KEVCAI 18

Feem Uas Faib Rau Cov Pov Thawj

1 Cov Levis uas ua pov thawj yog xeem Levis huvsi yuav tsis muaj feem nrog cov Ixayees tau lub tebchaws ua qub txeeg qub teg. Lawv yuav tau noj tej uas muab hlawv xyeem rau (יחוח)Yahweh uas poob ua lawv tug.

2 Lawv yuav tsis nrog lawv cov kwvtij muaj qub txeeg qub teg. (יחוח)Yahweh yog lawv li qub txeeg qub teg, raws li nws cog lus tseg rau lawv lawm. 

3 Thaum cov pejxeem coj tsiaj tuaj xyeem rau (יחוח)Yahweh, tsis hais nyuj lossis yaj mas yuav tau rho tej no ua cov pov thawj li feem, yog muab ceg pwg pu thiab cov nqaij ntawm ob sab plhu thiab lub plab rau tus pov thawj.

4 Koj yuav muab thawj phaum qoob thiab cawv txiv hmab thiab roj thiab thawj phaum plaub yaj rau tus pov thawj.

5 Rau qhov (יחוח)Yahweh uas yog koj Tus Tswv tau xaiv Levis tawm hauv nej txhua xeem los sawv ntsug ua koom hauv (יחוח)Yahweh lub npe, tag nrho nws thiab nws caj ces mus ib txhis.

6 Yog cov Levis leejtwg tawm ntawm lub moos twg uas nws nyob hauv cov Ixayees yuav tuaj rau lub chaw uas (יחוח)Yahweh yuav xaiv cia, nws kuj tuaj tau txhua lub sijhawm raws li nws xav tuaj.

7 Thiab nws yuav ua koom hauv (יחוח)Yahweh uas yog nws Tus Tswv lub npe tau ib yam li nws cov kwvtij Levis sawvdaws uas sawv ntsug ua haujlawm rau ntawm (יחוח)Yahweh xub ntiag.

8 Nws yuav nrog lawv muaj feem tau noj sib npaug zos, tsis xam tej uas nws muag nws tej qhov txhia chaw es tau.

​

Tsis Txhob Teev Dab

9 Thaum koj mus rau hauv lub tebchaws uas (יחוח)Yahweh uas yog koj Tus Tswv pub rau koj, koj tsis txhob xyaum ua tej kev qias vuab tsuab uas tej haiv neeg ntawd ua.

10 Tsis txhob kheev koj cov ib tug twg muab nws tej tub tej ntxhais hlawv xyeem rau dab, tsis txhob kheev ib tug twg saib caij, saib yaig, saib sij, ua txiv neeb thiab ntxooj dab,

11 ua khawv koob, ua yees siv, lossis ua neeb hu tej tuag.  

12 Tus uas ua li no yog tus uas qias vuab tsuab rau (יחוח)Yahweh. Vim yog ua tej qias vuab tsuab no, (יחוח)Yahweh uas yog koj Tus Tswv thiaj ntiab lawv khiav tawm ntawm koj hauv ntej mus lawm.

13 Koj yuav tau ua tus uas tsis muaj chaw thuam li rau ntawm (יחוח)Yahweh uas yog koj Tus Tswv xub ntiag.

14 Tej haiv neeg uas koj twb yuav muab ntiab kom khiav ntawd, lawv ntseeg tej txiv neeb txiv yaig. Tiamsis koj li mas (יחוח)Yahweh uas yog koj Tus Tswv tsis kheev koj ua li ntawd.

​

Tus Cev Lus Yam Li Mauxes

15 (יחוח)Yahweh uas yog nej Tus Tswv yuav tsa ib tug xibhwb cev lus, zoo yam li kuv tshwm los hauv nej cov kwvtij, mas nej yuav tau mloog nws lus.  

16 Yam li uas nej thov (יחוח)Yahweh uas yog nej Tus Tswv ntawm Haules rau hnub uas nej tuaj txoos ua ke hais tias, tsis txhob cia peb tau hnov (יחוח)Yahweh uas yog peb Tus Tswv lub suab lossis pom tej nplaim taws hlob kawg no dua li lawm, tsam ces peb tuag.

17 Mas (יחוח)Yahweh hais rau kuv tias, qhov uas lawv hais li ntawd kuj zoo.

18 Kuv yuav pub ib tug cev kuv li lus, zoo ib yam li koj tshwm los hauv lawv cov kwvtij. Mas kuv yuav muab kuv tej lus rau hauv nws lub qhov ncauj, mas nws yuav hais txhua lo lus uas kuv kom nws hais ntawd rau lawv.

19 Leejtwg tsis mloog kuv tej lus uas tus cev lus tuav kuv lub npe hais, kuv yuav rau txim rau tus ntawd.

20 Tiamsis tus cev lus twg uas muaj cuab kav tuav kuv lub npe hais tej lus uas kuv tsis tau kom nws hais lossis tuav luag tej dab lub npe hais, mas tus uas cev lus ntawd yuav tuag.

21 Yog nej xav hauv lub siab tias, yuav ua li cas peb thiaj paub tej lus uas tsis yog (יחוח)Yahweh hais?

22 Yog thaum tus uas cev lus tuav (יחוח)Yahweh lub npe hais, tiamsis tej ntawd tsis tshwm los muaj tseeb raws li nws hais, mas tej lus ntawd tsis yog (יחוח)Yahweh hais. Tus cev lus ntawd nws hais nws xwb, nej tsis txhob ntshai nws.