Tej Moos Cawm Siav

(Xwm Txheej Taug Kev 35:9-34; Yahshua Noos 20:1-9)

1 Thaum (יחוח)Yahweh uas yog nej Tus Tswv rhuav tshem tej haiv neeg hauv lub tebchaws uas (יחוח)Yahweh uas yog nej Tus Tswv pub rau nej thiab nej txeeb lawv lub tebchaws thiab nej mus nyob rau hauv lawv tej moos thiab hauv lawv tej vaj tse,

2 nej yuav tau tseg peb lub moos cia rau hauv lub tebchaws uas (יחוח)Yahweh uas yog nej Tus Tswv pubrau nej ua nej tug ntawd.

3 Nej yuav npaj muaj kev mus rau hauv thiab muab lub tebchaws uas (יחוח)Yahweh uas yog nej Tus Tswv pub rau nej ua nej tug ntawd faib ua peb feem, xwv tus uas tau tua tibneeg lawm thiaj khiav tau mus rau hauv lub moos ntawd.

4 Ntawm no mus yog tej kevcai rau tus uas tua tibneeg es khiav mus cawm siav tau rau hauv tej moos ntawd. Yog leejtwg tsis yog txhob txwm tua kwvtij zej zog thiab tsis tau ua yeeb ncuab dua,

5 piv li uas ob tug kwvtij zej zog mus txiav ntoo tom hav zoov, mas thaum ib tug tsa taus ntov ntoo, nws rab taus cia li hle mus raug nws tus kwvtij tuag lawm, mas tus ntawd khiav tau mus rau hauv tej moos cawm siav lub twg kuj tau.

6 Yog txojkev uas mus rau lub moos cawm siav deb heev, tsam ces tus uas tuag ntawd cov kwvtij yuav chim heev ces caum cuag tus uas tua tibneeg ntawd thiab muab nws tua pov tseg, txawm yog nws tsis muaj lub txim txog tuag rau qhov nws tsis tau ua yeeb ncuab dua rau nws tus kwvtij zej zog kuj xij.

7 Vim li no kuv thiaj hais rau nej tias, nej yuav tau tseg peb lub moos cia.

8 Yog (יחוח)Yahweh uas yog nej Tus Tswv nthuav nej lub tebchaws kom dav raws li nws tau cog lus ruaj cia rau nej tej poj koob yawm txwv thiab muab lub tebchaws huvsi uas nws cog lus tias yuav pub rau nej tej poj koob yawm txwv pub rau nej,

9 tsuav yog nej ceev faj tuav rawv tej lus cob qhia no huvsi uas hnub no kuv muab cob rau nej, uas yog nej hlub (יחוח)Yahweh uas yog nej Tus Tswv thiab ua lub neej raws li nws tej kev, mas nej yuav tsav dua peb lub moos cawm siav,

10 xwv tus uas tsis txhaum thiaj li tsis tuag rau hauv nej lub tebchaws uas (יחוח)Yahweh uas yog nej Tus Tswv pub rau nej ua qub txeeg qub teg, mas nej thiaj tsis tau ris nws cov ntshav.  

11 Tiamsis yog leejtwg ntxub nws tus kwvtij zej zog es mus zov kev muab tus kwvtij ntawd ntaus kom tuag, txawm yog tus uas tua ntawd khiav mus rau hauv tej moos cawm siav lub twg kuj xij.

12 Cov kev txwj laug hauv nws lub moos yuav txib tibneeg mus coj nws hauv lub moos cawm siav los mas muab cob rau tus tuag cov kwvtij mas nws yuav raug muab tua pov tseg.

13 Nej lub qhov muag tsis txhob khuv xim tus ntawd li, nej yuav tau ntxuav lub txim uas tua tus tibneeg tsis txhaum hauv cov Ixayees mus kom nej thiaj noj qab nyob zoo.  

14 Tej qub txeeg qub teg uas koj yuav tau hauv lub tebchaws uas (יחוח)Yahweh uas yog koj Tus Tswv pub rau koj ua koj tug ntawd, mas koj tsis txhob txav tej ncej ciam teb uas thaum koj tej poj koob yawm txwv uas dua tag lawm txhos cia.

​

Txoj Kevcai Ua Timkhawv 

15 Tib leeg xwb ua timkhawv tom tus uas ua txhaum mas tsis txaus, tsis hais ua txhaum ib yam kevcai abtsi li. Yuav tau muaj ob leeg los peb leeg ua timkhawv thiaj li ntseeg tau.

16 Yog muaj timkhawv iab liam leejtwg hais tias tau ua txhaum,

17 mas ob tog uas ua plaub ntawd yuav tau mus rau ntawm (יחוח)Yahweh xub ntiag, mus cuag cov pov thawj thiab cov uas tu plaub rau lub sijhawm ntawd.

18 Cov uas tu plaub yuav tau ua tib zoo tshuaj saib mas yog tus uas ua timkhawv ntawd iab liam dag nws tus kwvtij zej zog xwb,

19 mas yuav tau ua rau tus uas ua cuav timkhawv ntawd ib yam li nws npaj siab yuav ua rau nws tus kwvtij zej zog. Ua li no nej thiaj ntxuav tau tej kev phem no tawm hauv nej mus.  

20 Lwm tus sawvdaws yuav tau hnov thiab ntshai, tsis ua phem li no rau hauv nej nruab nrab dua li lawm.

21 Nej lub qhov muag tsis txhob khuv xim kiag li, yuav tau muab siav pauj siav, qhov muag pauj qhov muag, kaus hniav pauj kaus hniav, tes pauj tes, taw pauj taw.