KEVCAI 15

Xyoo Uas Tso Nuj Nqis Tseg

(Levis Tej Kevcai 25:1-7)

1 Puv txhua xya xyoo, koj yuav tau tso nuj nqis tseg.

2 Koj yuav tso li no, tus uas luag tshuav nws nqi no yuav tso tej uas kwvtij zej zog qiv txais lawm tseg, tsis txhob tsib kwvtij zej zog them rov rau nws, vim yog twb tshaj tawm lub caij uas (יחוח)Yahweh teem kom tso nuj nqis tseg lawm.

3 Koj yuav tsib ntawm lwm haiv neeg them rov los kuj tau, tiamsis yog koj qiv txais abtsi rau koj cov kwvtij mas koj cia li tso tseg tsis txhob yuav.

4 Mas yuav tsis muaj tej tibneeg pluag rau hauv nej, rau qhov (יחוח)Yahweh yuav foom koob hmoov rau koj rau hauv lub tebchaws uas (יחוח)Yahweh uas yog koj Tus Tswv muab rau koj ua qub txeeg qub teg ua koj tug.

5 Tsuav yog koj mloog (יחוח)Yahweh uas yog koj Tus Tswv lus thiab ceev faj ua raws nraim li tej lus cob qhia huvsi uas hnub no kuv cob rau koj no xwb.  

6 Vim yog (יחוח)Yahweh uas yog koj Tus Tswv yuav foom koob hmoov rau koj, raws li nws tau cog lus tseg rau koj, mas koj yuav muaj qiv txais rau ntau haiv neeg, tiamsis koj yuav tsis qiv txais luag li, koj yuav kav ntau haiv neeg, tiamsis luag yuav tsis kav koj.  

7 Yog hauv nej muaj ib tug pluag uas yog koj li kwvtij, tsis hais nyob lub moos twg hauv koj lub tebchaws uas (יחוח)Yahweh uas yog koj Tus Tswv pub rau koj, mas koj tsis txhob ua lub siab deb nkaum tes ntawm koj tus kwvtij uas pluag ntawd.

8 Koj yuav cev tes rau nws thiab qiv txais kom txaus li nws xav tau, qiv txais abtsi kuj tau.

9 Koj yuav tau ceev faj tib zoo, tsis txhob cia koj lub siab xav phem hais tias, twb yuav txog xyoo xya uas yog xyoo tso nuj nqis tseg, ces koj txawm khib tus kwvtij uas pluag ntawd, es tsis kam muab abtsi rau nws, ces nws yuav thov hais rau (יחוח)Yahweh mas lub txim yuav poob rau koj.

10 Koj cia li zoo siab hlo muab rau nws thiab thaum muab lawd, koj lub siab tsis txhob khuv xim. Yog koj ua li no, (יחוח)Yahweh uas yog koj Tus Tswv yuav foom koob hmoov rau koj tej haujlwm txhua yam thiab rau txhua yam uas koj ua.

11 Rau qhov tej tibneeg pluag yuav ploj tsis tag hauv lub tebchaws no.  Vim li no, kuv thiaj hais rau koj tias, koj yuav tau cev tes ua siab dav rau koj cov kwvtij thiab rau cov uas raug txom nyem thiab cov pluag hauv koj lub tebchaws.

​

Hais Txog Tub Qhe

(Khiavdim 21:1-11)

12 Yog luag muab koj cov kwvtij Hinplus, tsis hais pojniam, txivneej, ib tug muag rov rau koj, mas koj cia nws ua haujlwm rau koj rau xyoo, mas xyoo uas xya, koj yuav muab nws tso mus.

13 Thaum koj tso nws mus ntawd koj tsis txhob tso nws mus tes dawb tes npliag.

14 Koj yuav tau muaj lub siab dav muab koj tej yaj, tej tshis, muab koj tej qoob loo thiab koj tej cawv txiv hmab rau nws raws li (יחוח)Yahweh uas yog koj Tus Tswv twb foom koob hmoov rau koj lawd.

15 Koj yuav tau nco ntsoov tias koj tau ua luag qhev hauv Iziv tebchaws, mas (יחוח)Yahweh uas yog koj Tus Tswv, tau txhiv koj los. Vim li no, hnub no kuv thiaj hais kom koj ua tej no.

16 Tiamsis yog tus qhev hais rau koj tias, kuv tsis tawm ntawm koj mus, vim yog nws nyiam koj thiab koj tsev neeg, rau qhov nws nrog koj nyob mas tau zoo,

17 ces koj cia li xuas koob laum nws taub ntsej tshab plaws teem rau ntawm qhov rooj.  Ua li no nws thiaj yuav ua koj qhev mus ib sim neej li.  Koj yuav ua ib yam nkaus li no rau koj tus nkauj qhe thiab.  

18 Thaum koj tso ib tug qhev mus, koj tsis txhob nyuaj siab, rau qhov nws ua koj li hauj lwm rau xyoo ntawd, nws tsuas yog tau ib nrab nqi zog xwb. Ua li no, (יחוח)Yahweh uas yog koj Tus Tswv thiaj yuav foom koob hmoov rau txhua yam uas koj ua.

​

Xyeem Thawj Tug Menyuam Tsiaj

19 Thawj tug menyuam tsiaj uas yog txiv, tsis hais menyuam nyuj menyuam tshis menyuam yaj, koj yuav muab cais ua dawb huv rau (יחוח)Yahweh uas yog koj Tus Tswv. Koj tsis txhob muab thawj tug menyuam nyuj ntawd siv ua haujlwm thiab tsis txhob txiav thawj tug menyuam yaj cov plaub.

20 Koj thiab koj tsev neeg niaj xyoo yuav noj thawj tug me nyuam tsiaj ntawd, tab meeg (יחוח)Yahweh uas yog koj Tus Tswv lub xub ntiag rau hauv lub chaw uas (יחוח)Yahweh yuav xaiv cia.

21 Tiamsis yog tus tsiaj ntawd muaj chaw thuam, yog dig muag, ceg tawv lossis muaj ib qho phem heev, mas koj tsis txhob tua xyeem rau (יחוח)Yahweh uas yog koj Tus Tswv.

22 Koj yuav tau noj tus tsiaj ntawd rau hauv koj lub moos. Tus uas qias tsis huv thiab tus uas huv kuj noj tau ib yam nkaus li noj nqaij kauv seb, noj nqaij mos lwj.  

23 Koj tsuas tseg tsis txhob noj cov ntshav xwb, koj cia li muab hliv pov tseg rau hauv av yam li hliv dej.