, muaj hav, muaj dej nag saum ntuj los ntub,

12 yog lub tebchaws uas (יחוח)Yahweh uas yog nej Tus Tswv tsom kwm. (יחוח)Yahweh uas yog Nej Tus Tswv lub qhov muag saib ntsoov lub tebchaws tsis tu ncua txij thaum hauv xyoo mus txog qab xyoo.  

13 Yog nej ua raws li tej lus cob qhia uas hnub no kuv muab cob rau nej, uas yog hlub (יחוח)Yahweh uas yog nej Tus Tswv thiab ua koom tu nws kawg nej lub siab lub ntsws,

14 mas nws yuav pub nag los rau nej lub teb chaws raws caij raws sijhawm, yog cov nag hauv xyoo, nag qab xyoo kom nej thiaj li tau qoob loo thiab cawv txiv hmab thiab roj,

15 thiab nws yuav pub nej tej tshav zaub muaj zaub rau nej tej tsiaj txhu noj, mas nej yuav tau noj tsau npo.

16 Nej yuav tau ceev faj tsis txhob cia nej lub siab raug ntxias tig kiag mus ua koom tu thiab pe luag tej dab.

17 Yog nej ua li ntawd, (יחוח)Yahweh txojkev npau taws yuav tshwm plaws rau nej. Nws yuav kaw lub ntuj tsis tso nag los thiab tej av yuav tsis tuaj qoob loo thiab nej yuav puam tsuaj ploj sai kawg li rau hauv lub tebchaws zoo uas (יחוח)Yahweh pub rau nej.

18 Vim li no nej yuav tau khaws tej lus uas kuv hais no rau hauv nej lub siab lub ntsws, thiab muab tej lus no khi rau ntawm nej txhais tes ua lub chaw nco, thiab muab pav rau ntawm nej hauv pliaj.

19 Nej yuav qhia tej lus no rau nej tej me nyuam, thiab hais txog tej lus no rau thaum nej nyob hauv tsev, thaum nej taug kev, thaum nej pw, thiab thaum nej sawv,

20 thiab muab sau rau ntawm tej npuab rooj hauv tsev thiab ntawm rooj loog,

21 kom nej thiab nej tej tub ki thiaj muaj txojsia ntev rau hauv lub tebchaws uas ()Yahweh cog lus ruaj tias yuav pub rau nej tej poj koob yawm txwv, ntev li thaum lub ntuj tseem khwb lub ntiajteb.  

22 Yog nej ceev faj ua raws nraim tej lus cob qhia no huvsi uas kuv cob rau nej, uas yog hlub (יחוח)Yahweh uas yog nej Tus Tswv thiab ua nej lub neej raws nraim nws tej kev huvsi thiab tuav rawv nws,

23 mas (יחוח)Yahweh yuav ntiab txhua haiv neeg no tawm ntawm nej hauv ntej mus, mas nej yuav txeeb tau tej haiv neeg uas loj dua nej thiab muaj zog dua nej lub tebchaws.

24 Nej xib taws tsuj mus txog qhov twg, qhov ntawd yuav yog nej li. Nej li ciam teb yuav txij ntua tebchaws moj sab qhua mus txog Lenpanoos, thiab txij ntua tus dej Yufetis mus txog hiavtxwv sab hnub poob.

25 Yuav tsis muaj leejtwg sawv tiv tau nej. (יחוח)Yahweh uas yog nej Tus Tswv yuav ua kom thoob lub tebchaws uas nej yuav mus tsuj ntawd ntshai nej heev kawg li, raws li nws twb cog lus tseg rau nej lawm.  

26 Saib maj, hnub no kuv coj tej lus foom koob hmoov thiab tej lus tsawm foom los txawb rau ntawm nej xub ntiag.

27 Yog nej ua raws li (יחוח)Yahweh uas yog nej Tus Tswv tej lus cob qhia uas hnub no kuv muab cob rau nej, mas nej yuav tau tej koob hmoov ntawd.  

28 Hos yog nej tsis ua raws li (יחוח)Yahweh uas yog nej Tus Tswv tej lus cob qhia es tig kiag ntawm txojkev uas hnub no kuv hais rau nej mus raws ncuj nciav luag tej dab uas nej tsis tau paub dua, nej yuav tau saws tej lus tsawm foom ntawd.

29 Thaum (יחוח)Yahweh uas yog nej Tus Tswv coj nej mus rau hauv lub tebchaws uas nej tab tom yuav mus txeeb ua nej tug ntawd, nej yuav tau muab tej lus foom koob hmoov tshaj tawm rau saum lub roob Kelixis thiab muab tej lus tsawm foom tshaj tawm rau saum lub roob Enpas.

30 Ob lub roob no nyob sab ntug dej Yaladees tim ub, yog nyob ntawm txojkev uas mus rau sab hnub poob hauv cov Khana‑as thaj tebchaws ntawm Alanpas, thiab ncaj lub moos Kilakas ze tej ntoo xeeb ntawm Maules.

31 Nej yuav hla tus dej Yaladees mus txeeb tau lub tebchaws uas (יחוח)Yahweh uas yog nej Tus Tswv pub rau nej, mas thaum nej txeeb tau thiab nyob rau hauv lawm,

32 nej yuav tau ceev faj ua raws li tej kab ke thiab tej kevcai huvsi uas hnub no kuv muab cob rau nej.