Ixayees Tawv Ncauj

1 Cov Ixayees es, cia li tig ntsej mloog. Hnub no nej yuav hla tus dej Yaladees mus txeeb lub tebchaws uas tej haiv neeg uas loj dua nej thiab muaj zog dua thiab lawv tej moos kuj loj muaj ntsa loog siab txij ntuj.

2 Cov tibneeg ntawd loj thiab siab, yog Anaj caj ces uas nej twb paub thiab hnov luag hais tias, leejtwg yuav sawv tiv yeej Anaj caj ces?

3 Hnub no nej cia li paub tseeb tias tus uas mus ua nej ntej yam li nplaim taws kub ceev yeej yog (יחוח)Yahweh uas yog nej Tus Tswv. Nws yuav ua kom lawv puam tsuaj thiab swb kiag nej, nej thiaj yuav ntiab tau lawv khiav mus ua rau lawv puam tsuaj sai kawg, yam li (יחוח)Yahweh tau cog lus rau nej lawd.

4 Thaum ()Yahweh uas yog nej Tus Tswv muab lawv ntiab tawm ntawm nej hauv ntej mus lawm, nej tsis txhob hais tuj taws tias, twb yog kuv ua ncaj ncees (יחוח)Yahweh thiaj coj kuv los txeeb tau lub teb chaws no ua kuv tug, tiamsis qhov tseeb yog tim tej haiv neeg no ua phem (יחוח)Yahweh thiaj muab lawv ntiab tawm ntawm nej hauv ntej mus.

5 Qhov uas nej mus txeeb tau lawv lub tebchaws ua nej tug, tsis yog vim nej ua ncaj ncees lossis nej lub siab ncaj, tiamsis vim yog tej haiv neeg no ua phem, (יחוח)Yahweh uas yog nej Tus Tswv thiaj li muab lawv ntiab tawm ntawm nej xub ntiag mus, thiab nws thiaj tuav rawv tej lus uas (יחוח)Yahweh tau cog tseg ruaj khov rau nej tej poj koob yawm txwv, uas yog Anplaham, Ixaj thiab Yakhauj.

6 Vim li no nej yuav tau paub tseeb tias qhov uas (יחוח)Yahweh uas yog nej Tus Tswv pub lub tebchaws zoo no rau nej txeeb tau ua nej tug ntawd, tsis yog vim nej ua ncaj ncees, rau qhov nej kuj yog haiv neeg uas tawv ncauj.  

7 Nej cia li nco ntsoov thiab tsis txhob tsis nco qab tias nej tau ua li cas thiaj zes ua rau (יחוח)Yahweh uas yog nej Tus Tswv npau taws rau hauv tebchaws moj sab qhua. Txij hnub uas nej tawm hauv Iziv tebchaws los txog lub chaw no nej pheej ntxeev siab rau (יחוח)Yahweh.

8 Txawm yog ntawm Haules los nej kuj zes ua rau (יחוח)Yahweh npau taws thiab nws chim heev kawg li, nws twb yuav ua rau nej puam tsuaj.

9 Thaum kuv nce mus saum lub roob yuav txais daim txhib zeb uas muaj tej lus cog tseg uas (יחוח)Yahweh cog rau nej, kuv nyob saum lub roob plaub caug hnub plaub caug hmo. Kuv tsis noj mov tsis haus dej li.

10 Mas (יחוח)Yahweh muab ob daim txhib zeb uas (יחוח)Yahweh xuas ntiv tes sau nws tej lus pub rau kuv. Hauv ob daim txhib zeb ntawd muaj tej lus huvsi uas (יחוח)Yahweh hais rau nej hauv cov nplaim taws saum lub roob rau hnub uas nej tuaj txoos ua ke.  

11 Thaum dhau plaub caug hnub plaub caug hmo lawm, (יחוח)Yahweh muab ob daim txhib zeb uas muaj tej lus cog tseg pub rau kuv.

12 Mas (יחוח)Yahweh hais rau kuv tias, cia li sawv tsees, nqis ntawm no mus tamsid, rau qhov koj haiv neeg uas koj coj tawm hauv Iziv tebchaws los yuam kev ua txhaum lawm. Lawv tig kiag ntawm txojkev uas kuv qhia rau lawv lawd sai kawg li. Lawv nchuav ib tug dab mlom rau lawv lawm.

13 Tsis tag li ntawd, (יחוח)Yahweh hais rau kuv tias, kuv pom haiv neeg no, mas saib maj, yog ib haiv neeg uas tawv ncauj.

