Kevcai Hla Dhau

(Khiavdim 12:1-20)

1 Koj yuav nco lub hli Anpis thiab ua kevcai Hla Dhau rau (יחוח)Yahweh uas yog koj Tus Tswv, rau qhov lub hli Anpis ntawd (יחוח)Yahweh uas yog koj Tus Tswv tau coj koj tawm hauv Iziv tebchaws los hmo ntuj.  

2 Koj yuav muab tus tsiaj uas ua kevcai Hla Dhau xyeem rau (יחוח)Yahweh uas yog koj Tus Tswv. Yog yaj, tshis, lossis nyuj, rau hauv lub chaw uas (יחוח)Yahweh yuav xaiv cia rau nws lub npe nyob.  

3 Koj tsis txhob noj tej ncuav uas xyaw keeb ntxuag tus tsiaj ntawd. Koj yuav noj cov ncuav tsis xyaw keeb xya hnub, yog tej ncuav uas nco txog kev txom nyem, vim yog koj maj maj khiav tawm hauv Iziv tebchaws, xwv koj thiaj li nco txog hnub uas koj tawm hauv Iziv tebchaws ntawd mus ib txhis li.  

4 Hauv xya hnub ntawd, tsis tseev kom muaj ib qho keeb ncuav hauv koj lub tebchaws kiag li. Tus tsiaj uas koj tua xyeem thawj hnub, thaum yuav tsaus ntuj, koj tsis txhob tseg ib qho nqaij cia ib hmos mus txog kaj ntug.  

5 Koj tsis txhob muab tus tsiaj uas ua kevcai Hla Dhau xyeem rau hauv koj tej moos uas (יחוח)Yahweh uas yog koj Tus Tswv muab pub rau koj.

6 Tiamsis koj yuav tau muab tus tsiaj uas ua kevcai Hla Dhau xyeem rau hauv lub chaw uas (יחוח)Yahweh uas yog koj Tus Tswv yuav xaiv cia rau nws lub npe nyob xwb. Koj yuav muab xyeem rau thaum yuav tsaus ntuj uas hnub poob qho lawd, yog lub sijhawm uas koj tawm hauv Iziv tebchaws.

7 Koj yuav tau muab ua kom siav mam li noj rau hauv lub chaw uas (יחוח)Yahweh uas yog koj Tus Tswv yuav xaiv cia, mas tagkis tom qab, koj rov mus rau hauv koj lub tsev ntaub.

8 Koj yuav noj tej ncuav tsis xyaw keeb rau hnub, mas hnub uas xya, yuav tuaj txoos ua ke caiv so tiag tiag li rau (יחוח)Yahweh uas yog koj Tus Tswv, thiab hnub ntawd koj tsis txhob ua ib yam haujlwm abtsi li.

​

Kevcai Thaum Hlais Qoob Loo Tag 

(Khiavdim 34:22; Levis Tej Kevcai 23:15-21; 

Xwm Txheej Taug kev 28:26-31)

9 Koj suav kom puv xya lub chib so, suav hnub uas koj pib xuas liag hlais qoob loo mus kom puv xya lub chib so.

10 Hnub ntawd koj yuav tau ua kevcai xya lub chib so xyeem rau (יחוח)Yahweh uas yog koj Tus Tswv, yuav muab xyeem pub raws li koj zoo siab pub, npaum li (יחוח)Yahweh uas yog koj Tus Tswv twb foom koob hmoov rau koj lawd.

11 Koj yuav zoo siab heev rau ntawm (יחוח)Yahweh uas yog koj Tus Tswv xub ntiag, koj thiab koj tej tub, tej ntxhais, koj tej tub qhe, nkauj qhe, thiab cov Levis uas nyob hauv koj tej moos, thiab lwm tus uas nrog koj nyob, thiab cov menyuam uas tsis muaj txiv, thiab cov poj ntsuam uas nrog koj nyob, nej sawvdaws yuav zoo siab heev rau hauv lub chaw uas (יחוח)Yahweh uas yog koj Tus Tswv yuav xaiv cia rau nws lub npe nyob.

12 Koj yuav tau nco tias koj tau ua qhev hauv Iziv tebchaws, mas koj yuav ceev faj ua raws li tej kab ke no.

​

Kevcai Nyob Tsev Pheeb Suab

(Levis Tej Kevcai 23:33-43)

13 Koj yuav ua kevcai nyob tsev pheeb suab xya hnub rau thaum koj sau qoob loo hauv tej tshav ntaus qeb ntaus mog, los ncaws tsev tag thiab sau kua txiv hmab hauv tej chaw tsuam tag lawm.

14 Koj yuav npaj noj haus ua kev zoo siab thiab koj tej tub, tej ntxhais, koj tej tub qhe, nkauj qhe, thiab cov Levis, thiab lwm haiv neeg, thiab cov menyuam uas tsis muaj txiv thiab cov poj ntsuam uas nyob hauv koj tej moos yuav ua ke zoo siab heev.

15 Koj yuav ua qhov kevcai no xyeem rau (יחוח)Yahweh uas yog koj Tus Tswv, xya hnub rau hauv lub chaw uas (יחוח)Yahweh uas yog koj Tus Tswv yuav xaiv cia, rau qhov (יחוח)Yahweh uas yog koj Tus Tswv yuav foom koob hmoov rau koj tej qoob loo huvsi thiab rau txhua yam haujlwm uas koj txhais tes ua, xwv koj thiaj muaj kev zoo siab heev kawg.

16 Ib xyoos mas nej cov txivneej sawvdaws yuav tau tuaj rau ntawm (יחוח)Yahweh uas yog nej Tus Tswv xub ntiag peb zaug rau hauv lub chaw uas nws yuav xaiv cia, yog thaum ua kevcai noj ncuav tsis xyaw keeb thiab thaum ua kevcai xya lub chib so thiab thaum ua kevcai nyob tsev pheeb suab. Lawv tsis txhob tuaj cuag (יחוח)Yahweh tes dawb tes do.

17 Txhua tus yuav xyeem pub raws li xyeem tau, npaum li tej koob hmoov uas (יחוח)Yahweh uas yog nej Tus Tswv twb pub rau nws lawd.

​

Tu Plaub Ncaj Ncees

18 Koj yuav tau tsa cov uas tu plaub thiab cov nom tswv rau hauv nej txhua lub moos uas (יחוח)Yahweh uas yog nej Tus Tswv pub rau nej, tsa rau hauv txhua xeem, mas lawv yuav tu plaub ntug ncaj ncees rau cov pejxeem.  

19 Koj tsis txhob tu plaub tsis ncaj, tsis txhob tuaj leejtwg tog, tsis txhob yuav nyiaj xiab, rau qhov tej nyiaj xiab ua rau tus uas txawj ntse dig muag thiab qhau tus uas muaj cai.

20 Tu plaub mas koj yuav tau tu ncaj tiag tiag li, kom koj thiaj li muaj txojsia nyob thiab thiaj tau lub tebchaws uas (יחוח)Yahweh uas yog koj Tus Tswv muab pub rau koj ua qub txeeg qub teg.  

21 Koj tsis txhob cog ib tsob ntoo abtsi los ua ncej dab Aselas rau ntawm (יחוח)Yahweh uas yog koj Tus Tswv lub thaj uas koj ua lawd ib sab.

22 Koj tsis txhob txhos tej ncej teev dab, yog yam uas (יחוח)Yahweh uas yog koj Tus Tswv ntxub.