1 Yog koj pom kwvtij zej zog li nyuj lossis yaj yuam kev tuaj rau ntawm koj, koj tsis txhob nkaum tes nkoos tsis pab. Koj yuav tau xa tej tsiaj ntawd rov qab mus rau tus tswv.

2 Yog tus tswv nyob deb lossis koj tsis paub nws, koj yuav coj tus tsiaj ntawd los rau ntawm koj tsev, mas tus tsiaj yuav nrog koj nyob mus txog thaum tus tswv tuaj nrhiav tau mas koj yuav muab rau tus tswv.  

3 Koj yuav tau ua ib yam nkaus li no, txawm yog nees luav lossis ris tsho lossis ib yam abtsi uas luag ua ploj es koj pom. Tsis txhob nkaum tes nkoos tsis pab nws.

4 Yog koj pom kwvtij zej zog li nees luav lossis nyuj ntog tom tej tog kev, koj tsis txhob nkaum tes nkoos. Koj yuav tau pab muab tus tsiaj ntawd tsa kom sawv.

5 Tej pojniam tsis txhob hnav tej txivneej li tsoos ib yam abtsi kiag li. Tej txivneej tsis txhob hnav tej poj niam li tsoos. Yog leejtwg hnav li no mas kuj qias vuab tsuab rau (יחוח)Yahweh uas yog koj Tus Tswv.

6 Yog koj cia li mus pom zes noog nyob saum ntoo lossis hauv av muaj me nyuam noog lossis qe thiab tus poj puag cov menyuam lossis puag cov qe ntawd, koj tsis txhob muab kiag tus poj thiab cov menyuam mus huvsi.

7 Koj yuav tso tus poj noog mus tiamsis koj khaws cov menyuam mus tau, xwv koj thiaj noj qab nyob zoo thiab muaj txojsia nyob ntev.

8 Thaum koj ua tsev tshiab, koj yuav tau xov puag ncig txheej tsev las tshav saud, mas yog muaj tibneeg poob saum lub tsev los tuag, lub tsev thiaj tsis ris tus uas tuag ntawd lub txim.

9 Koj tsis txhob tseb ob yam noob ua ke rau hauv koj lub vaj txiv hmab. Yog ua li ntawd mas txhua yam uas koj tau hauv lub vaj ntawd yuav tau muab kiag rau hauv qhov chaw uas pe hawm (יחוח)Yahweh, tsis hais tej uas koj tseb ntawd thiab tej txiv hmab huvsi.

10 Koj tsis txhob muab nyuj thiab nees luav los nruab koom khais laij teb.

11 Koj tsis txhob hnav tej ntaub uas muab plaub yaj thiab xov maj ntos ua ke.  

12 Koj yuav tau tis tw rau ntawm plaub lub Kaum qab tsho ntev uas koj hnav.

​

Kevcai Ua Txij Nkawm

13 Yog leejtwg tau pojniam thiab thaum nrog tus pojniam pw tag lawm, ho rov ntxub nws,

14 thiab nrhiav lus ntxo nws, ua rau tus pojniam ntawd poob koob, nws hais tias, kuv yuav tus pojniam ntawd mas thaum kuv mus nrog nws pw, kuv pom tias nws tsis dawb huv lawm.  

15 Mas tus ntxhais ntawd leej txiv thiab leej niam yuav coj yam uas ua chaw cim hais tias, tus ntxhais ntawd dawb huv tuaj rau cov kev txwj laug hauv lub moos ntawd rau ntawm rooj loog.

16 Tus ntxhais ntawd leej txiv yuav hais rau cov kev txwj laug tias, kuv muab kuv tus ntxhais qua rau tus yawg no yuav ua pojniam, tiamsis nws tsis nyiam kuv tus txhais.

17 Tus yawg no nrhiav lus ntxo hais tias kuv tus ntxhais tsis dawb huv lawm. Ces nws yuav muab daim ntaub ntawd nthuav kiag rau cov kev txwj laug hauv lub moos ntawd saib.  

18 Mas cov kev txwj laug hauv lub moos yuav tau muab tus txivneej ntawd nplawm,

19 thiab muab nws nplua ib puas sekhees nyiaj thiab muab cov nyiaj ntawd rau tus ntxhais ntawd leej txiv, rau qhov nws ua rau cov Ixayees ib tug ntxhais poob koob. Tus ntxhais ntawd yuav rov mus ua nws pojniam, nws yuav nrauj tsis tau tus ntxhais ntawd mus tag sim neej.

20 Tiamsis yog tej ntawd muaj tseeb thiab nrhiav tsis tau yam uas ua chaw cim hais tias tus ntxhais ntawd dawb huv,

21 mas lawv yuav coj tus ntxhais ntawd tawm rau nraum leej txiv lub qhov rooj. Mas cov txivneej hauv lub moos ntawd yuav xuas pob zeb muab tus ntxhais ntawd ntaus kom tuag, rau qhov nws tau ua yam uas rhuav ntsej muag kawg li rau hauv cov Ixayees, yog deev hluas nraug rau hauv leej txiv lub tsev. Ua li no nej thiaj ntxuav tau tej kev phem tawm hauv nej mus.  

22 Yog nej pom ib tug txiv neej deev lwm tus tus pojniam, ob tug uas sib deev ntawd yuav tau raug muab tua pov tseg. Ua li no nej thiaj ntxuav tau tej kev phem tawm hauv cov Ixayees mus.

23 Yog muaj ib tug ntxhais dawb huv uas lwm tus tub qhaib lawm es muaj ib tug txawm ntsib tus ntxhais ntawd hauv lub moos thiab nrog nws pw ua ke lawm,

24 mas nej yuav tau coj ob tug tawm rau nraum rooj loog thiab xuas pob zeb muab ob tug ntaus kom tuag, tus ntxhais ntawd los vim nws twb nyob hauv lub moos, kuj tsis qw hu luag tuaj pab, tus txivneej los vim nws tau ua qias puas tsuas nws kwvtij zej zog li pojniam. Ua li no nej thiaj ntxuav tau tej kev phem tawm hauv nej mus.

25 Tiamsis yog ib tug txivneej ntsib ib tug ntxhais uas lwm tus tub qhaib lawm tom hav zoov hav tsuag es cia li muab tus ntxhais ntawd txhom deev, mas tsuas yog muab tus txivneej uas txhom ntawd tua pov tseg xwb.  

26 Nej tsis txhob ua li cas rau tus ntxhais ntawd, rau qhov nws tsis tau ua txhaum txaus tuag. Tshaj plaub no kuj zoo ib yam li tshaj plaub uas ib tug yawg ntaus nws ib tug kwvtij zej zog tuag.

27 Rau qhov tus yawg ntawd ntsib tus ntxhais tom hav zoov hav tsuag, txawm yog tus ntxhais uas lwm tus tub qhaib lawm, qw hu kom luag tuaj pab los tsis muaj leejtwg tuaj pab tau nws.

28 Yog ib tug txivneej twg ntsib ib tug ntxhais dawb huv uas tsis muaj leej twg qhaib es muab tus ntxhais ntawd txhom deev thiab muaj tibneeg pom,

29 mas tus yawg uas txhom ntawd yuav tau them tsib caug sekhees nyiaj rau tus ntxhais ntawd txiv thiab yuav tus ntxhais ntawd ua nws pojniam, vim nws ua qias puas tsuas tus ntxhais ntawd lawm, mas nws yuav nrauj tsis tau tus ntxhais ntawd tag sim neej li.

30 Tsis kheev leejtwg yuav nws txiv tus pojniam thiab tsis txhob thws nws txiv pojniam chaw txaj muag.