14 Tsis txhob tav kuv lawm, kuv yuav ua kom lawv puam tsuaj thiab muab lawv lub npe rhuav kom ploj hauv lub qab ntuj no mus. Kuv yuav tsa koj ua ib haiv neeg uas loj thiab muaj zog dua lawv.

15 Kuv thiaj tig kiag nqis saum lub roob los, muaj nplaim taws puv nkaus saum lub roob. Thiab ob daim txhib zeb uas muaj tej lus cog tseg nyob rawv hauv kuv txhais tes.

16 Kuv tsa muag saib mas pom tias nej tau ua txhaum rau (יחוח)Yahweh uas yog nej Tus Tswv lawm. Nej tau nchuav ib tug dab mlom thav nyuj rau nej, nej tau tig hlo ntawm txoj kev uas (יחוח)Yahweh tau qhia nej lawd sai kawg.

17 Kuv thiaj muab ob daim txhib zeb ntawm kuv txhais tes laim pov tseg tawg tag tab meeg nej.

18 Ces kuv txawm khwb nkaus rau ntawm (יחוח)Yahweh xub ntiag yam li thawj zaug tau plaub caug hnub plaub caug hmo. Kuv tsis noj mov tsis haus dej li, vim yog tim tej kev txhaum huvsi uas nej tau ua, yog tau ua phem tab meeg (יחוח)Yahweh, zes ua kom nws chim.

19 Kuv ntshai (יחוח)Yahweh txojkev chim thiab qhov uas nws tsis txaus siab heev rau nej, nws twb yuav ua kom nej puam tsuaj. Tiamsis zaum ntawd (יחוח)Yahweh kuj mloog kuv tej lus thov.  

20 (יחוח)Yahweh chim rau Aloos heev, twb yuav ua rau nws puam tsuaj. Thaum ntawd kuv kuj thov (יחוח)Yahweh txog Aloos thiab.  

21 Kuv thiaj muab yam uas txhaum loj ntawd, yog tus dab mlom thav nyuj uas nej ua ntawd, mas muab hlawv, muab tsoo, muab tuav mos mos ua hmoov, thiab kuv muab w rau hauv tus dej uas ntws pem lub roob los.   

22 Nej twb ua rau (יחוח)Yahweh npau taws ntawm Thanpelas thiab ntawm Maxas thiab ntawm Khilaus Hata‑avas.

23 Thiab thaum (יחוח)Yahweh txib kom nej tawm ntawm Khades Npanias mus hais tias, cia li mus txeeb lub tebchaws uas kuv muab rau nej, los nej kuj ntxeev siab tsis ua raws li (יחוח)Yahweh uas yog nej Tus Tswv hais rau nej thiab nej tsis tso siab rau nws thiab tsis mloog nws tej lus.

24 Nej pheej ntxeev siab rau (יחוח)Yahweh txij hnub uas kuv paub nej los li lawm.

25 Kuv thiaj khwb nkaus rau ntawm (יחוח)Yahweh xub ntiag tau plaub caug hnub plaub caug hmo ntawd, rau qhov (יחוח)Yahweh hais tias, nws yuav ua rau nej puam tsuaj.

26 Kuv thiaj thov (יחוח)Yahweh hais tias, Au (יחוח)Yahweh, thov tsis txhob ua rau koj haiv neeg uas yog koj qub txeeg qub teg puam tsuaj. Lawv yog cov uas koj tau siv koj lub hwjchim loj txhiv los thiab xuas koj txhais tes uas muaj zog coj tawm hauv Iziv tebchaws los.

27 Thov koj nco txog koj cov tub qhe uas yog Anplaham, Ixaj thiab Yakhauj. Thov tsis txhob saib rau qhov uas haiv neeg no tawv ncauj thiab lawv tej kev phem thiab lawv tej kev txhaum,

28 tsam ces cov tibneeg hauv lub tebchaws uas koj coj peb tawm los ntawd yuav hais tias, vim yog (יחוח)Yahweh tsis muaj peev xwm coj lawv mus rau hauv lub tebchaws uas nws cog lus cia rau lawv lawd, thiab twb yog nws ntxub lawv, nws thiaj coj lawv los tua tag rau hauv tebchaws moj sab qhua.

29 Lawv twb yog koj haiv neeg thiab yog koj qub txeeg qub teg uas koj siv koj lub hwj chim loj thiab koj txhais npab uas tsa hlo coj tawm los.