Kevcai Ua Rog

1 Thaum nej mus ua rog rau yeeb ncuab, yog nej pom nees thiab tsheb ua rog thiab tub rog coob dua nej, mas nej tsis txhob ntshai lawv, rau qhov (יחוח)Yahweh uas yog nej Tus Tswv uas coj nej tawm hauv Iziv tebchaws los nrog nraim nej nyob.  

2 Thaum nej tuaj ze yuav ua rog, tus pov thawj yuav tawm tuaj hais rau cov pejxeem.

3 Mas yuav hais tias, cov Ixayees es, cia li tig ntsej mloog. Hnub no nej tuaj ze yuav ua rog rau nej cov yeeb ncuab, nej tsis txhob poob siab, tsis txhob ntshai, tsis txhob tshee, tsis txhob ras,

4 rau qhov (יחוח)Yahweh uas yog nej Tus Tswv, yog tus uas nrog nej mus ua rog rau nej cov yeeb ncuab, pab nej kov yeej.  

5 Mas cov thawj rog yuav hais rau cov pej xeem tias, leejtwg ua tau tsev tshiab, tiamsis tseem tsis tau ua kevcai xyeem lub tsev ntawd? Mas cia tus ntawd rov qab mus tsev, ntshai tsam nws ho tuag hauv tshav rog ces lwm tus yuav ua kevcai xyeem nws lub tsev.

6 Thiab leejtwg cog vaj txiv hmab, tiamsis tseem tsis tau noj cov txiv hmab ntawd? Mas cia tus ntawd rov qab mus tsev, ntshai tsam nws ho tuag hauv tshav rog lawm ces lwm tus yuav noj nws cov txiv hmab.

7 Thiab leejtwg qhaib tau pojniam cia lawm, tiamsis tseem tsis tau yuav? Mas cia tus ntawd rov qab mus tsev, ntshai tsam nws ho tuag hauv tshav rog ces lwm tus ho yuav lawm.

8 Cov thawj rog yuav hais dua rau cov pejxeem tias, muaj leejtwg ntshai thiab siab yau? Cia nws rov qab mus tsev, ntshai tsam nws tej phooj ywg siab ho yaj tag yam li nws.

9 Thaum cov thawj rog hais rau cov pejxeem tag lawd, mas yuav tsa dua ib cov thawj kav tej pab tub rog.

10 Thaum nej mus ze lub moos uas nej yuav ua rog ntawd, mas nej yuav xub tshaj xo sib raug zoo ua ntej.  

11 Yog lawv teb lo lus nrog nej sib raug zoo thiab qhib rooj loog rau nej, ces nej cia li yuam cov tibneeg uas nej ntsib hauv lub moos ntawd, ua haujlwm rau nej ua koom tu nej.  

12 Tiamsis yog lawv tsis yeem nrog nej sib raug zoo, cia li ua rog rau nej, ces nej cia li vij nkaus ntaus lub moos ntawd.

13 Thaum (יחוח)Yahweh uas yog nej Tus Tswv muab lub moos ntawd rau hauv nej txhais tes lawm, nej cia li xuas ntaj tua txhua tus txivneej huvsi pov tseg.

14 Tiamsis cov pojniam thiab cov menyuam thiab tej tsiaj txhu thiab ib puas tsav yam hauv lub moos ntawd uas nej txeeb tau huvsi, nej cia li coj los ua nej tug. Nej yuav siv tej uas nej txeeb tau ntawm nej cov yeeb ncuab los uas (יחוח)Yahweh uas yog nej Tus Tswv pub rau nej.

15 Nej yuav tau ua li no rau txhua lub moos uas nyob deb nej uas tsis yog lwm haiv neeg tej moos uas nyob ze ze no.

16 Tiamsis lwm haiv neeg tej moos uas (יחוח)Yahweh uas yog nej Tus Tswv muab pub ua qub txeeg qub teg rau nej mas nej tsis txhob tseg ib txojsia abtsi uas ua pa tau kiag li.

17 Cia li muab ua kom puam tsuaj tu noob nrho, yog cov Hithais, cov Amaulais, cov Khana‑as, cov Pelixais, cov Hivais, thiab cov Yenpus, raws li (יחוח)Yahweh uas yog nej Tus Tswv hais kom nej ua, 

18 kom lawv thiaj tsis qhia nej ua tej kev qias vuab tsuab uas lawv ua koom tu lawv tej dab, nej thiaj tsis ua txhaum rau (יחוח)Yahweh uas yog nej Tus Tswv.

19 Thaum nej vij lub moos twg ntev thiab ua rog txeeb lub moos ntawd, tsis txhob xuas taus ntov tej ntoo ntawm lub moos ntawd, rau qhov nej yuav noj tej txiv ntoo ntawd mas tsis txhob muab ntov. Tej ntoo ntawd tsis yog tibneeg uas nej yuav vij ua rog rau.

20 Tsuas yog ntov tej ntoo uas nej paub tias noj tsis tau pov tseg xwb, thiab coj los siv tib chaw vij lub moos uas nrog nej ua rog, mus txog thaum lub moos ntawd tawg.