KEVCAI 17

1 Koj tsis txhob coj tej txiv nyuj lossis tej yaj uas muaj chaw thuam ib qho twg, tuaj xyeem rau (יחוח)Yahweh uas yog koj Tus Tswv, rau qhov yog yam uas qias vuab tsuab rau (יחוח)Yahweh uas yog koj Tus Tswv.

2 Hauv nej tej moos uas (יחוח)Yahweh uas yog nej Tus Tswv pub rau nej, yog muaj tus txivneej twg lossis tus pojniam twg, ua tej uas (יחוח)Yahweh uas yog nej Tus Tswv pom tias phem, uas tsis yog raws li (יחוח)Yahweh tej lus cog tseg.

3 Mas nws mus ua koom tu thiab pe luag tej dab lossis pe lub hnub, lub hli lossis ib yam abtsi uas nyob saum nruab ntug uas kuv tau txwv lawm,

4 yog muaj tibneeg hais rau koj paub thiab koj hnov, mas koj yuav tau ua tib zoo tshuaj saib. Yog muaj tseeb thiab pom tseeb tias cov Ixayees ib tug tau ua tej uas qias vuab tsuab ntawd,

5 koj yuav tau coj tus txivneej lossis tus pojniam uas ua tej kev phem ntawd los rau ntawm rooj loog, mas xuas pob zeb ntaus tus txivneej ntawd lossis tus pojniam ntawd kom tuag.

6 Tus uas raug txim tuag yuav tau muaj ob leeg los peb leeg ua timkhawv tias nws ua txhaum thiaj muab tua pov tseg tau. Yog muaj tib leeg ua tim khawv xwb mas tsis txhob muab nws tua pov tseg.

7 Tus uas ua timkhawv yuav tau nqis tes ntaus ua ntej, sawvdaws mam li nqis tes tom qab.  Ua li no koj thiaj ntxuav tau tej kev phem no tawm hauv nej mus.

8 Yog hauv nej tej moos muaj tshaj plaub twg uas koj ceeblaj tu, tsis hais plaub tua tibneeg, plaub sib txeeb qhov txhia chaw, lossis tej plaub sib ntaus, koj yuav tau coj mus rau ntawm lub chaw uas (יחוח)Yahweh uas yog koj Tus Tswv yuav xaiv cia.

9 Thiab mus cuag cov pov thawj uas yog xeem Levis thiab mus cuag tus uas tu plaub rau lub sijhawm ntawd. Koj yuav tau nrog lawv sablaj, mas lawv yuav qhia koj tu plaub.

10 Mas koj yuav tau ua raws li uas lawv hais rau koj ntawm lub chaw uas (יחוח)Yahweh yuav xaiv cia ntawd, thiab koj yuav tau ceev faj ua raws li txhua yam uas lawv qhia.

11 Koj yuav tau ua raws li tej lus uas lawv qhia rau koj thiab raws li tej lus uas lawv qhia koj tu plaub. Koj tsis txhob muab tej lus uas lawv qhia koj tu plaub tso tseg, tsis txhob tig rau sab xis lossis rau sab laug.

12 Yog leejtwg tawv ncauj tsis yeem mloog tus pov thawj uas nyob qhov ntawd ua koom tu (יחוח)Yahweh uas yog koj Tus Tswv thiab tsis mloog tus tu plaub hais, mas nws yuav tuag. Ua li no, koj thiaj ntxuav tau tej kev phem no tawm hauv cov Ixayees mus.

13 Mas cov pejxeem sawv daws thiaj tau hnov thiab ntshai thiab tsis tawv ncauj dua li lawm.

​

Hais Txog Vajntxwv

14 Thaum koj los txog lub tebchaws uas (יחוח)Yahweh uas yog koj Tus Tswv pub rau koj thiab koj txeeb tau thiab nyob hauv lawm, thiab koj hais tias, peb yuav tsa ib tug vaj ntxwv los kav peb ib yam li txhua haiv neeg uas nyob ib ncig peb,

15 koj yuav tau tsa tus uas (יחוח)Yahweh uas yog koj Tus Tswv xaiv cia ua vajntxwv kav nej. Koj yuav tsa koj cov kwvtij ib tug ua vajntxwv kav nej, koj tsis txhob tsa lwm haiv neeg uas tsis yog koj kwvtij kav nej.

16 Tus vajntxwv ntawd yuav tau tsis txhob muaj nees coob coob thiab tsis txhob txib tibneeg mus yuav nees nram Iziv tebchaws los ntxiv, rau qhov (יחוח)Yahweh tau hais rau nej tias, nej yuav tsis rov qab taug txojkev ntawd dua li lawm.

17 Nws yuav tau tsis txhob muaj pojniam coob tsam nws lub siab tig ntawm (יחוח)Yahweh.  Nws yuav tau tsis txhob muaj nyiaj muaj kub ntau ua nws tug.

18 Thaum nws nyob saum lub zwm txwv hauv lub tebchaws, nws yuav tau muab phau kevcai no sau dua ib phau rau nws raws nraim li phau uas cov pov thawj uas yog xeem Levis khaws cia.

19 Tus vajntxwv yuav tau muaj phau kevcai ntawd thiab nyeem tsis tu ncua

tag nws sim neej, kom nws thiaj kawm paub hwm thiab ntshai (יחוח)Yahweh uas yog nws Tus Tswv, yog tuav rawv tej kevcai txhua nqe thiab tej kab ke no thiab ua raws nraim,

20 kom nws lub siab thiaj tsis tsab ua loj siab dua nws cov kwvtij thiab nws thiaj tsis tso tej lus cob qhia no tseg tig mus rau sab xis lossis sab laug, nws thiab nws tej tub ki, thiaj li kav tau nws lub tebchaws ntev hauv cov Ixayees.