Txua Dua Ob Daim Txiag Zeb

1 Thaum ntawd (יחוח)Yahweh hais rau kuv tias, koj cia li txua ob daim txhib zeb zoo ib yam li thawj ob daim thiab nce tuaj cuag kuv saum lub roob, thiab ua ib

lub phij xab ntoo.

2 Mas kuv yuav sau tej lus uas nyob hauv ob daim txhib zeb uas koj ua tawg lawd thiab koj yuav tau muab ob daim txhib zeb ntawd khaws cia rau hauv lub phij xab.

3 Kuv thiaj muab ntoo kub twm los ua lub phij xab thiab txua ob daim txhib zeb zoo ib yam li thawj ob daim thiab nqa ob daim txhib zeb hauv kuv txhais tes nce mus saum lub roob.

4 Mas (יחוח)Yahweh thiaj sau kaum txoj kevcai rau hauv ob daim txhib zeb yam li qub, yog tej lus uas (יחוח)Yahweh hais hauv cov nplaim taws saum lub roob rau nej rau hnub uas nej tuaj txoos ua ke. Mas (יחוח)Yahweh muab ob daim txhib zeb ntawd pub rau kuv.

5 Ces kuv txawm tig kiag nqis saum lub roob los thiab muab ob daim txhib zeb ntawd khaws cia rau hauv lub phij xab uas kuv ua, mas ob daim txhib zeb kuj nyob rau hauv raws li (יחוח)Yahweh hais cia rau kuv.

6 (Cov Ixayees taug kev ntawm Npe‑awlauj Npenes Ya‑akhas los txog Mauxelas, mas Aloos txawm tuag thiab muab faus rau qhov ntawd lawm. Ces nws tus tub Ele‑axas thiaj sawv nws chaw ua pov thawj.

7 Lawv tshais chaw qhov ntawd los txog Kukaudas, thiab tshais ntawm Kukaudas los txog Yaunpathas uas yog lub tebchaws muaj hav dej ntau.

8 Thaum ntawd (יחוח)Yahweh muab xeem Levis cais ua cov uas kwv (יחוח)Yahweh lub phij xab sib cog lus thiab nyob ntawm (יחוח)Yahweh xub ntiag ua koom tu nws thiab tuav nws lub npe foom koob hmoov los txog niaj hnub nimno.

9 Vim li no cov Levis thiaj tsis muaj feem nrog cov kwvtij tau lub tebchaws ua qub txeeg qub teg. (יחוח)Yahweh yog lawv li qub txeeg qub teg raws li (יחוח)Yahweh uas yog nej Tus Tswv hais rau lawv lawd.)

10 Kuv nyob saum lub roob plaub caug hnub plaub caug hmo yam li thawj zaug, mas zaum ntawd (יחוח)Yahweh kuj mloog kuv tej lus thov thiab, (יחוח)Yahweh thiaj tsis xav ua kom nej puam tsuaj lawm.  

11 (יחוח)Yahweh hais rau kuv tias, cia li sawv tsees, coj cov pejxeem taug kev mus kom lawv thiaj mus txeeb tau lub tebchaws uas kuv cog lus ruaj cia rau lawv tej poj koob yawm txwv tias yuav pub rau lawv.

​

Hwm Thiab Paub Ntshai (יחוח)Yahweh

12 Cov Ixayees es, nimno (יחוח)Yahweh uas yog nej Tus Tswv xav kom nej ua abtsi? Nws xav kom nej hwm thiab paub ntshai (יחוח)Yahweh uas yog nej Tus Tswv, thiab ua lub neej raws nraim nws txhua txoj kev huvsi, thiab hlub nws thiab ua koom tu (יחוח)Yahweh uas yog nej Tus Tswv kawg nej lub siab lub ntsws,

13 thiab tuav rawv (יחוח)Yahweh tej lus cob qhia thiab tej kab ke uas hnub no kuv hais rau nej xwv nej thiaj noj qab nyob zoo.  

14 Saib maj, lub ntuj thiab lub ntuj uas siab kawg nkaus thiab lub ntiajteb thiab txhua yam uas nyob hauv puav leej yog (יחוח)Yahweh uas yog nej Tus Tswv li.

15 Txawm li ntawd los (יחוח)Yahweh tsom ntsoov hlub nej tej poj koob yawm txwv thiab xaiv lawv tej caj ces uas yog nej, ua haiv neeg tseem ceeb dua ib tsoom tibneeg sawvdaws, yam li niaj hnub nimno.

16 Vim li no nej cia li txiav nrho nej lub siab tsis txhob tawv ncauj dua li lawm.

17 Rau qhov (יחוח)Yahweh uas yog nej Tus Tswv yog ib tsoom timtswv Tus Tswv, thiab yog cov uas muaj hwjchim Tus Tswv, nws yog Tus Tswv uas loj kawg thiab muaj hwjchim thiab txaus ntshai kawg, nws tsis saib leejtwg ntsej muag, tsis yuav tej nyiaj xiab.

18 Nws tu plaub ncaj rau cov menyuam uas tsis muaj txiv thiab cov poj ntsuam, thiab hlub lwm haiv neeg uas nrog nej nyob, nws pub zaub mov thiab ris tsho rau lawv.  

19 Vim li no nej yuav tau hlub lwm haiv neeg, rau qhov nej kuj tau ua lwm haiv neeg rau hauv Iziv tebchaws lawm.

20 Nej yuav tau hwm thiab paub ntshai (יחוח)Yahweh uas yog nej Tus Tswv. Nej yuav tau ua koom tu nws thiab nrog nws tsheej xeeb thiab tuav nws tib leeg lub npe twv.

21 Nws yog tus uas nej yuav qhuas.  Nws yog nej Tus Tswv uas twb ua tej xwm txheej loj thiab txaus ntshai uas nej lub qhov muag twb pom no.

22 Nej tej poj koob yawm txwv mus xya caum leej rau hauv Iziv tebchaws xwb, tiamsis nimno (יחוח)Yahweh uas yog nej Tus Tswv twb ua rau nej huaj vam coob yam li tej hnub qub saum ntuj lawm.