Cov Uas Tsis Muaj Feem Koom Nrog (יחוח)Yahweh Cov Tibneeg Ua Ke

1 Tus txivneej twg uas noob qes xaum lossis tus noov tu lawm, tsis muaj feem koom nrog (יחוח)Yahweh cov tibneeg tuaj txoos ua ke.

2 Tej menyuam tsaub, tsis muaj feem koom nrog (יחוח)Yahweh cov tib neeg ua ke, tsis kheev lawv tej tub ki koom nrog (יחוח)Yahweh cov tibneeg ua ke mus txog kaum tiam.

3 Cov Asmoos thiab cov Mau‑as, tsis muaj feem koom nrog (יחוח)Yahweh cov tibneeg ua ke. Tsis kheev lawv caj ces koom nrog (יחוח)Yahweh cov tibneeg ua ke mus txog kaum tiam,

4 rau qhov thaum uas nej khiav tawm hauv Iziv tebchaws los, cov tibneeg no tsis nqa dej nqa mov tuaj tos nej ntawm tog kev. Lawv tseem ntiav Npe‑aus tus tub Npala-as tuaj ntawm Pethaus hauv Mexauphautamias tebchaws tuaj foom nej.  

5 Txawm li cas los xij, (יחוח)Yahweh uas yog nej Tus Tswv tsis mloog Npala‑as lus, tiamsis nws tseem muab tej lus foom ntawd ntxeev ua tej lus koob hmoov rau nej, vim yog (יחוח)Yahweh uas yog nej Tus Tswv hlub nej.

6 Nej tsis txhob nrog lawv sib raug zoo thiab txhawb lawv vam meej mus ib txhis.  

7 Nej tsis txhob ntxub cov Edoos, rau qhov lawv yog nej cov kwvtij.  Nej tsis txhob ntxub cov Iziv, rau qhov nej twb tau mus nrog lawv nyob rau hauv lawv lub tebchaws.  

8 Lawv cov no tej menyuam mas tiam uas peb ces los koom tau nrog (יחוח)Yahweh cov tibneeg ua ke.

​

Kev Dawb Huv Rau Hauv Lub Yeej

9 Thaum nej tawm mus ua rog rau nej tej yeeb ncuab es nej tseem nyob hauv lub yeej, nej yuav tau nyob deb txhua yam kev phem kev qias.

10 Yog nej cov txivneej leejtwg qias tsis huv, vim muaj kua chaw xis ntws los thaum hmo ntuj, nws yuav tau tawm mus nyob sab nraum lub yeej, nws tsis txhob los rau hauv lub yeej,

11 tiamsis thaum yuav tsaus ntuj, nws yuav tau da dej ces thaum hnub poob qho lawm, nws los tau rau hauv lub yeej.

12 Koj yuav tau muaj ib lub chaw rau sab nraum lub yeej es koj mus plob rau sab ntawd.

13 Hauv koj tej cuab yeej, koj yuav tau muaj ib rab tuam txhob ntoo mas thaum uas koj zaum sab nraud lawd, koj thiaj tau khawb qhov thiab tau faus quav.  

14 Rau qhov (יחוח)Yahweh uas yog koj Tus Tswv nrog koj nyob hauv nruab nrab koj lub yeej kom thiaj tsom kwm tau koj thiab muab koj tej yeeb ncuab cob rau koj. Vim li no koj lub yeej yuav tau dawb huv kom (יחוח)Yahweh thiaj tsis pom tej uas tsis zoo saib nyob hauv koj, thiab thiaj tsis fee plhu kiag ntawm koj.

​

Tej Kevcai

15 Yog muaj tub qhe khiav ntawm tus lospav los nrog koj nyob, mas tsis txhob muab tus tub qhe ntawd xa rov qab rau tus lospav.  

16 Koj cia nws nrog koj nyob hauv nej nruab nrab rau hauv lub chaw uas nws xaiv cia rau hauv nej tej moos qhov twg kuj tau raws li nws siab nyiam. Koj tsis txhob quab yuam tsim txom nws.

17 Tsis txhob kheev Ixayees tej ntxhais ib tug twg ua poj muag cev xyeem rau dab. Tsis txhob kheev Ixayees cov tub ib tug twg ua txivneej muag cev xyeem rau dab.  

18 Koj tsis txhob coj tej nqi zog uas pojniam muag cev, txivneej muag cev, tuaj pub rau hauv (יחוח)Yahweh uas yog koj Tus Tswv lub tsev pauj tej uas koj yeem lus tseg yuav pub, rau qhov ob yam no yog tej uas qias vuab tsuab rau (יחוח)Yahweh uas yog koj Tus Tswv.

19 Koj tsis txhob qiv txais ib yam abtsi rau kwvtij es yuav paj tsis hais nyiaj, qoob loo, los ib yam abtsi uas luag qiv es xam yuav paj.

20 Koj muab qiv txais rau lwm haiv neeg mas yuav paj kuj tau. Yog qiv txais rau kwvtij mas tsis txhob yuav paj, xwv (יחוח)Yahweh uas yog koj Tus Tswv thiaj li foom koob hmoov rau koj txhua yam uas koj ua rau hauv lub tebchaws uas koj mus txeeb ua koj tug.  

21 Thaum koj yeem lus yuav pub ib yam abtsi rau (יחוח)Yahweh uas yog koj Tus Tswv, tsis txhob muab sej cia ntev, rau qhov (יחוח)Yahweh uas yog koj Tus Tswv yuav tsib kom tau ntawm koj thiab koj yuav muaj txim.  

22 Yog koj tsis tau yeem lus, koj kuj tsis muaj txim.

23 Koj yuav tau ceev faj ua raws li tej lus uas tawm hauv koj qhov ncauj los, rau qhov yog koj zoo siab yeem pub rau (יחוח)Yahweh uas yog koj Tus Tswv.

24 Thaum koj mus txog hauv koj tej kwvtij zej zog vaj txiv hmab, koj noj tau tej txiv hmab ntawd kom tsau npaum li uas koj xav noj, tiamsis tsis txhob muab ntim rau hauv koj lub kawm.

25 Thaum koj mus rau hauv koj tej kwvtij zej zog daim teb qeb, teb mog, koj cev tes de hnab puav kuj tau, tiamsis koj tsis txhob rho liag hlais kwvtij zej zog tej qoob loo.